យុគសម័យ - នាថ្ងៃទី ១ ខែកក្កដា ទីភ្នាក់ងារសារព័ត៌មានកណ្តាលកូរ៉េខាងជើង (KCNA) បានរាយការណ៍ថា មេដឹកនាំកូរ៉េខាងជើងលោកគីមជុងអ៊ុន និងប្រធានាធិបតីអាមេរិកលោក Donald Trump បានឯកភាពគ្នាចាប់ផ្តើមបន្តធ្វើកិច្ចសន្ទនាឡើងវិញរវាងអាមេរិកនិងកូរ៉េខាងជើងនៅក្នុងជំនួបនៅភូមិសន្តិភាព Panmunjom នាថ្ងៃទី ៣០ ខែមិថុនា។
ជំនួបដោយចៃដន្យរវាងប្រធានាធិបតីអាមេរិក លោក Donald Trump និងមេដឹកនាំកូរ៉េខាងជើង លោក Kim Jong-Un នៅតំបន់គ្មានយោធា DMZ
យោងតាម KCNA បានឲ្យដឹងថា ជំនួបនេះត្រូវបានធ្វើឡើងដោយមិនបានរំពឹងទុកជាមុននោះទេ ហើយយោងទៅតាម "សំណើរបស់ប្រធានាធិបតីអាមេរិកលោក Donald Trump ក្នុងឱកាសនៃដំណើរទស្សនកិច្ចទៅកាន់ប្រទេសកូរ៉េខាងត្បូង។ មេដឹកនាំទាំងពីរអាមេរិកនិងកូរ៉េខាងជើងបានជួយកាត់បន្ថយភាពតានតឹងនៅលើឧបទ្វីបកូរ៉េ ដោយបង្ហាញយល់ចិត្តនិងយល់ថ្លើមចំពោះបញ្ហាទាំងអស់ដែលយកចិត្តទុកដាក់ដូចគ្នា ក៏ដូចជាបញ្ហាគួរអោយព្រួយបារម្ភរបស់គ្នាទៅវិញទៅមកដើម្បីដោះស្រាយរាល់ឧបសគ្គទាំងអស់ ក្នុងគោលបំណងទទួលបានការផ្លាស់ប្តូរជាវិជ្ជមាន និងបញ្ចប់ទំនាក់ទំនងដ៏ងងឺតរវាងប្រទេសទាំងពីរអាមេរិក-កូរ៉េខាងជើង "។
KCNA បានអះអាងទៀតថា មេដឹកនាំកូរ៉េខាងជើងបានសំដែងនូវការ "ពេញចិត្តយ៉ាងខ្លាំងណាស់" លើលទ្ធផលនៃកិច្ចសន្ទនារវាងមេដឹកនាំនៃប្រទេសទាំងពីរ ព្រមទាំង"យល់ព្រមយ៉ាងសកម្មក្នុងការលើកកម្ពស់និងចាប់ផ្តើមបន្តធ្វើការសន្ទនាជាវិជ្ជមានឡើងវិញដើម្បីបង្កើតនូវរបកគំហើញថ្មីមួយនៅក្នុងទំនាក់ទំនងអាមេរិក-កូរ៉េខាងជើង ក៏ដូចជាក្នុងការរលាយអាវុធនុយក្លេអ៊ែរនៅឧបទ្វីបកូរ៉េ និងបង្កើនកិច្ចសហប្រតិបត្តិការយ៉ាងជិតស្និទ្ធថែមទៀតនៃប្រទេសទាំងពីរនាពេលអនាគតទៀតផង "៕
(បកប្រែ ដោយ ហេង វុធ្ធី)
មតិពីមិត្តអ្នកអាន