យុគសម័យ - ឧទ្ធម្ភាគចក្ររបស់ម្ចាស់ក្លឹបបាល់ទាត់ Leicester City គឺលោក Vichai Srivaddhanaprabha បានធ្លាក់ផ្ទុះឆេះ នៅក្រោយការប្រកួត Premier League ជាមួយក្រុម West Ham United នាយប់ថ្ងៃសៅរ៍សប្តាហ៍នេះ នៅក្បែរកីឡដ្ឋាន King Power Stadium ក្នុងប្រទេសអង់គ្លេស។
ម្ចាស់ក្លឹបបាល់ទាត់ Leicester City គឺលោក Vichai Srivaddhanaprabha ត្រូវបានក្លឹបទទួលស្គាល់ថា ត្រូវបាត់បង់ជីវិតនៅក្នុងគ្រោះថ្នាក់ធ្លាក់ឧទ្ធម្ភាគចក្រ នៅក្រោយការប្រកួត Premier League ជាមួយក្រុម West Ham United កាលពីយប់ថ្ងៃសៅរ៍ នៅក្បែរកីឡដ្ឋាន King Power Stadium ក្នុងប្រទេសអង់គ្លេស។
ក្លឹប Leicester City បានប្រកាសនៅក្នុងសេចក្ដីថ្លែងការណ៍របស់ខ្លួនទៀតថា បុគ្គលិកពីរនាក់របស់លោក Srivaddhanaprabha និងពីឡុតម្នាក់ រួមទាំងអ្នកដំណើរម្នាក់ទៀត ក៏បានបាត់បង់ជីវិតនៅក្នុងគ្រោះថ្នាក់ធ្លាក់ឧទ្ធម្ភាគចក្រនេះដែរ។ ក៏ប៉ុន្តែមូលហេតុធ្លាក់នេះ ត្រូវបានគេឱ្យដឹងនៅឡើយទេ ខណៈអាជ្ញាធអះអាងថាអាចនឹងត្រូវចំណាយពេលជាច្រើនថ្ងៃដើម្បីបញ្ចប់ការស៊ើបអង្កេត។
គួរជម្រាបថា លោក Vichai មិនដែលអាក់ខានធ្វើដំណើរទៅចូលរួមរាល់ការប្រកួត នៅពេលក្លឹបរបស់លោកត្រូវធ្វើជាម្ចាស់ផ្ទះឡើយ តាមរយៈឧទ្ធម្ភាគចក្រខាងលើ ហើយជារឿយៗមហាសេដ្ឋីវ័យ៦១ឆ្នាំរូបនេះ តែងឡើងឧទ្ធម្ភាគចក្រ ចេញពីកណ្តាលទីលានបាល់ទាត់ ក្រោយចប់ការប្រកួត ដើម្បីត្រឡប់ទៅវិញ។
បើតាមសាក្សី ប្រមាណជាមួយម៉ោងក្រោយការបញ្ចប់ការប្រកួតរវាង Leicester City និង West Ham ជាមួយលទ្ធផល១-១ ឧទ្ធម្ភាគចក្ររបស់លោក Vichai ត្រូវគេរាយការណ៍ថា បានធ្លាក់នៅកន្លែងចតរថយន្តក្បែរកីឡដ្ឋាន King Power Stadium ដែលជាទឹកដីរបស់ Leicester City ហើយផ្ទុះឆាបឆេះឡើង៕
(សរុបព័ត៌មាន ដោយ ស្រីព្រេជ)
មតិពីមិត្តអ្នកអាន