អ្នកជំនាញអន្តរជាតិមួយក្រុម មកពីអង្គការសុខភាពពិភលោក WHO ដែលទទួលបន្ទុកស៊ើបអង្កេតពីប្រភពដើមនៃវីរុសកូរ៉ូណា COVID-19 នឹងធ្វើដំណើរតាមជើងហោះហើរចេញពីប្រទេសសិង្ហបុរី ទៅដល់ទីក្រុងវូហាន ប្រទេសចិន នៅថ្ងៃព្រហស្បតិ៍សប្ដាហ៍នេះ។ នេះបើតាមមន្ត្រីចិនម្នាក់ ដកស្រង់ចេញផ្សាយដោយទីភ្នាក់ងារព័ត៌មានចិនស៊ីនហួ នៅថ្ងៃអង្គារ ទី១២ ខែមករា ឆ្នាំ២០២១។
ប៉ូលីសដែលឈរជើងនៅខាងក្រៅផ្សារហៃណានដែលពាក់ព័ន្ធនឹងការផ្ទុះជំងឺកូវីដ១៩នៅទីក្រុងវូហានប្រទេសចិននៅខែមករាឆ្នាំ ២០២០ (ប្រភព៖ Reuters)
អ្នកនាំពាក្យក្រសួងការបរទេសចិន លោក Zhao Lijian បានគូសបញ្ជាក់យ៉ាងខ្លី ដូច្នេះថា៖ «បើតាមគម្រោងបច្ចុប្បន្ន ពួកគេ (ក្រុមអ្នកជំនាញអង្គការសុខភាពពិភលោក WHO) នឹងធ្វើដំណើរតាមជើងហោះហើរចេញពីប្រទេសសិង្ហបុរី ទៅដល់ទីក្រុងវូហាន នៅថ្ងៃទី១៤ ខែមករានេះ»។ ប៉ុន្តែ លោក Zhao Lijian មិនបានឆ្លើយតបទៅនឹងសំនួរថា តើក្រុមអ្នកជំនាញ WHO នឹងត្រូវធ្វើចត្តាឡីស័កជាមុនសិន នៅពេលពួកគេធ្វើដំណើរ មកដល់ទីក្រុងវូហាន ឬក៏យ៉ាងណានោះទេ ដោយគ្រាន់តែឱ្យដឹងថា ក្រុមអ្នកជំនាញទាំងនេះ នឹងដឹកនាំការស៊ើបអង្កេតរួមគ្នាជាមួយក្រុមអ្នកវិទ្យាសាស្ត្រចិន។
ទោះជាយ៉ាងណាក៏ដោយ សេចក្តីជូនដំណឹងរបស់ភាគីចិនទើបតែផ្សាយចេញ គឺមិនទាន់មានខ្លឹមសារលម្អិតនៃការងាររបស់ក្រុមអ្នកជំនាញនោះទេ ដូចជាពេលវេលាធ្វើការរបស់ពួកគេក្នុងរយៈពេលយូរប៉ុន្មាន និងស៊ើបអង្កេតប្រភពដើមនៃជំងឺ COVID-១៩ នៅទីកន្លែងមួយណាជាដើម./.
(បូកសរុបដោយឌីណា)
មតិពីមិត្តអ្នកអាន