អតីតរដ្ឋមន្ត្រីការបរទេសអាមេរិក លោក Henry Kissinger បានព្រមានថាជម្លោះប្រដាប់អាវុធរវាង សហរដ្ឋអាមេរិក និងចិន អាចនឹងផ្ទុះឡើងនៅពេលអនាគត បើសិនជាមហាយក្សសេដ្ឋកិច្ចទំាងពីរបរាជ័យក្នុងការ ដោះស្រាយសង្រ្គាមពាណិជ្ជកម្ម នាពេលបច្ចុប្បន្ន។ នេះបើតាមការចេញផ្សាយដោយសារព័ត៌មាន CNA នៅថ្ងៃព្រហស្បតិ៍ ទី២១ ខែវិច្ឆិកា ឆ្នាំ២០១៩។
លោក Henry Kissinger អតីតរដ្ឋមន្ត្រីក្រសួងការរទេសរបស់អាមេរិក និងលោកប្រធានាធិបតីចិន លោក ស៊ី ជីងភីង ក្នុងជំនួបនាពេលកន្លងមក។ (រួបថត AFP)
ការលើកឡើងរបស់លោក Kissinger ដែលជាអ្នកដើរតួនាទីក្នុងការជួយសម្រួលទំនាក់ទំនងការទូតរវាងទីក្រុងវ៉ាស៊ីនតោន និងទីក្រុងប៉េកាំងនោះ បានធ្វើឡើងនៅក្នុងសន្និសីទមួយក្នុងទីក្រុងប៉េកាំងស្តីពីអនាគតរបស់ប្រទេសមហាអំណាចសេដ្ឋកិច្ចទាំង ២។
លោក Kissinger ធ្វើការព្រមានខាងលើនៅឯវេទិកា Bloomberg New Economy Forum នៅថ្ងៃព្រហស្បតិ៍ នេះ ចំពេលដែលកិច្ចព្រមព្រៀងពាណិជ្ជកម្មអាមេរិក-ចិន តំណាក់កាលទី១ កំពុងស្ថិតនៅភាពមិនច្បាស់លាស់។ ថ្លែងនាឱកាសនោះ លោកអតីតប្រមុខការទូតអាមេរិក បានបញ្ជាក់បន្ថែមដូច្នេះថា៖ « បើសិនជាជម្លោះផ្ទុះឡើងមែន នោះវានឹងបង្កការបំផ្លិចបំផ្លាញអាក្រក់ជាងសង្រ្គាមនៅអឺរ៉ុបទៅទៀត...សង្រ្គាមលោកលើកទី១ ផ្ទុះឡើង ដោយសារ វិបត្តិបន្តិចបន្តួច តែបច្ចុប្បន្នប្រទេសនីមួយៗសុទ្ធតែមានអាវុធដ៏មានថាមពលរៀងៗខ្លួន»។
លោកថ្លែងថា៖ «ចិន គឺជាប្រទេសមានសេដ្ឋកិច្ចដ៏ធំមួយ ហើយយើងក៏ដូចគ្នា។ ដូច្នេះយើងទំនងជានឹងជាន់ជើងគ្នាទៅវិញទៅមកនៅជុំវិញពិភពលោក»។
គួរបញ្ជាក់ថា សហរដ្ឋអាមេរិក និងចិន បានជាប់ផុងនៅក្នុងសង្រ្គាមពាណិជ្ជកម្ម ដំឡើងពន្ធដាក់គ្នាទៅវិញទៅមក អស់រយៈពេលជាង១៨ខែ ហើយក្រៅតែពីវិបត្តិនេះ មហាអំណាចទាំងពីរ នៅមានបញ្ហាធំៗជាច្រើនត្រូវដោះស្រាយ ក្នុងនោះមានដូចជា កោះតៃវ៉ាន់ ហុងកុង និងតំបន់សមុទ្រចិនខាងត្បូង ជាទីដែលអ្នកជំនាញយល់ថាអាចនឹងក្លាយជា ចំណុចចាប់ផ្ដើមនៃជម្លោះប្រដាប់អាវុធរវាងប្រទេសទាំងពីរ៕
(សរុបដោយវិច្ឆិកា)
មតិពីមិត្តអ្នកអាន