កូរ៉េខាងជើងប្រហែលជាបាន ធ្វើតេស្តមីស៊ីលបាញ់ផ្លោងឆ្លងទ្វីប ចេញពីនាវាមុជទឹក នៅក្នុងសមុទ្រនាព្រឹកថ្ងៃទី២ខែតុលាឆ្នាំ២០១៩នេះ។ នេះបើយោងទៅតាមមន្ត្រីកូរ៉េខាងត្បូងបាននិយាយ។ មីស៊ីលបានបាញ់ចេញពីតំបន់ក្បែរកំពង់ផែ Wonsan ស្ថិតនៅក្នុងខេត្ត Kangwon នៃប្រទេសកូរ៉េខាងជើង នៅម៉ោងជាង៧ព្រឹក។ មីស៊ីលបានហោះចម្ងាយប្រហែល៤៥០គីឡូម៉ែត្រ និងកម្ពស់៩១០គីឡូម៉ែត្រ មុនពេលធ្លាក់ទៅក្នុងសមុទ្រជប៉ុន។ អាជ្ញាធរបានរាយការណ៍ថា មីស៊ីលចំនួន ២ ត្រូវបានបាញ់បង្ហោះ ដោយនៅក្នុងនោះយ៉ាងហោចណាស់ មានមីស៊ីលមួយ បានធ្លាក់ចូលក្នុងដែនទឹករបស់ជប៉ុន។
មន្ត្រីកូរ៉េខាងត្បូង៖កូរ៉េខាងជើងប្រហែលជាបានធ្វើតេស្តមីស៊ីលពីនាវាមុជទឹក។
ប្រទេសកូរ៉េខាងជើងបាននិយាយថា ការសាកល្បងអាវុធចុងក្រោយបំផុតរបស់ខ្លួនគឺមីស៊ីលផ្លោងដែលបាញ់ចេញពីនាវាមុជទឹក (SLBM) ដែលនេះកត់សម្គាល់ជាដំណាក់កាលថ្មីមួយនៅក្នុងសមត្ថភាពការពាររបស់ខ្លួនពោលត្រឹមតែប៉ុន្មានថ្ងៃប៉ុណ្ណោះមុនការចាប់ផ្តើមកិច្ចចរចានុយក្លេអ៊ែរដែលជាប់គាំងជាមួយសហរដ្ឋអាមេរិកឡើងវិញ។
ក្រុមអ្នកវិភាគបាននិយាយថា ការសាកល្បងនេះគឺជាការបង្កហេតុខ្លាំងបំផុតចាប់តាំងពីទីក្រុងព្យុងយ៉ាងបានចាប់ផ្តើមកិច្ចសន្ទនាលើកដំបូងជាមួយទីក្រុងវ៉ាស៊ីនតោនក្នុងឆ្នាំ២០១៨ហើយបានកត់សម្គាល់ជាជំហានដ៏សំខាន់មួយនៅក្នុងកម្មវិធីអាវុធនុយក្លេអ៊ែររបស់កូរ៉េខាងជើង។
សមត្ថភាពមីស៊ីលដែលបាញ់ចេញពីនាវាមុជទឹកនឹងនាំយកឃ្លាំងអាវុធរបស់កូរ៉េខាងជើងទៅកាន់កម្រិតថ្មីមួយដែលអនុញ្ញាតឲ្យមានការដាក់ពង្រាយទៅឆ្ងាយពីឧបទ្វីបកូរ៉េនិងសមត្ថភាពវាយប្រហារទី២ក្នុងករណីមានការវាយប្រហារលើមូលដ្ឋានយោធារបស់ខ្លួន។
ទីភ្នាក់ងារព័ត៌មានកណ្តាលកូរ៉េ (KCNA) បានរាយការណ៍ថា មីស៊ីលផ្លោងប្រភេទថ្មីនេះត្រូវបានបាញ់ក្នុងលក្ខណៈបញ្ឈរកាលពីថ្ងៃពុធនៅឯដែនទឹកជិតឆ្នេរសមុទ្រ Wonsan។ KCNA បានកំណត់អត្តសញ្ញាណអាវុធនោះថាជា Pukguksong-3។
សេចក្តីរាយការណ៍បានបន្ថែមថា “ការបាញ់សាកល្បង SLBM ប្រភេទថ្មីដែលទទួលបានជោគជ័យនេះគឺមានសារសំខាន់ខ្លាំងណាស់ព្រោះវាបានឈានចូលដំណាក់កាលថ្មីមួយដើម្បីទប់ស្កាត់ការគំរាមកំហែងរបស់កងកម្លាំងខាងក្រៅ”។
មេដឹកនាំកូរ៉េខាងជើងលោកគីមជុងអ៊ុនបានផ្ញើសារអបអរសាទរដ៏កក់ក្តៅដល់អង្គភាពស្រាវជ្រាវដែលពាក់ព័ន្ធនឹងការបាញ់បង្ហោះនេះ។
ទីក្រុងតូក្យូបាននិយាយថា ផ្នែកមួយនៃមីស៊ីលកាលពីថ្ងៃពុធបានធ្លាក់នៅក្នុងដែនទឹកនៃតំបន់សេដ្ឋកិច្ចផ្តាច់មុខរបស់ប្រទេសជប៉ុនដែលមានចម្ងាយ២០០គីឡូម៉ែត្រជុំវិញទឹកដីជប៉ុន៕
（សរុបដោយវិច្ឆិកា）
មតិពីមិត្តអ្នកអាន