មូលនិធិសប្បុរសធម៌របស់មហាសេដ្ឋីចិន លោក Jack Ma ទើបតែបានប្រកាសបរិច្ចាគលុយទំហំ១០០លានយ័ន ស្មើនឹងប្រមាណ ១៤.៤លានដុល្លារសហរដ្ឋអាមេរិក ដើម្បីជួយជ្រោមជ្រែងដល់កិច្ចប្រឹងប្រែងស្រាវជ្រាវ ក៏ដូចជាអភិវឌ្ឍន៍វ៉ាក់សាំងសម្រាប់ virus Corona ដែលបានផ្តាច់ជីវិតមនុស្សកើនដល់ជាង២០០នាក់ និងចម្លងដល់ជិត១០,០០០នាក់ បើគិតទាំងក្នុងប្រទេសចិន និងនៅជុំវិញពិភពលោក។
មហាសេដ្ឋីដ៏ល្បីឈ្មោះរបស់ចិន គឺ លោក Jack Ma
មហាសេដ្ឋីដ៏ល្បីឈ្មោះរបស់ចិន គឺ លោក Jack Ma ដែលជាស្ថាបនិកក្រុមហ៊ុនយក្ស Alibaba នឹងផ្ដល់ជំនួយជាទឹកប្រាក់ប្រមាណ ១៤,៥ លានដុល្លារអាមេរិក តាមរយៈមូលនិធិសប្បុរសធម៌របស់លោក ដែលបានចូលរួមជាមួយនឹងភរិយាលោក Bill Gates គឺអ្នកស្រី Melinda Gates ដើម្បីប្រយុទ្ធប្រឆាំងការផ្ទុះឡើង និងរីករាលដាលនៃ virus Corona នៅក្នុងប្រទេសចិន។
បើតាមការបង្ហោះលើបណ្ដាញ Weibo ដោយស្ថាប័នមូលនិធិនេះ បានឲ្យដឹងថា «យើងដឹងថា ការប្រយុទ្ធប្រឆាំងរវាងមនុស្សជាតិ និងជំងឺ គឺជាដំណើរវែងឆ្ងាយមួយ។ ថវិកានេះ នឹងជួយដល់កិច្ចខិតខំប្រឹងប្រែងស្រាវជ្រាវផ្នែកវេជ្ជសាស្ត្រផ្សេងៗ និងជួយការពារពីការឆ្លងជំងឺ»។
មិនមែនតែក្រុមហ៊ុន Alibaba ក៏ដូចជា លោក Jack Ma មួយនោះទេ ដែលបានផ្ដល់ជំនួយក្នុងគ្រាដែលប្រទេសចិនកំពុងជួបបញ្ហាដ៏អាក្រក់នេះ គេសង្កេតឃើញថា មានមហាសេដ្ឋីម្ចាស់ក្រុមហ៊ុនបច្ចេកវិទ្យាជាច្រើនផ្សេងទៀត ក៏បានចូលរួមយ៉ាងសស្រាក់សស្រាំផ្ដល់ជំនួយថវិកា និងសម្ភារដើម្បី ប្រយុទ្ធប្រឆាំងនឹងការផ្ទុះឡើងនៃវីរុសកូរ៉ូណានេះផងដែរ។
ក្រុមហ៊ុនក្នុងវិស័យឧស្សាហកម្មបច្ចេកវិទ្យាចិន ត្រូវបានគេមើលឃើញថា បានចេញមុខឆ្លើយបតយ៉ាងឆាប់រហ័សចំពោះការការផ្ទុះឡើងនៃវីរុសដ៏កាចសាហាវនេះ ដែលបាននិងកំពុងធ្វើឲ្យមនុស្សបាត់បង់ជីវិតប្រមាណ ១៧០នាក់ និងឆ្លងជំងឺនេះ ប្រមាណជិត ៨ពាន់នាក់ គិតត្រឹមថ្ងៃទី ៣០ មករានេះ។ ក្នុងនោះដែរ លោក Pony Ma ដែលជាស្ថាបនិកក្រុមហ៊ុន បច្ចេកវិទ្យាដ៏ធំមួយ របស់ចិន គឺTencent Holding Ltd ក៏បានឧបត្ថម្ភសម្ភារៈដែលមានតម្លៃប្រមាណ ៣០០ លានយន់ និងត្រៀមផ្ដល់កម្មវិធីបច្ចេកវិទ្យាមួយចំនួនទៀត ដើម្បីបម្រើដល់ការទប់ទល់នឹងវីរុសកូរ៉ូណានេះ។ រីឯ ក្រុមហ៊ុនកក់សេវាតាក់ស៊ីអនឡាញ Didi Chuxing ក៏បានជួយផ្ដល់សេវាដឹកក្រុមគ្រូពេទ្យដើម្បីទៅកាន់ទីក្រុងជាច្រើន ដើម្បីពិនិត្យ និងព្យាបាលអ្នកដែលបានឆ្លងវីរុសនេះ ខណៈដែលក្រុមហ៊ុន Bai Du Inc របស់លោក Robin Li និងក្រុមហ៊ុន បណ្ដាញសង្គម Tik Tok ក៏បានចូលរួមផ្ដល់ជំនួយហិរញ្ញវត្ថុមួយចំនួនដែរ។ខាងក្រោមនេះគឺជាតួលេខនៃចំនួនអ្នកស្លាប់ និងឆ្លង virus Corona ព្រមទាំងប្រទេស និងតំបន់នានាទូទាំងពិភពលោកដែលមានវត្តមានវីរុសដ៏កាចសាហាវនេះ
១៖ ប្រទេសចិនឆ្លង ៩,៦៨៩ករណី និងបាត់បង់ជីវិត ២១៣នាក់
២៖ ទីក្រុងហុងកុង ១៥ករណីឆ្លង
៣៖ ប្រទេសជប៉ុន ១៤ករណីឆ្លង
៤៖ ប្រទេសថៃ ១៤ករណីឆ្លង
៥៖ ប្រទេសសិង្ហបុរី ១៣ករណីឆ្លង
៦៖ ប្រទេសអូស្ត្រាលី ០៩ករណីឆ្លង
៧៖ កោះតៃវ៉ាន់ ០៩ករណីឆ្លង
៨៖ ប្រទេសម៉ាឡេស៊ី ០៨ករណីឆ្លង
៩៖ ទីក្រុងម៉ាកាវ ០៧ករណីឆ្លង
១០៖ ប្រទេសកូរ៉េខាងត្បូង ០៧ករណីឆ្លង
១១៖ ប្រទេសបារាំង ០៦ករណីឆ្លង
១២៖ សហរដ្ឋអាមេរិក ០៦ករណីឆ្លង
១៣៖ ប្រទេសអាល្លឺម៉ង់ ០៥ករណីឆ្លង
១៤៖ ប្រទេសវៀតណាម ០៥ករណីឆ្លង
១៥៖ ប្រទេសអេមីរ៉ាត់អារ៉ាប់រួម ០៤ករណីឆ្លង
១៦៖ ប្រទេសកាណាដា ០៣ករណីឆ្លង
១៧៖ ប្រទេសអ៊ីតាលី ០២ករណីឆ្លង
១៨៖ ប្រទេសកម្ពុជា ០១ករណីឆ្លង
១៩៖ ប្រទេសហ្វាំងឡង់ ០១ករណីឆ្លង
២០៖ ប្រទេសឥណ្ឌា ០១ករណីឆ្លង
២១៖ ប្រទេសនេប៉ាល់ ០១ករណីឆ្លង
២២៖ ប្រទេសហ្វីលីពីន ០១ករណីឆ្លង
២៣៖ ប្រទេសស្រីលង្កា ០១ករណីឆ្លង
គិតត្រឹមវេលាម៉ោង ១៖០០នាទីរសៀលថ្ងៃសុក្រ ទី៣១ ខែមករា ឆ្នាំ២០២០៕
（សរុបដោយវិច្ឆិកា）
មតិពីមិត្តអ្នកអាន