ប្រធានការិយាល័យចិនប្រចាំនៅហុងកុងនិងម៉ាកាវ បាននិយាយនៅថ្ងៃទី០៧សីហានេះថា ហុងកុងកំពុងប្រឈមនឹងវិបត្ដិអាក្រក់បំផុត ចាប់តាំងពីហុងកុងត្រូវអង់គ្លេសប្រគល់ឲ្យចិនគ្រប់គ្រងវិញក្នុងឆ្នាំ១៩៩៧។ ទីក្រុងពាក់កណ្ដាលស្វយ័តមួយនេះ កំពុងប្រឈមនឹងការតវ៉ាជាច្រើនខែមកហើយ ដែលពេលខ្លះការតវ៉ាមានទាំងអំពើហិង្សាទៀតផង។ ការតវ៉ាផ្ទុះឡើងដោយសារតែក្រុមបាតុករគាំទ្រប្រជាធិបតេយ្យ ប្រឆាំងនឹងសេចក្ដីព្រាងច្បាប់ធ្វើបត្យាប័នជាមួយចិន ហើយបច្ចុប្បន្នកំពុងក្លាយជាបញ្ហាប្រឈមដោយផ្ទាល់សម្រាប់រដ្ឋាភិបាលហុងកុង ស្ថិតក្រោមការដឹកនាំរបស់លោកស្រីខារី ឡាម។
អ្នកតវ៉ាហុងកុង
មន្ដ្រីជាន់ខ្ពស់ចិនប្រចាំនៅហុងកុងបាននិយាយថា វិបត្ដិនៅហុងកុងបានអូសបន្លាយពេលប្រមាណ៦០ថ្ងៃហើយ រីឯអំពើហិង្សាកំពុងរីករាលដាលកាន់តែខ្លាំងជាងមុន ធ្វើឲ្យប៉ះពាល់កាន់តែធ្ងន់ធ្ងរនៅហុងកុង។ ក្នុងនោះមានប៉ះពាល់ដល់ការរស់នៅរបស់ប្រជាជន ប៉ះពាល់សន្ដិសុខ សណ្ដាប់ធ្នាប់សង្គម និងប៉ះពាល់ដល់សេដ្ឋកិច្ច។ ដូច្នេះអាចនិយាយបានថា ហុងកុងសព្វថ្ងៃកំពុងប្រឈមនឹងស្ថានភាពអាក្រក់បំផុត។
អ្នកនាំពាក្យការិយាល័យគោលនយោបាយកំពូលរបស់ចិន ប្រចាំនៅទីក្រុងហុងកុង បានអះអាងថា កម្លាំងប្រឆាំងចិន គឺជាមេក្លោងនៅពីក្រោយឆាក នៃអំពើហិង្សានៅក្នុងទីក្រុងហុងកុង។ ចិនបានប្រាប់ក្រុមបាតុករ កុំឲ្យមើលស្រាលវិធានការដោះស្រាយរបស់រដ្ឋាភិបាលកណ្តាលចិន និងព្រមានដោយប្រៀបធៀប កុំឲ្យក្រុមបាតុករមកលេងជាមួយភ្លើង បើមិនដូច្នេះទេ ពួកគេនឹងទទួលបានភ្លើងត្រឡប់មកវិញ។
កាលពីថ្ងៃចន្ទមេដឹកនាំហុងកុងលោកស្រីខារី ឡាមបានថ្លែងថា ការតវ៉ាដែលកំពុងរីករាលដាលជាអំពើហិង្សាកាន់តែខ្លាំង ពិតជាធ្វើឲ្យប៉ះពាល់យ៉ាងធ្ងន់ធ្ងរដល់ច្បាប់ និងសណ្ដាប់ធ្នាប់ហុងកុង ហើយកំពុងរុញច្រានឲ្យទីក្រុង ធ្លាក់ដល់ស្ថានការណ៍មួយគ្រោះថ្នាក់បំផុត។ នៅក្នុងសុន្ទរកថា លោកស្រីបានចោទប្រកាន់ក្រុមសកម្មជនថា បានប្រើប្រាស់ការតវ៉ាប្រឆាំងនឹងច្បាប់ធ្វើបត្យាប័ន ជាលេស ដើម្បីលាក់បាំងគោលដៅតវ៉ាពិតប្រាកដរបស់ពួកគេ។
ការតវ៉ានៅក្នុងក្រុងហុងកុង បានចាប់ផ្ដើមឡើងកាលពីថ្ងៃទី០៩ខែមិថុនា គិតមកដល់ពេលនេះជិតពីរខែហើយ។ ការតវ៉ាបានឈានដល់ អំពើហិង្សាបណ្ដាលឲ្យមនុស្សរបួសជាច្រើននាក់ និងចាប់ខ្លួនជាច្រើននាក់ទៀត ក្រោមបទចោទថា ប្រព្រឹត្ដអំពើកុបកម្ម។ ដើមហេតុនៃការតវ៉ា ដើម្បីប្រឆាំងនឹងច្បាប់ធ្វើបត្យាប័នជាមួយចិន ដែលហុងកុងគ្រោងអនុម័តកាលពីខែកក្កដា ប៉ុន្ដែសេចក្ដីព្រាងច្បាប់ត្រូវលុបចោលវិញ ក្រោយរដ្ឋាភិបាលរងសម្ពាធខ្លាំងពីក្រុមបាតុករ។ លោកស្រីខារី ឡាម យល់ព្រមដកសេចក្តីព្រាងច្បាប់នោះចេញវិញ ដោយសង្ឃឹមថា ការតវ៉ានឹងស្ងប់ស្ងាត់។ ប៉ុន្តែផ្ទុយទៅវិញក្រុមបាតុករនៅតែប្រមូលផ្តុំគ្នាតវា់ដដែល។ ការតវ៉ាដែលបាននិងកំពុងអូសបន្លាយនេះ បង្ហាញឲ្យឃើញពីការស្រេកឃ្លាននូវ ការថែរក្សាហុងកុង ឲ្យស្ថិតក្រោមការដឹកនាំបែបប្រជាធិបតេយ្យ កាន់តែច្រើនឡើងៗ។
ហុងកុង ជាផ្នែកមួយនៃប្រទេសចិន ដោយស្ថិតក្រោមគោលការណ៍ដឹកនាំបែប ប្រទេសមួយប្រព័ន្ធពីរ។ ហុងកុងមានឯករាជ្យភាពតុលាការ ប្រព័ន្ធសេដ្ឋកិច្ចនិងនីតិប្បញ្ញត្តិរបស់ខ្លួន។ ប៉ុន្តែមនុស្សជាច្រើន មានការព្រួយបារម្ភកាន់តែខ្លាំង អំពីឥទ្ធិពលរបស់ចិនមកលើហុងកុង៕
(សរុបដោយវិច្ឆិកា)
មតិពីមិត្តអ្នកអាន