យុគសម័យ - ក្រុមហ៊ុន Alibaba របស់មហាសេដ្ឋីចិន Jack Ma គ្រោងនឹងបើកវិទ្យាស្ថានបណ្តុះបណ្តាលសហគ្រិនភាពនៅប្រទេសឥណ្ឌូណេស៊ី។ ផែនការនេះ ធ្វើឡើងដើម្បីជួយអភិវឌ្ឍទេពកោល្យសហគ្រិនរបស់ឥណ្ឌូណេស៊ីតាមបែបផែននៃការសេដ្ឋកិច្ចឌីជីថល ឬពាណិជ្ជកម្មអេឡិចត្រូនិក។
ប្រធាន Alibaba លោក Jack Ma (រូបថតៈ Reuters)
រដ្ឋមន្ត្រីឧស្សាហកម្មឥណ្ឌូណេស៊ី Airlangga Hartarto នៅថ្ងៃ១៣ តុលា បានអះអាងថា រដ្ឋាភិបាលក្រុងហ្សាការតា កំពុងតែទន្ទឹងរង់ចាំគម្រោងធំៗ របស់លោក Jack Ma ក្នុងការបើកវិទ្យាស្ថានមួយដើម្បីបណ្តុះបណ្តាលជំនាញ និងទេពកោសល្យដល់សហគ្រិនភាពដែលពាក់ព័ន្ធនឹងវិស័យសេដ្ឋកិច្ចឌីជីថលនៅឥណ្ឌូណេស៊ី។
រដ្ឋមន្ត្រីឧស្សាហកម្មរូបនេះបានឲ្យដឹងថែមទៀតថា គម្រោងនេះ ត្រូវបានបង្ហើបឲ្យដឹងតាមរយៈជំនួបរវាងមន្ត្រីជាន់ខ្ពស់រដ្ឋាភិបាលឥណ្ឌូណេស៊ី និងលោក Jack Ma នៅក្រៅកិច្ចប្រជុំប្រចាំឆ្នាំរបស់មូលនិធិរូបិយវត្ថុអន្តរជាតិ (IMF) ដែលជាកន្លែងភាគីទាំងពីរ បានទទួលស្គាល់ថា ដើម្បីអនុវត្តសេដ្ឋកិច្ចឌីជីថលបាន ឥណ្ឌូណេស៊ី ត្រូវការកម្មករជំនាញរហូតដល់១១លានត្រឹមឆ្នាំ២០៣០។
(រូបថតៈ Reuters)
ជុំវិញផែនការនេះ លោក Jack Ma បានអះអាងថា លោក មានផែនការក្នុងការបណ្តុះបណ្តាលមេដឹកនាំផ្នែកបច្ចេកវិទ្យា១០០០នាក់ ជារៀងរាល់ឆ្នាំ។ លោក បញ្ជាក់ថា ក្រុមហ៊ុនរបស់លោក កំពុងតែផ្តល់ឱកាសជាច្រើនដល់ប្រជាជនវ័យក្មេងរបស់ឥណ្ឌូណេស៊ីដើម្បីរៀនសូត្រពីសេដ្ឋកិច្ចឌីជីថល។
លោក បន្ថែមថា វា ជារឿងសំខាន់ណាស់សម្រាប់ឥណ្ឌូណេស៊ី ក្នុងការវិនិយោគលើធនធាមនុស្ស ដ្បិត យុគសម័យឌីជីថល ឬសេដ្ឋកិច្ចឌីជីថល អាចដំណើរការទៅបាន លុះត្រា ការគិតរបស់ប្រជាជនផ្លាស់ប្តូរ ហើយជំនាញរបស់ពួកគេ មានភាពល្អប្រសើរ។ ខណៈសន្យាជួយឲ្យធុរកិច្ចតាមតំបន់ឥណ្ឌូណេស៊ីរីកលូតលាស់ លោក ថ្លែងថា ក្រុមហ៊ុនរបស់លោក នឹងបន្តវិនិយោគមិនត្រឹមតែលើវិស័យពាណិជ្ជកម្មអេឡិចត្រូនិក ( e-commerce) ប៉ុណ្ណោះនោះទេ តែរាប់បញ្ចូលទាំងផ្នែកភស្តុភារ និងហេដ្ឋារចនាសម្ព័ន្ធជាដើមផងដែរ៕
（សរុបព័ត៌មាន ដោយ ស្រីព្រេជ）
មតិពីមិត្តអ្នកអាន