ក្រុមហ៊ុន Apple បានស្នើឲ្យក្រុមហ៊ុនផ្គត់ផ្គង់សំខាន់ៗរបស់ខ្លួនវាយតម្លៃផលប៉ះពាល់នៃការចំណាយលើការផ្លាស់ប្តូរផលិតកម្មពី ១៥ ភាគរយ ទៅ ៣០ ភាគរយ នៃសមត្ថភាពផលិតរបស់ពួកគេពីប្រទេស ចិន ទៅកាន់តំបន់អាស៊ីអាគ្នេយ៍។
ប្រភពជាច្រើនបានប្រាប់សារព័ត៌មានប្រចាំថ្ងៃ Nikkei ថា សំណើរបស់ក្រុមហ៊ុនបច្ចេកវិទ្យាឈានមុខគេមួយនេះ ត្រូវបានជំរុញដោយភាពតានតឹងផ្នែកពាណិជ្ជកម្មរយៈពេលយូររវាងទីក្រុងវ៉ាស៊ីនតោន និងទីក្រុងប៉េកាំង ប៉ុន្តែប្រភពជាច្រើនឲ្យដឹងថា ទោះបីជាជម្លោះនេះត្រូវបានដោះស្រាយហើយក៏ដោយ ក៏នឹងមិនមានការត្រឡប់ទៅរកប្រទេស ចិន វិញដែរ។ ក្រុមហ៊ុន Apple បានសម្រេចចិត្តថា ហានិភ័យនៃការពឹងផ្អែកយ៉ាងខ្លាំងលើការផលិតនៅប្រទេស ចិន ដូចដែលក្រុមហ៊ុននេះបានធ្វើរួចហើយអស់រយៈពេលជាច្រើនទសវត្សរ៍មកនោះ មានទំហំធំពេក និងថែមទាំងកំពុងកើនឡើងផងដែរ។
ទិដ្ឋភាពនៅមុខហាងក្រុមហ៊ុន Apple នៅទីក្រុងស៊ាងហៃ។ រូបថត AFP
ក្រុមហ៊ុនផ្គត់ផ្គង់ជាច្រើនទទួលស្គាល់ថា ការផ្លាស់ប្តូរផលិតកម្មទៅកន្លែងផ្សេងទៀត នឹងត្រូវការពេលវេលា ហើយប្រទេស ចិន ទំនងជានឹងនៅតែជាមូលដ្ឋានផលិតដ៏សំខាន់បំផុតរបស់ក្រុមហ៊ុន Apple ដដែលក្នុងពេលអនាគតខ្លី។
ក្រុមហ៊ុនផ្គត់ផ្គង់មួយបានឲ្យដឹងថា៖ «វាពិតជាកិច្ចខិតខំប្រឹងប្រែងរយៈពេលយូរមួយ និងអាចមើលឃើញលទ្ធផលមួយចំនួនក្នុងរយៈពេលពី ២ ឆ្នាំ ឬ ៣ឆ្នាំ គិតចាប់ពីពេលនេះ»។ ក្រុមហ៊ុននេះបន្តថា៖ «វាឈឺចាប់ និងពិបាក ប៉ុន្តែនោះគឺជាអ្វីដែលយើងត្រូវតែដោះស្រាយ»។
ប្រភពសិ្នទ្ធនឹងបញ្ហានេះបានឲ្យដឹងថា នៅចុងឆ្នាំនេះ ក្រុមហ៊ុនបានចាប់ផ្ដើមពង្រីកអ្វីដែលក្រុមហ៊ុននេះហៅថា ក្រុមសិក្សាអំពីការចំណាយមូលធន។ ក្រុមដែលមានបុគ្គលិកជាង ៣០ នាក់នេះ កំពុងពិភាក្សាពីផែនការផលិតជាមួយក្រុមហ៊ុនផ្គត់ផ្គង់ និងកំពុងចរចាជាមួយរដ្ឋាភិបាលនានាអំពីការលើកទឹកចិត្តផ្នែកហិរញ្ញវត្ថុដែលរដ្ឋាភិបាលទាំងនោះអាចនឹងមានឆន្ទៈផ្តល់ឲ្យ ដើម្បីផ្ដល់ការទាក់ទាញការផលិតរបស់ក្រុមហ៊ុន Apple ព្រមទាំងបទប្បញ្ញត្តិ និងបរិស្ថានអាជីវកម្មមូលដ្ឋានផងដែរ។
ប្រភពមួយចំនួនឲ្យដឹងថា ក្រុមហ៊ុនផ្គត់ផ្គង់ និងផ្តល់សេវាដំឡើងសំខាន់ៗរួមមានក្រុមហ៊ុន Foxconn ក្រុមហ៊ុន Pegatron ក្រុមហ៊ុន Wistron ក្រុមហ៊ុន Quanta Computer ក្រុមហ៊ុន Compal Electronics និងក្រុមហ៊ុន Inventec ក្រុមហ៊ុន Luxshare-ICT និងក្រុមហ៊ុន Goertek សុទ្ធតែត្រូវបានស្នើសុំឲ្យវាយតម្លៃអំពីជម្រើសនៅក្រៅប្រទេស ចិន។ ក្រុមហ៊ុនផ្គត់ផ្គង់របស់ក្រុមហ៊ុន Apple ជាច្រើនផ្សេងទៀត ដូចជាក្រុមហ៊ុនផ្គត់ផ្គង់បោះពុម្ពប្រអប់សៀគ្វី និងប្រអប់ទូរស័ព្ទ កំពុងពិនិត្យមើលយ៉ាងដិតដល់អំពីទីកន្លែងរបស់ក្រុមហ៊ុនរបស់ខ្លួនអាចផ្លាស់ប្តូរទៅដើម្បីដំឡើងផលិតសម្រាប់ក្រុមហ៊ុន Apple។
(ប្រភព៖ postkhmer.com សរុបព័ត៌មានដោយសំណាង)
មតិពីមិត្តអ្នកអាន