លោកអគ្គលេខាបក្ស ប្រធានរដ្ឋវៀតណាម ង្វៀន ភូជុង ថ្លែងក្នុងវីដេអូថតទុក នៅមហាសន្និបាតអង្គការសហប្រជាជាតិ នៅថ្ងៃទី២៤ ខែកញ្ញា ឆ្នាំ២០២០
អគ្គលេខាបក្ស ប្រធានរដ្ឋវៀតណាម លោក ង្វៀន ភុជុងបានអញ្ជើញមានសារសំខាន់ជូនដល់អង្គប្រជុំ។ (រូបថត៖ VNA)
លោកអគ្គលេខាបក្ស ប្រធានរដ្ឋវៀតណាម ង្វៀន ភូជុង នៅថ្ងៃទី២៤ ខែកញ្ញា បានប្តេជ្ញារក្សាស្ថិរភាព សន្តិភាព សន្តិសុខ នៅក្នុងសមុទ្រខាងកើត ដែលកំពុងមានជម្លោះជាមួយចិន និងបណ្តាប្រទេសអាស៊ានផ្សេងទៀត។ ជាមួយគ្នានេះ លោកលោកអគ្គលេខាបក្ស ប្រធានរដ្ឋវៀតណាម ង្វៀន ភូផុង ក៏បានអំពាវនាវឲ្យភាគីជម្លោះទាំងអស់ គោរពតាមច្បាប់អន្តរជាតិ និងបញ្ឈប់សកម្មភាពឯកតោភាគី ដែលបង្កឲ្យមានបញ្ហាស្មុគស្មាញនៅក្នុងតំបន់ដែនទឹកជម្លោះផងដែរ។
ជាភាគីមួយនៃជម្លោះសមុទ្រខាងកើត វៀតណាមតែងតែលើកឡើងពីភាពតានតឹង និងការទាមទាររបស់ចិនប្រាប់វេទិកាអន្តរជាតិ។ តាមរយៈវីដេអូថតទុក និងបានចាក់នៅក្នុងមហាសន្និបាតអង្គការសហប្រជាជាតិក្នុងសម័យCOVID-19 លោកអគ្គលេខាបក្ស ប្រធានរដ្ឋវៀតណាម ង្វៀន ភូជុង បានលើកឡើងបញ្ហាជាច្រើនរួមមាន COVID-19 បញ្ហាទាក់ទិនអង្គការសហប្រជាជាតិ ជាពិសេសគឺសមុទ្រខាងកើត។
វៀតណាម ប្តេជារក្សាសន្តិភាព, ស្ថិរភាព, សន្តិសុខសមុទ្រ, សុវត្ថិភាព និងសេរីភាពនៃនាវាចរណ៍នៅក្នុងសមុទ្រចិនខាងត្បូង និងគោរពតាមអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ១៩៨២ (UNCLOS)។ ប្រមុខរដ្ឋវៀតណាមបានលើកឡើងបែបនេះ ដោយបន្ថែមយ៉ាងដូច្នេះថា៖ « យើងអំពាវនាវឲ្យភាគីជម្លោះទាំងអស់ អនុវត្តដោយប្រុងប្រយ័ត្ន បញ្ចៀសសកម្មភាពជាឯកតោភាគី ដែលអាចបង្កឲ្យមានបញ្ហាស្មុគ្រស្មាញនៅក្នុងតំបន់ជម្លោះ»។
កន្លងមក ចិនបានធ្វើសកម្មភាពអុងអាត់ជាឯកតោភាគី ក្នុងសមុទ្រខាងកើត តាមរយៈសមយុទ្ធយោធា និងនាវាយាមល្បាតរបស់ខ្លួន ដែលបង្កឲ្យវៀតណាមដាក់ការតវ៉ាជាញឹកញាប់។ ក្នុងវីដេអូដដែលនេះ លោកប្រមុខរដ្ឋវៀតណាម ក៏បានអំពាវនាវឲ្យភាគីជម្លោះក្នុងសមុទ្រខាងកើត ដោះស្រាយបញ្ហាដោយសន្តិវិធី និងតាមរយៈនីតិផ្សេងៗជាច្រើនទៀតដូចជា ការទូត ឬតាមនីតិវិធីច្បាប់ជាដើម។
នាកិច្ចប្រជុំដដែលនេះ ហ្វីលីពីន លើកពីបញ្ហាសមុទ្រចិនខាងត្បូងដែរ។ ប្រធានាធិបតី រ៉ូឌ្រីហ្គោ ឌូទើតេ ដែលបានលើកឡើងពីសាលក្រមរបស់ តុលាការមជ្ឈត្តការអចិន្ត្រៃយ៍ក្រុងឡាអេ (PCA) ឆ្នាំ២០១៦ បានប្រកាសពីការប្ដេជ្ញាចិត្តរបស់ហ្វីលីពីននៅក្នុងសមុទ្រខាងកើត ដោយផ្អែកទៅតាមអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ១៩៨២ និងសេចក្តីសម្រេចរបស់តុលាការមជ្ឈត្តការអចិន្ត្រៃយ៍ក្រុងឡាអេ។
សូមបញ្ជាក់ថា តាមរយៈ «បន្ទាត់ក្រហម៩ឆ្នូត» ចិនបានទាមទារស្ទើរតែ៩០ភាគរយនៃដែនទឹកក្នុងសមុទ្រខាងកើត ដោយផ្អែកតាមច្បាប់សមុទ្រអន្តរជាតិ និង ហេតុផលប្រវត្តិសាស្ត្ររបស់ខ្លួន។ ការទាមទាររបស់ចិនបែបនេះ បានធ្វើឲ្យជាន់លើដែនទឹក ដែលទាមទារដោយបណ្តាប្រទេសអាស៊ានផ្សេងទៀត ដូចជាវៀតណាម ហ្វីលីពីន ព្រុយណេ និងម៉ាឡេស៊ី./.
（ប្រភពព័ត៌មាន: thmey thmey.com）
មតិពីមិត្តអ្នកអាន