យុគសម័យ - ប៉ូលិសអង់គ្លេសកាលពីថ្ងៃទី ១១ ខែមេសា បានចាប់ខ្លួនលោក Julian Assange ស្ថាបនិក Wikileaks នៅឯស្ថានទូតអេក្វាឌ័រ។ Wikileaks បានឲ្យដឹងថា លោក Assange អាចត្រូវបានធ្វើបត្យាប័នទៅកាន់សហរដ្ឋអាមេរិកជាមិនខាន។
លោក Assange នៅពេលត្រូវចាប់ខ្លួន (រូបថតៈ RT)
មេធាវីរបស់លោក Assange - លោកស្រី Jen Robinson បានបញ្ជាក់នៅលើ Twitter ថា លោករូបនេះ ត្រូវបានចាប់ខ្លួនដោយសារតែសំណើធ្វើបត្យាប័នរបស់សហរដ្ឋអាមេរិក។
ចាប់តាំងពីខែមិថុនាឆ្នាំ ២០១២ លោក Assange បានទៅកាន់ស្ថានទូតអេក្វាឌ័រនៅទីក្រុងឡុងដើម្បីចៀសវាងការធ្វើបត្យាប័នទៅប្រទេសស៊ុយអ៊ែត ដែលជាកន្លែង លោកត្រូវកាត់ទោសពីបទរំលោភបំពានផ្លូវភេទ ដែលស្ថាបនិក Wikileaks តែងតែបដិសេធ។ មិនត្រឹមតែប៉ុណ្ណោះ លោក Assange ថែមទាំងមានការភ័យខ្លាចថា លោកនឹងត្រូវបានធ្វើបត្យាប័នដោយរដ្ឋាភិបាលស៊ុយអែតទៅកាន់សហរដ្ឋអាមេរិក ដើម្បីកាត់ទោស បទចោទប្រកាន់ពីការបង្ហើបអាថ៌កំបាំងរបស់អាមេរិក។
គួរបញ្ជាក់ថា លោក Julian Assange គឺជាជនជាតិអូស្ត្រាលី ដែលមានជំនាញខ្ពស់ផ្នែកព័ត៌មានវិទ្យា ព្រមទាំងជាម្ចាស់វែបសាយ WikiLeaks ដ៏ល្បីល្បាញបំផុតនៅលើសកលលោក ដែលមានជំនាញខាងទម្លាយឯកសារសម្ងាត់ នៃបណ្តាមេដឹកនាំនយោបាយ និងពាណិជ្ជកម្មល្បីៗនៅទូទាំងពិភពលោក ក្នុងនោះក៏មានសហរដ្ឋអាមេរិកផងដែរ។
ការទម្លាយរឿងសម្ងាត់របស់រដ្ឋាបាលអាមេរិកកាលពីឆ្នាំ២០១០ បានធ្វើឲ្យទៅក្រុងវ៉ាស៊ីនតោន កៀរគរសម្ព័ន្ធមិត្តដេញតាមចាប់រូបលោកពីប្រទេសមួយទៅប្រទេសមួយ រហូតដល់ខែសីហា ឆ្នាំ២០១២ ទើបលោក Assange អាចគេចផុតការយាយី និងទទួលបានសិទ្ធិជ្រកកោណនៅក្នុងស្ថានទូតអេក្វាឌ័រ ប្រចាំនៅទីក្រុងឡុងដ៍ ប៉ុន្តែសហរដ្ឋអាមេរិកនៅតែព្យាយាមរិះរកគ្រប់វិធីថែមទៀតដើម្បីស្នើសុំបត្យាប័ន បញ្ជូនលោកទៅកាត់ទោសនៅសហរដ្ឋអាមេរិកនៅទីបំផុត៕
（សរុបព័ត៌មាន ដោយ ស្រីព្រេជ）
មតិពីមិត្តអ្នកអាន