ក្រុមហ៊ុន General Motors (GM) នឹងប្ដឹងក្រុមហ៊ុន Fiat Chrysler Automobiles (FCA) ដោយចោទប្រកាន់ដៃគូប្រកួតប្រជែងរបស់ខ្លួននេះពីបទសូកប៉ាន់មន្ដ្រីសហជីពរថយន្តដែលបានផ្ដល់ឲ្យក្រុមហ៊ុន FCA នូវអត្ថប្រយោជន៍មិនស្មើភាពនៅក្នុងការចរចាការងារ។ នេះបើយោងតាមក្រុមហ៊ុន GM បានប្រកាសកាលពីថ្ងៃពុធ។
ឡូហ្គោរបស់ក្រុមហ៊ុន FCA ក្នុងរោងចក្រនៅប្រទេសអ៊ីតាលី។ (រូបថត AFP)
បណ្ដឹងនេះយោងទៅតាមការសារភាពកំហុសដោយអតីតមន្ដ្រី FCA ដែលបានសូកប៉ាន់អតីតមន្ដ្រីសហជីពការងារ UAW នៅក្នុងរឿងក្ដីរយៈពេលវែងដែលពាក់ព័ន្ធនឹងកម្មវិធីបណ្ដុះបណ្ដាលបុគ្គលិក UAW ហើយធ្វើឲ្យខូចមុខមាត់សហជីពនេះ។
បណ្ដឹងនេះបានធ្វើឡើងរយៈពេលប៉ុន្មានសប្ដាហ៍ប៉ុណ្ណោះ បន្ទាប់ពី UAW បញ្ចប់ការធ្វើកូដកម្មរយៈពេលវែងក្នុងក្រុមហ៊ុន GM។ សហជីពនេះបច្ចុប្បន្នបានជាប់ពាក់ព័ន្ធយ៉ាងជ្រៅក្នុងការចរចាការងារជាមួយ FCA ដែលជាក្រុមហ៊ុនចុងក្រោយមួយក្នុងចំណោម «ក្រុមហ៊ុនរថយន្តធំជាងគេទាំង ៣» នៅក្នុងទីក្រុង Detroit ដែលត្រូវចរចា បន្ទាប់ពីកម្មករបានផ្ដល់អនុម័តកិច្ចព្រមព្រៀងជាមួយក្រុមហ៊ុន GM និង Ford។
ក្រុមហ៊ុន GM បានឲ្យដឹងនៅក្នុងសេចក្ដីប្រកាសព័ត៌មានរបស់ខ្លួនថា៖ «FCA គឺជាអ្នកផ្តល់ការឧបត្ថម្ភយ៉ាងដ៏ច្បាស់ដល់ការធ្វើខុសជាទូទៅ ដោយចំណាយប្រាក់រាប់លានដុល្លារក្នុងការសូកប៉ាន់ដើម្បីទទួលបានអត្ថប្រយោជន៍សម្បទាន និងប្រយោជន៍ក្នុងការចរចា ការអនុវត្ត និងរដ្ឋបាលនៃកិច្ចព្រមព្រៀងការងារនៅពេលណាមួយ»។
ក្រុមហ៊ុន GM ចោទប្រកាន់វិធានការរបស់ «ក្រុមហ៊ុន FCA ថាធ្វើឲ្យខូចដល់ការអនុវត្តកិច្ចព្រមព្រៀងចរចារួមនៅឆ្នាំ ២០០៩» ព្រមទាំង «ការចរចា ការអនុវត្ត និងរដ្ឋបាលនៃកិច្ចព្រមព្រៀងនៅក្នុងឆ្នាំ ២០១១ និងឆ្នាំ ២០១៥»។
FCA បានច្រានចោលបណ្ដឹងនេះថា «គ្មានអង្គសេចក្តី» និងបានឲ្យដឹងថា ជាការធ្វើឡើងដើម្បីរំខានដល់គម្រោងច្របាច់បញ្ចូលគ្នារបស់ក្រុមហ៊ុនជាមួយក្រុមហ៊ុន PSA ដែលជាក្រុមហ៊ុនផលិតរថយន្តរបស់បារាំង ព្រមទាំងការចរចាដែលកំពុងដំណើរការជាមួយ UAW៕
(ប្រភព៖ postkhmer)
មតិពីមិត្តអ្នកអាន