ការឆ្លងរាលដាលជំងឺកូវីដ១៩ជាសកលបានធ្វើឱ្យប្រជាជនឥណ្ឌូនេស៊ីរាប់លាននាក់កំពុងតស៊ូរកស្បៀងហារ។ ឥឡូវនេះក្រុមអាជ្ញាធរកំពុងដាក់ដំឡើងម៉ាស៊ីនអង្ករ ATM ដើម្បីធានាដល់ការប្រើប្រាស់កាន់តែច្រើនសម្រាប់ពួកអ្នកដែល ត្រូវការស្បៀងអាហារចាំបាច់។
ម៉ាស៊ីនអង្ករATMជាផ្នែកមួយនៃគំនិតផ្តួចផ្តើមរបស់រដ្ឋាភិបាលឥណ្ឌូនេស៊ីក្នុងការជួយដល់អ្នកដែលរងផលប៉ះពាល់ខ្លាំងពីការផ្ទុះឡើងនៃវីរុសកូវីដ១៩។ (រូបថត៖ Thmey thmey.com)
សូមរំលឹកថា សហគ្រិនវៀតណាម បានបង្កើតម៉ាស៊ីនចែកអង្ករ ដើម្បីផ្តល់អង្ករដោយឥតគិតថ្លៃដល់ប្រជាជនក្រីក្រ និងជនគ្មានការងារធ្វើ ក្នុងអំឡុងពេលបិទប្រទេស ក្នុងគោលបំណងប្រយុទ្ធប្រឆាំងជាមួយជំងឺរលាកសួត ដែលបង្កដោយកូរ៉ូណាវីរុស (COVID-19)។
លោក Hoang Tuan Anh អ្នកជំនួញវៀតណាមម្នាក់ បានបង្កើតម៉ាស៊ីននេះឡើង ដើម្បីជួយអ្នកគ្មានការងារធ្វើ និងប្រជាជនក្រីក្រ ដែលកំពុងតែរងគ្រោះដោយសារ COVID-19 និងក្នុងអំឡុងពេលរឹតត្បិតរបស់រដ្ឋាភិបាល។
ក្នុងខែនេះ នាងលីនដា សាយហ្វ្រី ជាម្តាយដែលមានអាយុ ២៨ ឆ្នាំបានស្ថិតក្នុងចំណោមមនុស្សជាច្រើនដែលបានឈរដោយពាក់ម៉ាស់នៅមូលដ្ឋានយោធាមួយនៅខាងក្រៅទីក្រុងហ្សាការតា ដើម្បីចាំទទួលអង្ករ ១,៥ គីឡូក្រាម ។
ស្ត្រីនេះនិងប្តីរបស់នាង ដែលត្រូវបានផ្អាកពីការងារនៅក្រុមហ៊ុនមួយ បាននិយាយថា” ទោះបីជាអំណោយអង្ករនេះវាមិនច្រើន ប៉ុន្តែ វាអាចជួយក្នុងស្ថានភាពបែបនេះបានដែរ”។
ម៉ាស៊ីនអង្ករ ATM មួយក្នុងចំណោមម៉ាស៊ីនអង្ករបែបនេះចំនួន១០នៅក្នុងនិងក្រៅទីក្រុងហ្សាការតាជាផ្នែកមួយនៃគំនិតផ្តួចផ្តើមរបស់រដ្ឋាភិបាលក្នុងការជួយដល់អ្នកដែលរងផលប៉ះពាល់ខ្លាំងពីការផ្ទុះឡើងនៃវីរុសកូវីដ១៩ដែលបានបណ្តាលឱ្យមនុស្សរាប់លាននាក់បាត់បង់ការងាររបស់ពួកគេនៅក្នុងប្រទេសដែលមានសេដ្ឋកិច្ចធំជាងគេនៅអាស៊ីអាគ្នេយ៍មួយនេះ។
លោកអ៊ីប្រាហ៊ីម មន្ត្រីយោធាដែលគ្រប់គ្រងការចែកអង្ករនេះ បាននិយាយថា” ក្នុងមួយថ្ងៃៗយើងរៀបចំអង្ករចំនួន១,៥ តោនសម្រាប់ប្រជាជនប្រហែល ១.០០០ នាក់ ។ យើងនឹងបន្តចែកបែបនេះជារៀងរាល់ថ្ងៃ ដោយគ្មានការសម្រាកសូម្បីតែនៅថ្ងៃចុងសប្តាហ៍ក៏ដោយ យើងនឹងចែកចាយមិនឈប់ទេ” ។
ប្រទេសឥណ្ឌូនេស៊ីបានប្រកាសកញ្ចប់ថវិកាជំនួយចំនួន ២៥ ពាន់លានដុល្លារកាលពីខែមីនាដើម្បីឆ្លើយតបនឹងការផ្ទុះឡើងនៃជំងឺឆ្លងនេះដោយសន្យាផ្តល់សេវាសុខុមាលភាពសង្គមដល់១០លានគ្រួសារដោយរួមទាំងជំនួយស្បៀងអាហារនិងបញ្ចុះថ្លៃពន្ធអគ្គិសនី។
ប្រទេសឥណ្ឌូនេស៊ី មានករណីឆ្លងវីរុសសរុប១៤.៧៤៩ នាក់ចាប់តាំងពីដើមខែមីនា ដោយមានអ្នកស្លាប់ដោយសារវីរុសនេះចំនួន១.០០៧នាក់ ដែលជាចំនួនអ្នកស្លាប់ខ្ពស់បំផុតនៅអាស៊ីបូព៌ានៅក្រៅប្រទេសចិន./.
(បូកសរុបដោយឌីណា)
មតិពីមិត្តអ្នកអាន