រដ្ឋាភិបាលរបស់ប្រធានាធិបតីត្រាំ បានផ្តល់កាំជ្រួចបញ្ជានាំផ្លូវវាយប្រហារចំៗ និងសព្វាវុធដទៃទៀតដើម្បីជួយហ្វីលីពីនប្រយុទ្ធនឹងពួកសកម្មប្រយុទ្ធរដ្ឋអ៊ីស្លាម ហើយបានសន្យាជាថ្មីថានឹងការពារសម្ពន្ធមិត្តរបស់ខ្លួនមួយនេះ បើសិនជារងការវាយប្រហារនៅក្នុងជម្លោះនៅសមុទ្រខាងកើត។
អាម៉េរិកសន្យាការពារហ្វីលីពីនជាថ្មីក្នុងករណីមានជម្លោះនៅសមុទ្រខាងកើត
ទីប្រឹក្សាសន្តិសុខជាតិអាម៉េរិកលោក រ៉ូប៊ឺត អូប្រាយអ៊ឹន បានតំណាងអោយលោកត្រាំ ក្នុងពិធីមួយកាលពីថ្ងៃចន្ទទី២៣វិច្ឆិកានៅក្រសួងការបរទេសក្នុងទីក្រុងម៉ានីលរបស់ហ្វីលីពីន ។នៅទីនោះលោក បានប្រកាសប្រគល់កាំជ្រួចនិងគ្រាប់បែកដល់យោធាហ្វីលីពីន។
រំលឹកថា ក្នុងការសន្ទនាតាមទូរស័ព្ទជាមួយ ប្រធានាធិបតីរ៉ូឌ្រីហ្គោ ឌុយទែត កាលពីខែមេសា លោកត្រាំបានសន្យាផ្តល់កាំជ្រួចតំលៃ១៨លានដុល្លារ។
លោកអូប្រាយអ៊ឹនក៏បានសម្តែងការចូលរួមរំលែកទុក្ខសោកជាមួយហ្វីលីពីនចំពោះការដែលប្រទេសអាស៊ីអាគ្នេយ៍មួយនេះរងគ្រោះដោយខ្យល់ព្យុះបំផ្លិចបំផ្លាញជាបន្តបន្ទាប់ និងបានបង្ហាញការជួយរបស់អាម៉េរិកក្នុងការប្រយុទ្ធជំងឺឆ្លងកូវីដ១៩នៅហ្វីលីពីន។
ក្នុងការថ្លែងពេលប្រគល់កាំជ្រួចអាម៉េរិកនៅក្រុងម៉ានីល លោកអូប្រាយអ៊ន បាននិយាយដល់តួនាទីរបស់រដ្ឋាភិបាលលោកត្រាំនៅក្នុងការជួយកំចាត់ក្រុមរដ្ឋអ៊ីស្លាមនៅមជ្ឈិមបូព៌ា និងការសម្លាប់មេដឹកនាំរបស់ក្រុមនេះកាលពីឆ្នាំមុននៅស៊ីរី ព្រមទាំងបានធ្វើការសន្យាជាថ្មីថានឹងបន្តជួយកំចាត់ពួកសកម្មប្រយុទ្ធពាក់ព័ន្ធនឹងក្រុមរដ្ឋអ៊ីស្លាមនៅហ្វីលីពីនខាងត្បូង។
លោកក៏សង្ឃឹមចំថានឹងបន្តកិច្ចព្រមព្រៀងសន្តិសុខសំខាន់មួយ ដែលអនុញ្ញាតអោយកងកម្លាំងអាម៉េរិក ហ្វឹកហាត់នៅក្នុងសមយុទ្ធប្រយុទ្ធទ្រង់ទ្រាយធំៗ នៅហ្វីលីពីន ហើយថា អាម៉េរិកឈរនៅជាមួយហ្វីលីពីន នៅក្នុងកិច្ចខិតខំការពារសិទ្ធិអធិបតេយ្យភាពរបស់ខ្លួននៅសមុទ្រខាងកើត។
កាលពីខែមុនហ្វីលីពីនបានប្រកាថាខ្លួននឹងបន្តធ្វើអាជីវកម្មប្រេងនិងឧស្ម័ននៅក្នុងឬក្បែរតំបន់Reed Bankនៅឯនាយឆ្នេរខាងលិចរបស់ខ្លួន តែតំបន់នេះក៏ត្រូវចិនអះអាងជាកម្មសិទ្ធិរបស់ខ្លួនដែរ។
លោកអូប្រាយអ៊ន បាននិយាយថា« វាជារបស់ប្រជាជនហ្វីលីពីន។វាមិនជារបស់ប្រទេសណាផ្សេង ដោយសារតែគេធំជាងហ្វីលីពីន ហើយចេះតែអាចទាញយកប្រភពធនធានរបស់ប្រជាជនហ្វីលីពីននោះទេ។វាជាកំហុស»។
លោកបានបន្ទរសេចក្តីថ្លែងការណ៍របស់រដ្ឋមន្ត្រីការបរទេសអាម៉េរិកជាថ្មីដែលថា «ការវាយប្រហារប្រដាប់អាវុធណាមួយលើកងកម្លាំងហ្វីលីពីន ឬលើនាវាសាធារណៈនៅសមុទ្រចិនខាងត្បូង នឹងនាំអោយយើងបំពេញកាតព្វកិច្ចការពារគ្នាទៅវិញទៅមករបស់យើង»។
សូមបញ្ជាក់ថា សម្ពន្ធមិត្តទាំងពីរនេះមានសន្ធិសញ្ញាការពារគ្នាចំណាស់៦៩ឆ្នាំមួយ៕
（សរុបដោយវិច្ឆិកា）
មតិពីមិត្តអ្នកអាន