យុគសម័យ - នាថ្ងៃទី ១៥ ខែកញ្ញា រដ្ឋាភិបាលអ៊ីស្រាអែលបានអនុម័តលើការសាងសង់ទីលំនៅដ្ឋានថ្មីមួយនៅតំបន់វេសប៊ែងដែលខ្លួនកាន់កាប់។ ចំណាត់ការនេះ បានកើតឡើងខណៈដែលនៅសល់តែពីរថ្ងៃទៀតប៉ុណ្ណោះ គឺដល់ថ្ងៃបោះឆ្នោ តជ្រើសតាំងតំណាងរាស្ត្រអ៊ីស្រាអែល។
ទីលំនៅដ្ឋាន Maale Adumim របស់អ៊ីស្រាអែល នៅលើដីកាន់កាប់នៃតំបន់វេសប៊ែង (រូបថតៈ AFP/TTXVN)
នៅក្នុងសេចក្តីថ្លែងការណ៍មួយ ការិយាល័យនាយករដ្ឋមន្រ្តីអ៊ីស្រាអែលបានអោយដឹងថា រដ្ឋាភិបាលរបស់លោកនាយករដ្ឋមន្រ្តី Netanyahu បានយល់ព្រមបង្វែរ “ភូមិតាំងទីលំនៅ” នៅ” Mevoot Yericho នៅជ្រលងភ្នំហ្ស៊កដានីទៅជាទីលំនៅដ្ឋានជាផ្លូវការ។
សេចក្តីប្រកាសបានបញ្ជាក់ថា “រដ្ឋាភិបាលបានអនុម័តលើអនុសាសន៍របស់សមាជិកសភាដើម្បីកសាងការតាំងទីលំនៅ Mevoot Yericho” នៅពេលកិច្ចប្រជុំគណៈរដ្ឋមន្រ្តីប្រចាំសប្តាហ៍ត្រូវបានបើកនៅជ្រលងភ្នំហ្ស៊កដានី។ នៅក្នុងកិច្ចប្រជុំនេះ លោកនាយករដ្ឋមន្រ្តី Netanyahu ក៏បានប្រកាសពីគោលបំណងរបស់លោក ក្នុងការពង្រីកការតាំងទីលំនៅនៅតំបន់ West Bank ប៉ុន្តែដោយមានកិច្ចសហការជាមួយប្រធានាធិបតីអាមេរិកលោក Donald Trump ផងដែរ។
សូមរំលឹកឡើងបវិញថា មួយសប្តាហ៍មុនសម័យបោះឆ្នោតសភា នាយករដ្ឋមន្ត្រី Netanyahu បានប្រកាសសន្យាថា នឹងកាត់យកដីប៉ាឡេស្ទីន នៅតំបន់ហ្ស៊កដានី ក្រោមអាណានិគមអ៊ីស្រាអែល មួយភាគ មកដាក់ជាទឹកដីអ៊ីស្រាអែល។ ជាពាក្យសន្យាដែលធ្វើឡើងដើម្បីទាក់ទាញសំឡេងឆ្នោត ប៉ុន្តែវាអាចនឹងធ្វើឱ្យដំណើរស្វែងរកសន្តិភាពអ៊ីស្រាអែលប៉ាឡេស្ទីនរលត់រលាយ។
សម័យបោះឆ្នោតកាន់តែខិតមកដល់ លោក Netanyahu កាន់តែចង់ទាក់ទាញមតិសាធារណៈខ្លាំងឡើងៗ។ បន្ទាប់ពីបានបង្ហើបព័ត៌មានស្តីពីវត្តមាននៃមជ្ឈមណ្ឌលនុយក្លេអ៊ែរថ្មីនៅអ៊ីរ៉ង់មក លោកបានប្រកាសថា បើសិនជាលោកជាប់ឆ្នោតជាថ្មី លោកនឹងកាត់យកដីប៉ាឡេស្ទីនមួយភាគមកធ្វើរបស់អ៊ីស្រាអែល។
សូមគូសបញ្ជាក់ថាជ្រលងភ្នំ Jourdain និងសមុទ្រមរណៈ ស្ថិតនៅក្នុងតំបន់ហ្ស៊កដានីជាយុទ្ធសាស្ត្រ ដែលអ្នកនយោបាយអ៊ីស្រាអែលជាទូទៅ ក៏យល់ថាទោះ បីមានកិច្ចព្រមព្រៀងសន្តិភាពជាមួយប៉ាឡេស្ទីនយ៉ាងណាក៏ដោយ ក៏តំបន់នេះត្រូវតែស្ថិតក្រោមការគ្រប់គ្រងរបស់អ៊ីស្រាអែលជានិច្ច។ តំបន់នេះត្រូវបានអ៊ីស្រាអែលបានចូលធ្វើអាណានិគមតាំងពីឆ្នាំ១៩៦៧មក និងគ្មានភូមិឬពលរដ្ឋអារ៉ាបរស់នៅទេ។ ហេតុដូច្នេះហើយបានជាលោកនាយករដ្ឋមន្ត្រីរូបនេះ ចង់កាត់យកតំបន់អាណានិគមកិច្ចតែម្តង ព្រោះការកាត់ដីមួយដុំនេះ មិនរំខានដល់ជនជាតិប៉ាឡេស្ទីនណាម្នាក់ឡើយ។ នេះជាការបញ្ជាក់បន្ថែមរបស់លោក Netanyahu ដោយសន្យាថា ការកាត់យកដីតំបន់ហ្ស៊កដានីនេះ នឹងក្លាយជាអាទិភាពទីមួយរបស់រដ្ឋាភិបាលអ៊ីស្រាអែលថ្មីតែម្តង៕
ដោយស្រីព្រេជ
មតិពីមិត្តអ្នកអាន