យុគសម័យ - នៅថ្ងៃទី ២៥ ខែឧសភា នាយកប្រតិបត្តិនៃកម្មវិធីសុខភាពបន្ទាន់របស់អង្គការសុខភាពពិភពលោក (WHO) លោកវេជ្ជបណ្ឌិត Michael Ryan បានព្រមានថា ទោះបីបណ្តាប្រទេសកំពុងឃើញអំពីការថយចុះនៃជំងឺរាតត្បាត COVID-19 ប៉ុន្តែបណ្ដាប្រទេសនៅតែអាចនឹងប្រឈមមុខនឹង “រលកទី ២ នៃជំងឺរាតត្បាតនេះជាបន្ទាន់” ប្រសិនបើការដកចេញយ៉ាងឆាប់ៗនូវវិធានការណ៍បង្ការទប់ស្កាត់នឹងការផ្ទុះឡើងនៃជំងឺរាតត្បាតនេះ។
បុគ្គលិកពេទ្យមើលថែអ្នកឆ្លងជំងឺរាតត្បាត COVID-19 នៅមន្ទីរពេទ្យមួយក្នុងទីក្រុងមូស្គូ ប្រទេសរុស្ស៊ីនាថ្ងៃទី ១៧ ខែឧសភា ឆ្នាំ ២០២០។
ថ្លែងមតិនៅក្នុងសន្និសីទសារព័ត៌មានតាមអនឡាញ លោក Ryan បានបញ្ជាក់ថា ពិភពលោកនៅតែស្ថិតក្នុងរលកដំបូងនៃការផ្ទុះនៃវីរុស SARS-CoV-2 ។ ទោះបីជាចំនួនករណីមានការថយចុះនៅក្នុងប្រទេសជាច្រើនក៏ដោយក៏ស្ថានភាពនេះកំពុងកើនឡើងនៅតំបន់អាមេរិកកណ្ដាលនិងអាមេរិកខាងត្បូង អាស៊ីខាងត្បូងនិងអាហ្វ្រិក។
យោងតាមលោកវេជ្ជបណ្ឌិត Ryan បានឱ្យដឹងថា បណ្ដាជំងឺរាតត្បាតតែងតែកើតឡើងតាមរលករលក។ ដូច្នេះការផ្ទុះឡើងថ្មីអាចកើតឡើងម្តងទៀតនៅឆ្នាំនេះនៅក្នុងតំបន់ដែលរលកដំបូងបានថយចុះ។ មន្រ្តីអង្គការសុខភាពពិភពលោកបានវាយតម្លៃថា អត្រាឆ្លងក៏នឹងមានឱកាសកើនឡើងម្តងទៀតយ៉ាងឆាប់រហ័ស ប្រសិនបើវិធានការណ៍បង្ការនិងទប់ស្កាត់នឹងរលកដំបូងនៃជំងឺរាតត្បាតត្រូវបានដកចេញយ៉ាងឆាប់ៗនេះ។
លើសពីនេះទៅទៀត លោក Ryan បានបន្ថែមថា បណ្តាប្រទេសនៅអឺរ៉ុបនិងអាមេរិកខាងជើងគួរតែ “បន្តអនុវត្តវិធានការសុខភាពសាធារណៈនិងសង្គម វិធានការឃ្លាំមើល វិធានការសាកល្បងនិងត្រូវមានយុទ្ធសាស្ត្រទូលំទូលាយដើម្បីជំនះជំងឺរាតត្បាតនេះ ជំនួសឱ្យរលកទី ២ នៃការផ្ទុះឡើងនៃជំងឺរាតត្បាត COVID-19៕（បកប្រែដោយសាមេត）
（ប្រភពព័ត៌មាន: baotintuc.vn）
មតិពីមិត្តអ្នកអាន