យុគសម័យ - ប្រធានាធិបតីអាមេរិក លោក Donald Trump នាថ្ងៃទី១៦ខែកុម្ភៈ បានស្នើយ៉ាងទទូចទៅកាន់ ចក្រភពអង់គ្លេស អាល្លឺម៉ង់ និង បារាំង ព្រមទាំងបណ្តាសម្ព័ន្ធមិត្តឯទៀតៗនៅអឺរ៉ុប ឲ្យទទួលយកនិងកាត់ទោសខ្មាន់កាំភ្លើងចំនួន៨០០នាក់ ជាពលរដ្ឋនៃប្រទេសទាំងអស់ពោលខាងលើ ដែលចូលរួមក្រុមភេរវករ IS រាប់រយនាក់ និងត្រូវចាប់ខ្លួន នៅក្នុងទឹកដីនៃប្រទេសស៊ីរី។
ប្រធានាធិបតីអាមេរិក លោក Donald Trump បានឡើងសម្លេងស្នើឲ្យប្រទេសអឺរ៉ុបទទួលយកនិងកាត់ទោសខ្មាន់កាំភ្លើងរាប់រយនាក់ជាពលរដ្ឋនៃបណ្តាប្រទេសនេះ ដែលចូលរួមក្រុមភេរវករ IS និងត្រូវចាប់ខ្លួននៅទឹកដីប្រទេសស៊ីរី (រូបថតៈ Press TV)
លោក Trump បានបង្ហោះសារនៅលើបណ្តាញសង្គម Twitter ដូច្នេះថា “សហរដ្ឋអាមេរិកសុំស្នើឲ្យចក្រភពអង់គ្លេស អាល្លឺម់ង់ បារាំង រួមទាំងសម្ព័ន្ធមិត្តអឺរ៉ុបឯទៀតៗ ទទួលយកអ្នកប្រយុទ្ធ IS ជាង៨០០នាក់ ដែលយើងចាប់ខ្លួនបាននៅប្រទេសស៊ីរី ហើយកាត់ទោសពួកគេតាមផ្លូវច្បាប់”។ ជាមួយគ្នានេះ លោក Trump បានបញ្ជាក់ថា ទីក្រុងវ៉ាស៊ីនតោនអាចនឹងដោះលែងខ្មាន់កាំភ្លើង IS ទាំងនោះ ប្រសិនបើសម្ព័ន្ធរបស់ខ្លួននៅអឺរ៉ុបបដិសេធចំពោះសំណើនេះ។
គួរជម្រាបថា ការគំរាមកំហែងភេរវកម្ម បានបន្តមានកម្រិតខ្ពស់ក្នុងអំឡុងពេលប៉ុន្មានឆ្នាំកន្លងទៅនេះ ក្នុងតំបន់អឺរ៉ុប ខណៈបណ្តាប្រទេសអឺរ៉ុប បានជួបប្រទះសកម្មភាពវាយប្រហារដោយភេរវកម្មដ៏ប្រល័យមួយចំនួន រួមមានករណីបំផ្ទុះគ្រាប់បែកក្នុងការប្រគុំតន្រ្តីនៅក្នុងទីក្រុង Manchester កាលពីថ្ងៃទី២២ ខែឧសភា ឆ្នាំ២០១៧ ដែលបានផ្តាច់ជីវិតមនុស្ស២៣នាក់ ជាដើម៕
(ដោយ ស្រីព្រេជ)
មតិពីមិត្តអ្នកអាន