អាមេរិកៈ អត្រាគ្មានការងារធ្វើនៅអាមេរិក បានធ្លាក់ចុះដល់កម្រិតទាបបំផុតក្នុងរយៈពេល១៦ឆ្នាំកាលពីខែឧសភា តែការបង្កើតការងារប្រចាំខែ បានធ្លាក់ចុះយ៉ាងខ្លាំងក្នុងរយៈពេលបីខែចុងក្រោយនេះ ដោយបានបង្កើតជាស្ថានភាពចម្រុះស្តីពីទីផ្សារការងារ។
ទិន្នន័យផ្ទុយនេះអាចធ្វើឲ្យស្ថានភាពច្របូកច្របល់ មុនការសម្រេចរបស់ធនាគារកណ្តាលអាមេរិកលើអត្រាការប្រាក់នៅចុងខែនេះ។
ក្រសួងការងារអាមេរិកបានរាយការណ៍កាលពីថ្ងៃសុក្រថា សេដ្ឋកិច្ចអាមេរិក បានបង្កើនការងារថ្មីសរុបត្រឹមតែ ១៣៨ ០០០ កន្លែងតែប៉ុណ្ណោះកាលពីខែឧសភា ពោលគឺទាបជាងការរំពឹងទុករបស់អ្នកវិភាគច្រើន ហើយការបង្កើតការងារជាមធ្យមក្នុងរយៈពេលបីខែចុងក្រោយនេះ បានធ្លាក់ចុះមកនៅត្រឹម ១២១ ០០០កន្លែង បន្ទាប់ពីទិន្នន័យការងារនៅខែមេសា និងខែមីនា ធ្លាក់ចុះសរុប ៦៦ ០០០ក ន្លែង។
ប៉ុន្តែបើទោះជាការធ្លាក់ចុះនៃអត្រាគ្មានការងារធ្វើនេះទំនងជាដំណឹងល្អក្តី វាក៏ឆ្លុះបញ្ចាំងផងដែរថា បុគ្គលិកមួយចំនួន បានចាកចេញពីកម្លាំងពលកម្ម ដោយអត្រាចូលរួមកម្លាំងពលកម្ម ដែលត្រូវបានគេឃ្លាំមើលយ៉ាងយកចិត្តទុកដាក់នោះបានធ្លាក់ចុះ ០,២ពិន្ទុ មកនៅត្រឹម៦២,៧ភាគរយ។
ដោយសារកំណើនការងារ បានកើតឡើងក្នុងរយៈពេលប៉ុន្មានខែចុងក្រោយនេះ សេតវិមានបានសាទរជាថ្មីម្តងទៀតចំពោះដំណឹងល្អក្នុងទីផ្សារការងារនេះ។
លោក Sean Spicer មន្ត្រីសារព័ត៌ មានប្រចាំសេតវិមាន បានឲ្យដឹងថា របាយការណ៍ការងារនេះ បានបង្ហាញថា «ពលរដ្ឋអាមេរិក ដែលកំពុងស្វែងរកការងារធ្វើ កំពុងទទួលបានជោគជ័យកាន់តែខ្លាំងក្នុងការស្វែងរកការងារជាងរយៈពេល ១៦ ឆ្នាំមកនេះ»។
លោកបានប្រាប់ក្រុមអ្នកយកព័ត៌មានថា៖ «មានសញ្ញាវិជ្ជមានច្រើនចំពោះទីផ្សារការងារ»។
លោកប្រធានាធិបតី ដូណាល់ ត្រាំ បានសន្យាបង្កើតការងារថ្មីចំនួន ២៥លានកន្លែងដល់សេដ្ឋកិច្ចអាមេរិកក្នុងរយៈពេល ១០ ឆ្នាំ តែក្រុមសេដ្ឋវិទូបានឲ្យដឹងថា គោលដៅនេះ មិនអាចសម្រេចទៅបានទេ ហើយទិន្នន័យចុងក្រោយនេះ អាចនឹងជំរុញដល់គោលដៅនេះ ជាពិសេស របាយការណ៍កាន់តែច្រើនដែលបង្ហាញថា ក្រុមហ៊ុននានា កំពុងព្យាយាមបំពេញតំណែងការងារដែលនៅទំនេរ។
របាយការណ៍ការងារនេះ បានបង្ហាញ មួយថ្ងៃបន្ទាប់ពីលោក ត្រាំ បានប្រកាសថា លោកបានដកអាមេរិកចេញពីកិច្ចព្រមព្រៀងបម្រែបម្រួលអាកាសធាតុក្រុងប៉ារីសឆ្នាំ ២០១៥ ក្នុងគោលបំណងរក្សាការងារនៅអាមេរិក។
ទោះជាយ៉ាងនេះក្តី ក្រុមអ្នកវិភាគបានឲ្យដឹងថា អាមេរិកនឹងទទួលបានកាន់តែច្រនតាមរយៈការចូលរួមការអភិវឌ្ឍថាមពលកកើតឡើងវិញ។ ការងារមួយក្នុងចំណោមការងារថ្មីចំនួន៥០កន្លែងនៅសហរដ្ឋអាមេរិកក្នុងឆ្នាំ ២០១៦ ស្ថិតក្នុងឧស្សាហកម្មថាមពលពន្លឺព្រះអាទិត្យ៕ BP
មតិពីមិត្តអ្នកអាន