ភាពរាំងស្ងួត ខ្យល់ព្យុះ និងជំនន់ទឹកភ្លៀង ដែលបណ្តាលមកពីការប្រែប្រួលអាកាសធាតុ បានប៉ះទង្គិចយ៉ាងខ្លាំងដល់ជីវភាពប្រចាំថ្ងៃ។ ផែនការសកម្មភាព ឆ្លើយតបជាបន្ទាន់ ដើម្បើទប់ទល់ និងបន្សាំទៅនឹងការប្រែប្រួលអាកាសធាតុនេះ។ ការប្រែប្រួលអាកាសធាតុ ជាលទ្ធផលនៃការកើនសីតុណ្ហភាព លើភពផែនដី ដែលបណ្តាលមកពីការបំភាយហួសប្រមាណ នូវឧស្ម័នផ្ទះកញ្ចក់
ផលិតថាមពលថ្មីមកពីកម្លាំងខ្យល់។ (រូបថត៖ freshnewsasia)
ដូច្នេះ កំពូលមហាសេដ្ឋីអាមេរិកដែលជាម្ចាស់ក្រុមហ៊ុន Amazon លោក ចេហ្វ បេហ្សូស (Jeff Bezos) បានសន្យាថា លោកនឹងបរិច្ចាគប្រាក់ ១០ពាន់លានដុល្លារ ដើម្បីឧបត្ថម្ភដល់ក្រុមអ្នកវិទ្យាសាស្ត្រ ក្រុមសកម្មជន ក្រុមមិនគិតប្រយោជន៍ និងក្រុមការងារផ្សេងៗទៀត ដែលមានតួនាទីប្រយុទ្ធប្រឆាំងការបំផ្លាញបរិស្ថាន និងការប្រែប្រួលបរិយាកាសភពផែនដី។
លោក Bezos ក្នុងនាមជាបុរសដ៏មានបំផុតមួយនៅលើពិភពលោក និងប្រចាំសហរដ្ឋអាមេរិក គឺស្ថិតនៅក្នុងចំណោមកំពូលមហាសេដ្ឋីដទៃៗទៀត ដែលបានធ្វើការបរិច្ចាគប្រាក់ ក្នុងការជួយដល់អន្តរជាតិ ក្នុងការទប់ស្កាត់ការកើនឡើងកម្តៅសកល ដែលជាបញ្ហាសម្រាប់មនុស្សជាតិគ្រប់រូបលើភពផែនដី។
កំពូលមហាសេដ្ឋីអាមេរិកដែលជាម្ចាស់ក្រុមហ៊ុន Amazon លោក ចេហ្វ បេហ្សូស (Jeff Bezos)។ (រូបថត៖ freshnewsasia)
តាមរយៈសារបង្ហោះលើ Instagram លោក Bezos បានលើកឡើងយ៉ាងដូច្នេះថា «ការប្រែប្រួលអាកាសធាតុ គឺជាការគំរាមកំហែងធំធេងបំផុតចំពោះភពយើង។ ខ្ញុំចង់ចូលរួមជាមួយគ្រប់គ្នា ដើម្បីជម្រុញមធ្យោបាយដោះស្រាយបញ្ហានានាដែលមានស្រាប់ និងបន្តស្រាវជ្រាវរកវិធីសាស្ត្រថ្មីៗទៀត ក្នុងការប្រយុទ្ធប្រឆាំង ទៅនឹងបញ្ហាបម្រែបម្រួលធាតុអាកាស នៅភពដែលយើងគ្រប់គ្នាកំពុងរស់នៅ»។
គួរបញ្ជាក់ថា ជំនួយរបស់លោក Bezos ប្រមាណ ១០ពាន់លានដុល្លារខាងលើនេះ នឹងត្រូវយកទៅចាត់ចែងនៅអំឡុងរដូវក្តៅឆ្នាំ២០២០ នេះតែម្តង។ អង្គភាពដែលនឹងទទួលបាន ជំនួយខាងលើនេះមានដូចជា ទីភ្នាក់ងាររដ្ឋាភិបាល និងអង្គការនានាដែលបម្រើការងារឲ្យកិច្ចគាំពារបរិស្ថាន និងប្រយុទ្ធតស៊ូទៅនឹងការប្រែប្រួលបរិយាកាសផែនដី។ កន្លងមកនេះ កំពូលមហាសេដ្ឋីអាមេរិកដូចជា ប៊ីល ហ្គេតស៍ (Bill Gates), ម៉ៃឃើល ប្លូមប៊ឺក (Michael Bloomberg) និង ថម ស្ទែយើ (Tom Steyer) សុទ្ធតែបានធ្វើការបរិច្ចាគថវិការៀងៗខ្លួន នៅក្នុងគោលដៅដូចគ្នា៕
（បូកសរុបដោយឌីណា）
មតិពីមិត្តអ្នកអាន