ការតភ្ជាប់ប្រភពធនធានអន្តរជាតិជួយឧបត្ថម្ភវៀតណាមកសាងប្រព័ន្ធអេកូឡូស៊ីអភិវឌ្ឍន៍បញ្ញាសិប្បនិម្មិត

អគ្គលេខាបក្ស និងជាប្រធានរដ្ឋ លោក To Lam ទទួលជួបលោក Eric Schmidt អតីតប្រធានសម្ព័ន្ធក្រុមហ៊ុន Google។

នៅក្នុងជំនួបនេះ អគ្គលេខាបក្ស និងជាប្រធានរដ្ឋ លោក To Lam បានស្វាគមន៍ចំពោះលោក Eric Schmidt និងគណៈប្រតិភូអ្នកជំនាញការដែលបានអញ្ជើញមកកាន់ប្រទេសវៀតណាម ព្រមទាំងបានវាយតម្លៃខ្ពស់ចំពោះការរួមចំណែករបស់លោក Eric Schmidt ទៅលើការអភិវឌ្ឍវិស័យបច្ចេកវិទ្យា និងបញ្ញាសិប្បនិម្មិតសកលលោក។

អគ្គលេខាបក្ស និងជាប្រធានរដ្ឋ ក៏បានវាយតម្លៃខ្ពស់ផងដែរចំពោះការដែលលោក Eric Schmidt និងគណៈប្រតិភូ នាពេលកន្លងមកបានសម្របសម្រួលគ្នាយ៉ាងសកម្មជាមួយបណ្តាស្ថាប័នរបស់វៀតណាម ដើម្បីដាក់ឱ្យអនុវត្តបណ្តាកម្មវិធីសហប្រតិបត្តិការនៅក្នុងវិស័យបញ្ញាសិប្បនិម្មិត បច្ចេកវិទ្យាជាន់ខ្ពស់ និងនវានុវត្តន៍។

អគ្គលេខាបក្ស និងជាប្រធានរដ្ឋ បានសង្កត់ធ្ងន់ថា វៀតណាមកំពុងជំរុញខ្លាំងក្លានូវការផ្លាស់ប្តូរទម្រង់កំណើន ដោយយកវិទ្យាសាស្ត្របច្ចេកវិទ្យា នវានុវត្តន៍ និងការបំប្លែងឌីជីថលធ្វើជាកម្លាំងចលករដ៏សំខាន់ ដើម្បីលើកកម្ពស់សមត្ថភាពប្រកួតប្រជែង ជំរុញការអភិវឌ្ឍឱ្យបានឆាប់រហ័សនិងប្រកបដោយចីរភាព ឆ្ពោះទៅរកគោលដៅក្លាយជាប្រទេសអភិវឌ្ឍន៍ មានចំណូលខ្ពស់នៅឆ្នាំ ២០៤៥។

នៅលើស្មារតីនោះ អគ្គលេខាបក្ស និងជាប្រធានរដ្ឋ បានស្នើឱ្យលោក Eric Schmidt និងគណៈប្រតិភូអ្នកជំនាញការ បន្តយកចិត្តទុកដាក់ និងជួយឧបត្ថម្ភវៀតណាមក្នុងការកសាងចក្ខុវិស័យ គោលនយោបាយ និងប្រព័ន្ធអេកូឡូស៊ីអភិវឌ្ឍន៍បញ្ញាសិប្បនិម្មិត ព្រមទាំងតភ្ជាប់បណ្តាប្រភពធនធានអន្តរជាតិ សហគ្រាសបច្ចេកវិទ្យា មូលនិធិវិនិយោគ វិទ្យាស្ថានស្រាវជ្រាវ និងអ្នកជំនាញការឈានមុខគេនៅលើពិភពលោក សំដៅជួយឧបត្ថម្ភវៀតណាមអភិវឌ្ឍន៍ធនធានមនុស្ស សហគ្រាសបច្ចេកវិទ្យា និងសមត្ថភាពនវានុវត្តន៍។

ទន្ទឹមនឹងនោះ អគ្គលេខាបក្ស និងជាប្រធានរដ្ឋ ក៏បានស្នើដល់សមាជិកនៃគណៈប្រតិភូ ដែលក្នុងនោះមានលោក Christopher Nguyen អគ្គនាយកក្រុមហ៊ុន Aitomatic ឱ្យបន្តអំពាវនាវដល់បណ្តាអ្នកជំនាញការ បញ្ញវន្ត និងសហគ្រិនបច្ចេកវិទ្យាជាជនជាតិវៀតណាមនៅឯបរទេស ឱ្យរួមដំណើរនិងរួមចំណែកនូវចំណេះដឹង បទពិសោធន៍ ព្រមទាំងប្រភពធនធាននានា សម្រាប់ការអភិវឌ្ឍរបស់ប្រទេសជាតិផងដែរ។

លោក Eric Schmidt បានសម្តែងនូវការដឹងគុណយ៉ាងជ្រាលជ្រៅដែលត្រូវបានអគ្គលេខាបក្ស និងជាប្រធានរដ្ឋ លោក To Lam ទទួលជួប ព្រមទាំងបានវាយតម្លៃខ្ពស់ចំពោះការអភិវឌ្ឍរបស់វៀតណាម ក៏ដូចជាចក្ខុវិស័យ និងសេចក្តីប្តេជ្ញាចិត្តផ្លាស់ប្តូរថ្មីរបស់បណ្តាថ្នាក់ដឹកនាំវៀតណាម ជាពិសេសគឺនៅក្នុងវិស័យវិទ្យាសាស្ត្រ បច្ចេកវិទ្យា និងនវានុវត្តន៍។

លោកបានយល់ឃើញថា វៀតណាមមានលក្ខខណ្ឌអំណោយផលជាច្រើនដើម្បីអភិវឌ្ឍវិស័យបញ្ញាសិប្បនិម្មិត ជាពិសេសគឺប្រភពធនធានមនុស្សវ័យក្មេង ប្រកបដោយភាពរស់រវើក មានសមត្ថភាពបន្ស៊ាំបានយ៉ាងឆាប់រហ័ស និងបរិយាកាសកាន់តែមានភាពងាយស្រួលសម្រាប់នវានុវត្តន៍។ លោកបានសម្តែងនូវជំនឿចិត្តថា បញ្ញាសិប្បនិម្មិតនឹងរួមចំណែកកាន់តែច្រើនថែមទៀតចូលទៅក្នុងកំណើនសេដ្ឋកិច្ចរបស់វៀតណាម។

នៅក្នុងរបាយការណ៍ជូនចំពោះអគ្គលេខាបក្ស និងជាប្រធានរដ្ឋ នាជំនួបនោះ លោក Eric Schmidt បានឱ្យដឹងថា លោកកំពុងធ្វើការជាមួយបណ្តាដៃគូវៀតណាម ដើម្បីដាក់ឱ្យអនុវត្តបណ្តាគំនិតផ្តួចផ្តើមសហប្រតិបត្តិការអំពីបញ្ញាសិប្បនិម្មិត ដូចជា គម្រោងគំរូពហុខឿនជាតិ Tapestry, គម្រោងទិន្នន័យនិងផលិតកម្មរូបវន្ត Data OS ក៏ដូចជាការអនុវត្តបញ្ញាសិប្បនិម្មិតនៅក្នុងការអប់រំកម្រិតចំណេះទូទៅផងដែរ។

លោកបានបញ្ជាក់ថានឹងពង្រីកបទពិសោធន៍ និងបណ្តាញសហប្រតិបត្តិការដ៏ទូលំទូលាយរបស់ខ្លួននៅក្នុងវិស័យបច្ចេកវិទ្យា ដើម្បីតភ្ជាប់វៀតណាមជាមួយបណ្តាដៃគូដ៏សមស្រប ព្រមទាំងជួយឧបត្ថម្ភវៀតណាមជំរុញការបំប្លែងឌីជីថល ការអភិវឌ្ឍបញ្ញាសិប្បនិម្មិត និងលើកកម្ពស់សមត្ថភាពនវានុវត្តន៍។

អតីតប្រធានសម្ព័ន្ធក្រុមហ៊ុន Google ក៏បានសម្តែងនូវបំណងចង់បន្តផ្លាស់ប្តូរយោបល់ជាមួយបណ្តាស្ថាប័ន សហគ្រាស វិទ្យាស្ថានស្រាវជ្រាវ សាកលវិទ្យាល័យ និងអ្នកជំនាញការរបស់វៀតណាម សំដៅស្វែងរកបណ្តាទិសដៅសហប្រតិបត្តិការជាក់ស្តែង ក្នុងការបណ្តុះបណ្តាលធនធានមនុស្ស ការស្រាវជ្រាវ - អភិវឌ្ឍន៍ ការជួយឧបត្ថម្ភសហគ្រាសបច្ចេកវិទ្យា និងការអនុវត្តបញ្ញាសិប្បនិម្មិតចូលទៅក្នុងបណ្តាវិស័យសេដ្ឋកិច្ច-សង្គម។

ដោយបានចែករំលែកថា លំហនិងសក្តានុពលសហប្រតិបត្តិការរវាងបណ្តាដៃគូវៀតណាម និងសហរដ្ឋអាមេរិក ក៏ដូចជានៅលើពិភពលោកគឺនៅមានទំហំធំធេងណាស់ លោក Eric Schmidt បានបញ្ជាក់ថានឹងបន្តត្រិះរិះ និងខិតខំប្រឹងប្រែងបន្ថែមទៀត ដើម្បីរួមចំណែកយ៉ាងជាក់ស្តែងទៅលើការអភិវឌ្ឍវិទ្យាសាស្ត្របច្ចេកវិទ្យា និងបញ្ញាសិប្បនិម្មិតរបស់វៀតណាម៕

ការកែលម្អប្រព័ន្ធស្តង់ដារ ដឹកនាំការអភិវឌ្ឍបញ្ញាសិប្បនិម្មិត និងធានាសន្តិសុខតាមអ៊ីនធឺណិត យុគសម័យ - នៅក្នុងបរិបទនៃការអភិវឌ្ឍយ៉ាងឆាប់រហ័សនៃបញ្ញាសិប្បនិម្មិត (AI) ដែលបង្កើនហានិភ័យ និងភាពស្មុគស្មាញនៃការវាយប្រហារតាមអ៊ីនធឺណិត ការកសាង និងការធ្វើឱ្យប្រព័ន្ធស្តង់ដារជាតិសម្រាប់បញ្ញាសិប្បនិម្មិត និងសន្តិសុខតាមអ៊ីនធឺណិតល្អឥតខ្ចោះ កំពុងក្លាយជាតម្រូវការបន្ទាន់។

ការប្រកួតប្រជែងបញ្ញាសិប្បនិម្មិតចិន-អាស៊ានបិទបញ្ចប់៖ ការលើកកម្ពស់កិច្ចសហប្រតិបត្តិការឌីជីថលក្នុងតំបន់ បើកឱកាសថ្មីសម្រាប់ប្រទេសកម្ពុជា យុគសម័យ - នៅថ្ងៃទី ៣០ ខែតុលា ព្រឹត្តិការណ៍បច្ចេកវិទ្យាដែលប្រមូលផ្តុំអ្នកជំនាញកំពូលៗរបស់ប្រទេសចិន និងអាស៊ាន - “ការប្រកួត AI Super Tournament ផ្តល់អំណាចដល់ឧស្សាហកម្មរាប់ពាន់ - ការប្រកួតប្រជែងនវានុវត្តន៍កម្មវិធីសេវាកម្មគ្រប់គ្រងទីផ្សារ” - បានបញ្ចប់ជាផ្លូវការនៅទីក្រុងណាននីង ខេត្តក្វាងស៊ី។ ការប្រកួតនេះត្រូវបានរៀបចំឡើងដោយការិយាល័យត្រួតពិនិត្យទីផ្សារនៃតំបន់ស្វយ័តក្វាងស៊ីជួង សម្ព័ន្ធយុវជនកុម្មុយនិស្តក្វាងស៊ី។ល។ ដោយមានការគាំទ្រពីសមាគមចិន-អាស៊ានសម្រាប់លើកកម្ពស់ការអភិវឌ្ឍកិច្ចសហប្រតិបត្តិការឧស្សាហកម្ម។ ដោយមានប្រធានបទ “ទីផ្សារឆ្លាតវៃ។ ការតភ្ជាប់អាស៊ាន - ...

ឌឹកអាញ់