សម្តេចបានលើកឡើងថា រដ្ឋាភិបាល មិនដើរចោលប្រជាជនមួយណាឡើយ ប៉ុន្តែពលរដ្ឋនៅតំបន់ក្រហមក្នុងរាជធានីភ្នំពេញ ពិតជាមានស្ថានភាពលំបាកច្រើន ដូច្នេះពួកគាត់គួរទទួលបានប្រយោជន៍មុនគេ។
 |
| សម្តេច ហ៊ុនសែន នាយករដ្ឋមន្ត្រីនៃកម្ពុជា។ (រូបថត៖ Fb Samdech Hunsen) |
កម្ពុជាមានពលរដ្ឋសរុប១,៥១៥,៤៤៧នាក់ហើយ ដែលបានចាក់វ៉ាក់សាំងបង្ការជំងឺកូវីដ-១៩ (COVID-19)។ នេះបើយោងតាមតួលេខផ្សេងគ្នារបស់ក្រសួងសុខាភិបាល និងក្រសួងការពារជាតិ នាថ្ងៃទី៥ឧសភា។ ចំនួននេះស្មើនឹងប្រមាណ១៥ភាគរយ នៃពលរដ្ឋសរុប១០លាននាក់ ក្នុងផែនការចាក់វ៉ាក់សាំង ខណៈរដ្ឋាភិបាលកំពុងសម្រុកចាក់វ៉ាក់សាំងបង្ការជំងឺនេះ ដល់ពលរដ្ឋរស់នៅក្នុងតំបន់ក្រហម រាជធានីភ្នំពេញ។
ត្រឹមរយៈពេល៤ថ្ងៃនៃយុទ្ធនាការចាក់វ៉ាក់សាំងឱ្យពលរដ្ឋនៅតំបន់ក្រហមក្នុងខណ្ឌដង្កោ ខណ្ឌមានជ័យ ខណ្ឌពោធិ៍សែនជ័យ និងខណ្ឌកំបូល មានមនុស្ស ចំនួន១៤៧,២១៨នាក់ បានចាក់វ៉ាក់សាំងបង្ការជំងឺកូវីដ-១៩។ លោក ឈុំ សុជាត អ្នកនាំពាក្យក្រសួងការពារជាតិ បានបញ្ជាក់នៅលើទំព័រហ្វេសប៊ុករបស់ខ្លួនថា ក្នុងចំណោមពលរដ្ឋនៅតំបន់ក្រហមដែលបានចាក់វ៉ាក់សាំងកូវីដ-១៩នេះ គឺមានស្ត្រីជិត៧,៧ម៉ឺននាក់។
កន្លងមក យុទ្ធនាការចាក់វ៉ាក់សាំងដូសទី១នៅតំបន់ក្រហម គ្រោងបញ្ចប់នៅថ្ងៃទី១៥ ខែឧសភា ដោយសារតែវ៉ាក់ដែលត្រៀមមានប្រមាណ៤៥ម៉ឺនដូសប៉ុណ្ណោះ។ សម្តេចបានស្នើឲ្យសម្តេចឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ បន្តយុទ្ធនាការ ដោយសារតែកម្ពុជានឹងទទួលាន៥០ម៉ឺនដូសទៀតនៅថ្ងៃទី១១ និង៥០ម៉ឺនដូសទៀតនៅថ្ងៃទី១៥ ខែឧសភា។
បើតាមប្រសាសន៍របស់ប្រមុខរដ្ឋាភិបាល ប្រសិនបើយុទ្ធនាការចាក់វ៉ាក់សាំងដល់ពលរដ្ឋនៅតំបន់ក្រហម បានបញ្ចប់តាមផែនការនោះ ចំនួនពលរដ្ឋកម្ពុជាដែលចាក់វ៉ាក់សាំងបង្ការជំងឺកូវីដ-១៩ នឹងកើនឡើងដល់២០ភាគរយ ក្នុងចំណោមពលរដ្ឋសរុប៕
មតិពីមិត្តអ្នកអាន