យុគសម័យ - គណកម្មាធិការរង្វាន់ Nobel ណ័រវេសបានប្រកាសនាថ្ងៃទី៥ខែតុលាថា ជ័យលាភីរង្វាន់ Nobel សន្តិភាពបានប្រគល់ដល់លោក Denis Mukwege និង Nadia Murad សម្រាប់កិច្ចខិតខំប្រឹងប្រែងដើម្បីបញ្ចប់អំពើហិង្សាផ្លូវភេទ។
Nadia Murad (ខាងឆ្វេង) និង Denis Mukwege ដែលជាម្ចាស់ជ័យលាភីណូបែលសន្តិភាពឆ្នាំ២០១៨ (រូបថតៈ Reuters )
រង្វាន់ Nobel សន្តិភាពឆ្នាំ២០១៨នេះ ត្រូវបានផ្ដល់ជូនមនុស្សពីរនាក់ គឺ Nadia Murad ជាសកម្មជនសិទ្ធិមនុស្សជនជាតិYazidi ដែលនៅរស់រានពីអំពើទាសភាពផ្លូវភេទ ប្រព្រឹត្តដោយពួករដ្ឋឥស្លាមក្នុងប្រទេសអ៊ីរ៉ាក់។ ជ័យលាភីម្នាក់ទៀតបានទៅ Denis Mukwege ជាវេជ្ជបណ្ឌិតខាងរាងកាយស្ត្រី ដែលធ្វើការក្នុងមន្ទីរពេទ្យមួយក្នុងសាធារណរដ្ឋកុងហ្គោ ដោយបានព្យាបាលជនរងគ្រោះដោយការរំលោភសេពសន្ថវៈនិងអំពើហិង្សាផ្លូវភេទផ្សេងទៀតជាង៥ម៉ឺននាក់។
គណៈកម្មាធិការរង្វាន់ Nobel ក្នុងប្រទេសន័រវែស បានលើកឡើងក្នុងសេចក្ដីថ្លែងការណ៍មួយ ដោយទទួលស្គាល់ “ការខំប្រឹងប្រែងរបស់អ្នកទាំងពីរ ក្នុងការបញ្ចប់ការប្រើប្រាស់អំពើហិង្សាផ្លូវភេទ ជាអាវុធនៃសង្គ្រាមនិងជម្លោះប្រដាប់អាវុធ”។
លោកវេជ្ជបណ្ឌិត Mukwege អាយុ៦៣ឆ្នាំ គ្រប់គ្រងមន្ទីរពេទ្យ Panzi នៅប៉ែកខាងកើតសាធារណរដ្ឋប្រជាធិបតេយ្យកុងហ្គោ ជាតំបន់ដ៏គ្រោះថ្នាក់។ លោកវេជ្ជបណ្ឌិតរូបនេះ និងបុគ្គលិកផ្សេងទៀតក្នុងមន្ទីរពេទ្យនេះ បានព្យាបាលឬធ្វើការវះកាត់ទៅលើសរីរាង្គកាយស្ត្រីរាប់ពាន់នាក់ ដែលបានរងរបួសក្នុងអំពើរំលោភសេពសន្ថវៈនិងរំលោភបំពារបំពានផ្លូវភេទតាមរូបភាពផ្សេងៗទៀត ក្នុងអំឡុងសង្គ្រាមស៊ីវិលនៅប្រទេសកុងហ្គោ។
ជ័យលាភី Nobel សន្តិភាពម្នាក់ទៀតនៅឆ្នាំនេះ គឺ Nadia Murad អាយុ២៥ឆ្នាំ ជាស្ថាបនិកនៃអង្គការ គំនិតផ្ដួចផ្ដើមរបស់ Nadia (Nadia's Initiative )។
Murad គឺជា១ក្នុងចំណោមស្រ្តីនិងក្មេងស្រីប្រហែល 3.000 នាក់ដែលរងគ្រោះពីការចាប់រំលោភនិងការរំលោភបំពានផ្សេងៗទៀត ដែលពួកឧទ្ទាមរដ្ឋឥស្លាមស្វ័យប្រកាស (IS) បណ្តាលឡើង។
Murad ក៏ជាសហម្ចាស់នៃរង្វាន់ Sakharov ដ៏មានកិត្យានុភាពអំពីសិទ្ធិមនុស្សដោយសហភាពអឺរ៉ុបប្រគល់ជូននៅក្នុងឆ្នាំ ២០១៦ ។ ក្នុងឆ្នាំដដែលនោះ នាងបានឈ្នះពានរង្វាន់ Vaclav Havel របស់គណៈកម្មការអឺរ៉ុបសម្រាប់សិទ្ធិមនុស្សទៀតផងដែរ៕
(សរុបព័ត៌មាន ដោយ ស្រីព្រេជ)
មតិពីមិត្តអ្នកអាន