ចក្រភពអង់គ្លេសកាលពីថ្ងៃសៅរ៍បានប្រកាសពីគោលជំហរជាថ្មី ថាខ្លួននឹងចាត់វិធានការតឹងរ៉ឹងបំផុតប្រឆាំងអ៊ីរ៉ង់ ប្រសិនបើមិនដោះលែងនាវាដឹកប្រេងអង់គ្លេសមួយគ្រឿង ដែលអ៊ីរ៉ង់ឃាត់ទុកកាលពីថ្ងៃសុក្រនៅច្រកសមុទ្រHormuz។ នេះគឺជាការកើនឡើងការប្រឈមមុខដាក់គ្នា នៅផ្លូវទឹកដឹកជញ្ជូនប្រេងដ៏សំខាន់បំផុតមួយរបស់ពិភពលោក។
អង់គ្លេស៖ អ៊ីរ៉ង់ពេលនេះកំពុងដើរលើផ្លូវគ្រោះថ្នាក់ដោយធ្វើរឿងខុសច្បាប់
នាវាដឹកប្រេងរបស់អង់គ្លេសត្រូវបានកងទ័ពបដិវត្ដន៍អ៊ីរ៉ង់ឃាត់ទុក ដែលករណីនេះបច្ចុប្បន្នកំពុងធ្វើឲ្យវិបត្ដិរីកកាន់តែធំរវាងអ៊ីរ៉ង់ជាមួយមហាអំណាចលោកខាងលិច ខណៈទីក្រុងតេរ៉ង់កំពុងព្យាយាមដោះខ្លួនពីឥទ្ធិពលនៃទណ្ឌកម្មសេដ្ឋកិច្ចអាមេរិក និងកំណត់កិច្ចចរចានុយក្លេអែរជាថ្មី។ ប៉ុន្ដែវាអាចធ្វើឲ្យមានការសងសឹកកាន់តែខ្លាំង ចំពោះការឈ្លានពានរបស់អ៊ីរ៉ង់លើអង់គ្លេស ជាប្រទេសមួយក្នុងចំណោមប្រទេសបីនៅអឺរ៉ុប ដែលព្យាយាមរក្សាទុកកិច្ចព្រមព្រៀងនុយក្លេអ៊ែរអ៊ីរ៉ង់ចុះឆ្នាំ២០១៥ ទោះបីអាមេរិកប្រកាសដកខ្លួនចេញ។
រដ្ឋមន្ដ្រីការបរទេសអង់គ្លេសលោក Jeremy Hunt បាននិយាយថា ឧបទ្ទវហេតុនេះបង្ហាញឲ្យឃើញពីសញ្ញាព្រួយបារម្ភ ដែលអ៊ីរ៉ង់អាចជ្រើសរើសផ្លូវគ្រោះថ្នាក់ នៃការធ្វើសកម្មភាពខុសច្បាប់និងបង្កអស្ថិរភាព។ អង់គ្លេសមិនព្រងើយកន្ដើយដាច់ខាត នឹងឆ្លើយតបទៅវិញតាមរយៈវិធានការធ្ងន់ធ្ងរ។ ជុំវិញបញ្ហានេះការិយាល័យកិច្ចការបរទេសអង់គ្លេស បានទាក់ទងទៅមន្ដ្រីទទួលបន្ទុកកិច្ចការបរទេសអ៊ីរ៉ង់ផងដែរកាលពីថ្ងៃសៅរ៍។ ទន្ទឹមគ្នារដ្ឋាភិបាលអង់គ្លេសបានកំណត់ឲ្យកោះប្រជុំបន្ទាន់ជាលើកទីពីរ ដើម្បីពិភាក្សាពីការឆ្លើយតបរបស់ខ្លួន។
ចក្រភពអង់គ្លេសក៏បានព្រមានទៅបណ្ដានាវា ដែលមានទំនាក់ទំនងជាមួយក្រុមហ៊ុនឧស្សាហកម្មដឹកជញ្ជូនអង់គ្លេស ត្រូវចៀសឲ្យឆ្ងាយពីតំបន់កើតហេតុបណ្ដោះអាសន្ន។
បើតាមការបកស្រាយពីអ៊ីរ៉ង់វិញបានឲ្យដឹងថា ការឃាត់នាវារបស់អង់គ្លេសមួយគ្រឿងនោះ ដោយសារតែផ្គើនមិនគោរពច្បាប់ដែនសមុទ្រអន្តរជាតិ នៅពេលឆ្លងកាត់ច្រកសមុទ្រ Hormuz។ អ៊ីរ៉ង់បានចោទនាវាមិនព្រមបិទប្រព័ន្ធ GPS និងមិនអើពើការព្រមានរបស់អ៊ីរ៉ង់ជាដើម។ បន្ទាប់ពីឃាត់ នាវាត្រូវបានគេនាំទៅកាន់កំពង់ផែ Bandar Abbas ដើម្បីស៊ើបអង្កេត។ បើតាមប្រភពព័ត៌មានពីអ៊ីរ៉ង់ ឲ្យដឹងថា មនុស្សនៅលើនាវាចំនួន២៣នាក់គឺមានសុវត្ថិភាព ពុំបានរងនូវការធ្វើទុក្ខបុកម្នេញអ្វីឡើយ។
អង្គការ NATO
នៅថ្ងៃអាទិត្យនេះ អង្គការ NATO បានថ្កោលទោស និងជំរុញឱ្យអ៊ីរ៉ង់ដោះលែងកប៉ាល់ ដឹកប្រេងអង់គ្លេសជាបន្ទាន់ ដោយចោទថាការរឹបអូសនេះគឺជាទង្វើរំលោភលើសេរីភាព នាវាចរអន្តរជាតិ។ នេះបើតាមការចេញផ្សាយដោយសារព័ត៌មាន Sputnik។
នៅក្នុងសេចក្ដីថ្លែងការណ៍ចេញផ្សាយកាលពីថ្ងៃសៅរ៍ (ម៉ោងក្នុងតំបន់) អង្គការ NATO បានសង្កត់ធ្ងន់ដូច្នេះថា៖ «យើងថ្កោលទោសយ៉ាងខ្លាំងចំពោះ ការរឹបអូសកប៉ាល់ពីរគ្រឿង នៅឯច្រកសមុទ្រ Hormuz ពីសំណាក់កងកម្លាំងអ៊ីរ៉ង់...ហើយដែលទង្វើនេះរំលោភបំពាន យ៉ាងធ្ងន់ធ្ងរដល់សេរីភាពនាវាចរអន្តរជាតិ...ដូច្នេះយើងជំរុញឱ្យអ៊ីរ៉ង់ដោះលែងកប៉ាល់ និងនាវិកទំាងនោះជាបន្ទាន់ ហើយយើងគាំទ្រឱ្យមានដំណោះស្រាយមួយតាមផ្លូវការទូត»។
សូមបញ្ជាក់ថា ភាពតានតឹងរវាងអង់គ្លេសនិងអ៊ីរ៉ង់ បានចាប់ផ្តើមកើនឡើងនៅដើមខែនេះ នៅពេលដែលកងទ័ពជើងទឹកអង់គ្លេស បានរឹបអូសនាវារបស់អ៊ីរ៉ង់មួយគ្រឿងឈ្មោះ Grace 1 ដែលសង្ស័យថា បានរំលោភទណ្ឌកម្មរបស់សហភាពអឺរ៉ុប ដឹកប្រេងទៅកាន់ប្រទេសស៊ីរី។ ក្រោយមក អ៊ីរ៉ង់បានប៉ុនប៉ងហាមឃាត់នាវាដឹកប្រេងរបស់អង់គ្លេសវិញ ដែលធ្វើដំណើរកាត់តាមច្រកសមុទ្រ Hormuz ប៉ុន្ដែបានបើកបរចាកចេញវិញ បន្ទាប់ពីការព្រមានរបស់នាវាអង់គ្លេស។ ភ្លាមៗអង់គ្លេសបានជំរុញមិនឲ្យអ៊ីរ៉ង់បង្កបញ្ហានៅក្នុងតំបន់នេះឡើយ។ នៅទីបំផុត នាវាអង់គ្លេសនៅតែគេចមិនផុតពីក្រញ៉ាំដៃអ៊ីរ៉ង់ដដែល៕
（សរុបដោយវិច្ឆិកា）
មតិពីមិត្តអ្នកអាន