ប៉ូលិសហុងកុងបានចាប់ខ្លួនបាតុករចំនួន ០៦នាក់កំឡុងបាតុកម្មកាលពីថ្ងៃអាទិត្យ ដែលត្រូវបានបន្តធ្វើឡើង ដើម្បីប្រឆាំងនឹងច្បាប់ស្តីពីការធ្វើបត្យាប័នដ៏ចម្រូងចម្រាសមួយ បើទោះបីជាមានការបន្ទន់ឥរិយាបថពីអភិបាលក្រុងហុងកុងលោកស្រី ខារី ឡាំ (Carrie Lam) យ៉ាងណាក៏ដោយ។ នេះបើតាមការដកស្រង់ការផ្សាយ ចេញពីសារព័ត៌មាន CNA នៅព្រឹកថ្ងៃចន្ទ ទី០៨ ខែកក្កដា ឆ្នាំ២០១៩។
មនុស្សប្រមាណ ២៣០,០០០នាក់ បានដង្ហែរក្បួនបាតុកម្មនៅលើដងផ្លូវកូវលូន (Kowloon)
ប៉ូលិសហុងកុងបានចាប់ខ្លួនមនុស្ស៦នាក់ ក្នុងពេលពួកគេធ្វើបាតុកម្មនៅតំបន់ទេសចរណ៍មួយក្នុងក្រុងកាលពីថ្ងៃអាទិត្យ។ អ្នករៀបចំបាតុកម្មបាននិយាយថា មានមនុស្សប្រមាណ២៣ម៉ឺននាក់បានដើរដង្ហែក្បួននៅលើដងផ្លូវKowloon ឆ្លងកាត់កំពង់ផែឆ្ពោះទៅកាន់មជ្ឈមណ្ឌលសេដ្ឋកិច្ចក្នុងក្រុង។ នេះគឺជាការដង្ហែក្បួនតវ៉ាជាថ្មីមួយទៀត ប្រឆាំងច្បាប់ធ្វើបត្យាប័នជាមួយចិន ជាច្បាប់អនុញ្ញាតឲ្យបញ្ជូនមនុស្សទៅកាត់ទោសនៅប្រទេសចិន។
ការតវ៉ាដំបូងឡើយប្រព្រឹត្ដទៅដោយសន្ដិភាព ប៉ុន្ដែក្រោយមកក៏ផ្ទុះហិង្សាប៉ះទង្គិចជាមួយប៉ូលិស បន្ទាប់ពីពួកគេបានបិទផ្លូវ។ ចំណែកការតវ៉ាកាលពីថ្ងៃទី០១កក្កដាក៏ផ្ទុះអំពើហិង្សាកើតឡើងដែរ ដោយក្រុមបាតុករបាននាំគ្នាវាយកម្ទេចកញ្ចក់វិមានសភាហុងកុង និងសម្រុកចូលទៅកាន់កាប់ក្នុងនោះ មុនពេលពួកគេត្រូវបានប៉ូលិសបណ្ដេញចេញវិញ។
ជុំវិញសេចក្ដីព្រាងច្បាប់ធ្វើបត្យាប័នលោកស្រីខារី ឡាមមេដឹកនាំហុងកុង បានផ្អាកការពិភាក្សាអនុម័តជាបណ្ដោះអាសន្នហើយបន្ទាប់ពីផ្ទុះការតវ៉ាដោយហិង្សា នៅពេលប៉ូលិសបាញ់កាំភ្លើងគ្រាប់ជ័រនិងបាញ់ឧស្ម័នបង្ហូរទឹកភ្នែកបំបែកក្រុមបាតុករ។ ប៉ុន្ដែលោកស្រីមិនយល់ស្របនឹងការស្នើសុំឲ្យលុបច្បាប់នេះចោលទេ ផ្ទុយពីអ្វីដែលក្រុមបាតុករចង់បាន។ បាតុកម្មប្រឆាំងច្បាប់ធ្វើបត្យាប័ន ក៏រួមបញ្ចូលការស្នើសុំឲ្យលោកស្រីចុះចេញពីតំណែងថែមទៀត។
ប៉ូលិសហុងកុងចាប់ខ្លួនបាតុករ៦នាក់ ដែលបានបង្កអំពើហិង្សាកំឡុងការតវ៉ា
ហុងកុងបានស្ថិតក្រោមការគ្រប់គ្រងតាមរូបមន្ដប្រទេសមួយប្រព័ន្ធពីរ ចាប់តាំងពីវិលមកស្ថិតក្រោមការគ្រប់គ្រងរបស់ចិនពីអង់គ្លេសក្នុងឆ្នាំ១៩៩៧។ ប្រព័ន្ធគ្រប់គ្រងនេះអនុញ្ញាតឲ្យហុងកុងដឹកនាំតាមបែបប្រជាធិបតេយ្យ រីឯប្រទេសចិនគ្រប់គ្រងតាមបែបកុម្មុយនីស្ដ។ ហុងកុងមានសិទ្ធិសេរីភាពគ្រប់គ្រាន់ក្នុងការបញ្ចេញមតិ ឬការរិះគន់លើចំណុចអវិជ្ជមានរបស់ថ្នាក់ដឹកនាំ ផ្ទុយពីនៅចិនដែលត្រូវបានរឹតត្បិតមិនឲ្យនិយាយស្ដីដោយសេរីឡើយ។ ដូច្នេះហើយបានជាប្រជាជនហុងកុងមិនពេញចិត្ដនឹងរដ្ឋាភិបាល នៅពេលមានទំនោរទៅរកក្រុងប៉េកាំងម្ដងៗ។ ពួកគេតែងតែនាំគ្នាធ្វើបាតុកម្មប្រឆាំង ដើម្បីបង្ហាញពីការមិនពេញចិត្ដនឹងការលូកដៃរបស់ក្រុងប៉េកាំងមកលើរដ្ឋបាលហុងកុង។
សម្រាប់ច្បាប់ធ្វើបត្យាប័នដែលមេដឹកនាំហុងកុងគ្រោងអនុម័ត ក្រុមអ្នករិះគន់និយាយថាអាចគំរាមកំហែងដល់នីតិរដ្ឋនិងកេរ្ដិ៍ឈ្មោះហុងកុងជាអន្ដរជាតិ ក្នុងនាមជាមជ្ឈមណ្ឌលហិរញ្ញវត្ថុមួយនៅអាស៊ី។ ក្រុមសេដ្ឋីនៅហុងកុងមួយចំនួន ក៏ចាប់ផ្ដើមផ្ទេរទ្រព្យសម្បត្ដិផ្ទាល់ខ្លួនទៅឯនាយសមុទ្ររួចទៅហើយ។ ក្រុមអ្នកវិភាគសេដ្ឋកិច្ចក៏ធ្លាប់លើកឡើងថា ប្រសិនបើភាពចលាចលនៅបន្ដកើតឡើងក្នុងក្រុងហុងកុង ក្រុមហ៊ុនអន្ដរជាតិធំៗនឹងពិចារណាផ្លាស់ប្ដូរទីតាំងទៅកាន់ប្រទេសផ្សេង ពេលនោះនឹងប៉ះពាល់ខ្លាំងសេដ្ឋកិច្ចហុងកុង៕
(យោងតាម vayofm និង freshnews សរុបដោយវិច្ឆិកា)
មតិពីមិត្តអ្នកអាន