ក្រសួងពាណិជ្ជកម្មកំពុងតែមានកិច្ចខិតខំប្រឹងប្រែងក្នុងការបង្កើតមជ្ឈមណ្ឌលពាណិជ្ជកម្មបន្ថែមទៀតនៅក្នុងប្រទេសចិនក្នុងគោលបំណងលើកកម្ពស់ផលិតផលកម្ពុជានិងជំរុញការនាំចេញរបស់កម្ពុជាទៅកាន់ប្រទេសចិន។
 |
| កម្ពុជាគ្រោងបង្កើតមជ្ឈមណ្ឌលពាណិជ្ជកម្មបន្ថែមទៀតនៅក្នុងប្រទេសចិន |
ក្រសួងបានលើកឡើងថាការិយាល័យទំនាក់ទំនងពាណិជ្ជកម្មយ៉ាងតិចណាស់ចំនួន ៥ នឹងត្រូវបានបង្កើតឡើងនៅក្នុងប្រទេសចិន ដោយនាំឲ្យចំនួនមជ្ឈមណ្ឌលពាណិជ្ជកម្មកម្ពុជាកើនដល់ ១១ ទីតាំង ខណៈដែលបច្ចុប្បន្ន ទីតាំងចំនួន ៦ កំពុងដំណើរការ។
គម្រោងនេះត្រូវបានបង្ហាញដោយលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម នៅក្នុងកិច្ចប្រជុំមួយដើម្បីពិនិត្យលទ្ធផលការងារនៅឆ្នាំ ២០២០ និងកំណត់ទិសដៅសម្រាប់ឆ្នាំ ២០២១ ។
លោក ប៉ាន សូរស័ក្តិ ថ្លែងថា៖ «នេះគឺជាការធ្វើសមាហរណកម្មនិងធ្វើពិពិធកម្មទីផ្សារសម្រាប់ផលិតផលរបស់ប្រទេសកម្ពុជា»។
ការសម្រេចចិត្តនេះត្រូវបានធ្វើឡើងបន្ទាប់ពីកិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជានិងចិនត្រូវបានចុះហត្ថលេខាកាលពីចុងឆ្នាំមុន ខណៈដែលមន្ត្រីនៃប្រទេសទាំងពីរមានក្តីសង្ឃឹមខ្ពស់ក្នុងការជំរុញពាណិជ្ជកម្មទៅវិញទៅមក។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានថ្លែងឲ្យដឹងកាលពីម្សិលមិញថាប្រជាជន និងពាណិជ្ជករចិននឹងមានឱកាសកាន់តែច្រើនក្នុងការស្វែងរកព័ត៌មានបន្ថែមអំពីផលិតផលរបស់ប្រទេសកម្ពុជា។
លោកថា៖ «វិនិយោគិន អ្នកជំនួញ និងប្រជាជនចិននឹងមានឱកាសកាន់តែច្រើនដើម្បីស្វែងយល់អំពីផលិតផលរបស់ប្រទេសកម្ពុជាដែលនឹងជួយជំរុញតម្រូវការរបស់ផលិតផលកម្ពុជានៅទីនោះ» ។
លោកឧកញ៉ា លឹម ហេង បន្ថែមថាផែនការនេះគឺស្របទៅនឹងផែនការរបស់សភាពាណិជ្ជកម្មកម្ពុជាដើម្បីបង្កើតទំនាក់ទំនងរបស់ខ្លួននៅក្រៅប្រទេស។
លោកថា៖ «សភាពាណិជ្ជកម្មកម្ពុជា ក៏គ្រោងនឹងបង្កើតការិយាល័យទំនាក់ទំនងពាណិជ្ជកម្មនៅក្នុងប្រទេសដទៃទៀតដើម្បីលើកកម្ពស់ឱកាសវិនិយោគសម្រាប់វិនិយោគិនបរទេសផងដែរ។ ដំបូងយើងគ្រោងនឹងបើកនៅប្រទេសកាណាដា ប៉ុន្តែដោយសារតែការរីករាលដាលនៃជំងឺកូវីដ-១៩ ដំណើរការនេះត្រូវបានរាំងស្ទះ»។
គួរបញ្ជាក់ឲ្យដឹងផងដែរថា ពាណិជ្ជកម្មទ្វេភាគីរវាងកម្ពុជានិងចិនក្នុងឆ្នាំ ២០២០ បានធ្លាក់ចុះ ៥,២ ភាគរយបើប្រៀបធៀបទៅនឹងឆ្នាំកន្លងទៅ៕
khmertimeskh
មតិពីមិត្តអ្នកអាន