យុគសម័យ - ដំណើរទស្សនកិច្ចដោយចៃដន្យរបស់ថ្នាក់ដឹកនាំកូរ៉េខាងជើងលោក Kim Jong un ទៅប្រទេសចិនត្រូវបានចាត់ទុកថា មានគោលបំណងបង្កើនជំហរនៅលើតុចរចា មុនពេលប្រព្រឹត្តទៅកិច្ចប្រជុំកំពូលលើកទីពីរត្រូវបាន គេចចាមអារាមថា គឺជាមួយលោកប្រធានាធិបតីសហរដ្ឋអាមេរិក លោក Donald Trump ផងដែរ។
ដំណើរទស្សនកិច្ចនេះត្រូវបានមជ្ឈដ្ឋានអ្នកវិភាគចាត់ទុកថា ដើម្បីបញ្ចូលផលប្រយោជន៍យុទ្ធសាស្ត្ររវាងកូរ៉េខាងជើងនិងចិន។ (AP)
តាមការចេញផ្សាយដោយទីភ្នាក់ងារសារព័ត៌មានយ៉ុនហាប់ នៅថ្ងៃអង្គារ ទី ៨ ខែមករា ឆ្នាំ២០១៩ ថា នៅក្នុងកិច្ចប្រជុំមួយនៅឯទីក្រុង ប៉េកាំងនៅថ្ងៃអង្គារនេះ ថ្នាក់ដឹកនាំកូរ៉េខាងជើង លោក Kim Jong un និងប្រធានាធិបតីចិន លោក Xi Jinping បានពិភាក្សាគ្នាស្ដីពីជំនួបកំពូលអាមេរិក- កូរ៉េខាងជើង។
យ៉ុនហាប់ផ្អែកលើប្រភពដែលខ្លួនទទួលបាន បានឱ្យដឹងទៀតថា លោក គីម និងលោក ស៊ី បានចូលរួមក្នុងកិច្ចប្រជុំមួយមានរយៈពេលជាង ៤ម៉ោង ហើយមេដឹកនាំទាំងពីរក៏បានជជែកគ្នាផងដែរពីជំនួបរវាង លោក Kim និងប្រធានាធិបតីអាមេរិក លោក Donal Trump ព្រមទាំងការរៀបចំយុទ្ធសាស្ត្រថ្មីៗដើម្បីពង្រឹងទំនាក់ទំនងនៃប្រទេសទំាងពីរ។ ប៉ុន្តែ ទីភ្នាក់ងារសារព័ត៌មានកូរ៉េខាងត្បូងមួយនេះ មិនបានបញ្ជាក់អ្វីលម្អិតទៀតនោះទេ។
ប្រទេសកូរ៉េខាងជើងកាន់តែអះអាងនូវតួនាទីរបស់ចិនក្នុងការដោះស្រាយស្ថានការណ៍ជាប់គាំងនៅលើឧបទ្វីបកូរ៉េ។ (ប្រភព: AP)
គួរបញ្ជាក់ថា លោក គីម ជុងអ៊ុន និងភរិយាគឺលោកស្រី Ri Sol Ju ព្រមទាំងមន្ត្រីជាន់ខ្ពស់កូរ៉េខាងជើងជាច្រើនរូប បានចាកចេញពីទីក្រុងព្យុងយ៉ាង តាមរថភ្លើងពិសេសមួយកាលពីល្ងាចថ្ងៃចន្ទ ហើយបានមកដល់ទីក្រុងប៉េកាំង នៅថ្ងៃអង្គារនេះ ដើម្បីបំពេញទស្សនកិច្ច រយៈពេល៤ថ្ងៃរហូតដល់ថ្ងៃព្រហស្បតិ៍ តបតាមការអញ្ជើញរបស់លោក ស៊ី ជិនពីង។ ម្យ៉ាងវិញទៀត នេះគឺជាដំណើរទស្សនកិច្ចជាលើក ទី៤របស់លោក គីម មកកាន់ប្រទេសចិន ហើយវាត្រូវបានធ្វើឡើងនៅមុនជំនួបក្រោមការរំពឹងទុកជាមួយលោក Donall Trump ដែលធ្លាប់ និយាយថាវាអាចនឹងកើត មានឡើងនៅចុងខែមករា ឬខែកុម្ភៈក្រោយនេះ៕
(សរុបព័ត៌មាន ដោយ មិញ អាញ់)
មតិពីមិត្តអ្នកអាន