វិស័យមីក្រូហិរញ្ញវត្ថុត្រូវបានគេមើលឃើញថាជាវិស័យមួយដែលរដ្ឋាភិបាលក្រោមការដឹកនាំរបស់គណបក្សប្រជាជនកម្ពុជា ហាក់យកចិត្តទុកដាក់យ៉ាងខ្លាំងនៅក្នុងអំឡុងពេលមុននៃយុទ្ធនាការឃោសនាបោះឆ្នោតឃុំ-សង្កាត់ អាណត្តិទី ៤ នេះ។
ផ្តើមពីដំបូងដោយការអប់រំទាក់ទងនឹងការឲ្យប្រជាជនយល់ថា គ្រឹះស្ថានមីក្រូហិរញ្ញវត្ថុ ជាគ្រឹះស្ថានឯកជន មិនមែនជារបស់រដ្ឋ រដ្ឋាភិបាលក៏បានបង្ខំឲ្យគ្រឹះស្ថានហិរញ្ញវត្ថុធំៗមួយចំនួនធ្វើការផ្លាស់ប្តូរឡូហ្គោជាបន្ទាន់ដើម្បីញែកឲ្យដាច់ចៀសវាងការយល់ច្រឡំថាជារបស់រដ្ឋ។
មិនត្រឹមតែប៉ុណ្ណោះ កាលពីខែមេសា រដ្ឋាភិបាល ក៏បានតម្រូវឲ្យធនាគារជាតិនៃកម្ពុជា ប្រកាសធ្វើអន្តរាគមន៍ទីផ្សារ ដោយតម្រូវឲ្យប្រតិបត្តិករមីក្រូហិរញ្ញវត្ថុគិតការប្រាក់មិនលើសពី ១៨ ភាគរយក្នុងមួយឆ្នាំ ខណៈកាលពីមុនមានដល់ជិត ៣០ ភាគរយ។ រដ្ឋាភិបាលក៏បញ្ជាឲ្យអជ្ញាធរភូមិ ឃុំ ចៀសឆ្ងាយពីការពាក់ព័ន្ធនឹងប្រតិបត្តិការរបស់មីក្រូហិរញ្ញវត្ថុ ដើម្បីបញ្ចៀសការភាន់ច្រឡំ។
រហូតដល់ការបោះឆ្នោតក្រុមប្រឹក្សា ឃុំ-សង្កាត់ ដែលជាការថ្លឹងថ្លែងលើអារម្មណ៍មួយរបស់ពាណិជ្ជករថាតើអាចនឹងមានឥទ្ធិពលលើប្រតិបត្តិការអាជីវកម្មយ៉ាងណានោះ? អ្នកនៅក្នុងឧស្សាហកម្មនេះអះអាងគ្មានការបារម្ភណាមួយចេញពីលទ្ធផលបោះឆ្នោតនោះទេ។
លោក ប៊ុន មុន្នី ទីប្រឹក្សាសមាគមគ្រឹះស្ថានមីក្រូហិរញ្ញវត្ថុកម្ពុជា (CMA) បានទទួលស្គាល់ការសម្រេចចិត្តជាច្រើនរបស់រដ្ឋាភិបាលហាក់សំដៅដល់វិស័យមីក្រូហិរញ្ញវត្ថុច្រើនជាងគេ ដែលមានឥទិ្ធពលដល់ប្រតិបត្តិការវិស័យនេះ ប៉ុន្តែលោកបញ្ជាក់ថាប្រតិបត្តិករមិនបានផ្លាស់ប្តូរសកម្មភាពរបស់គេឡើយ។ លោកបន្តថា ប្រតិបត្តិករនៅតែបន្តពង្រីកសកម្មភាព និងប្រតិបត្តិការអាស្រ័យលើតម្រូវការទីផ្សារ។
លោកថ្លែងថា៖ «យើងមិនមានការបារម្ភអីទេ ហើយប្រតិបត្តិករមីក្រូហិរញ្ញវត្ថុនៅតែធ្វើការប្រតិបត្តិការជាធម្មតាដោយអាស្រ័យលើតម្រូវការសេវាហិរញ្ញវត្ថុ»។ លោកបន្ថែមថា៖ «ខ្ញុំគិតថាបើទោះបីជាលទ្ធផលយ៉ាងម៉េច [គណបក្សណាឈ្នះ] ក៏ដោយ នឹងគ្មានឥទ្ធិពលអវិជ្ជមានណាមួយដល់វិស័យនេះទេ»។
លោក ង៉ែត ជូ ទីប្រឹក្សាជាន់ខ្ពស់ ក្រុមហ៊ុន EMC ដែលថ្មីៗនេះបានផ្តល់យោបល់ផ្នែកពាណិជ្ជកម្មដល់ក្រុមហ៊ុនបរទេសជាច្រើន បានឲ្យដឹងថា ក្រុមហ៊ុនដែលវិនិយោគរយៈពេលវែង ហាក់មិនមានការបារម្ភពីព្រឹតិ្តការណ៍បោះឆ្នោតនេះឡើយ ខណៈពួកគេបន្តធ្វើការសិក្សាទីផ្សារ និងបន្តគម្រោងពង្រីកពាណិជ្ជកម្មបន្តបន្ទាប់។
លោកបានបញ្ជាក់ថា នេះជាសញ្ញាវិជ្ជមានពីការយល់ឃើញរបស់វិនិយោគិនរយៈពេលវែងមកលើស្ថានភាពសង្គម និងនយោបាយនៅកម្ពុជា។
លោកថ្លែងថា៖ «វិនិយោគិនជឿថាមិនថាគណបក្សណាឈ្នះឆ្នោត គណបក្សទាំងនោះនឹងយកចិត្តទុកដាក់ និងផ្តល់អាទិភាពដល់វិស័យឯកជន»។ លោកបន្តថា៖ «ពួកគេជឿថា រដ្ឋាភិបាលយល់ច្បាស់ពីសារៈសំខាន់របស់វិស័យឯកជន ដែលជាអ្នកបង់ពន្ធជូនរដ្ឋដ៏សំខាន់ដើម្បីបង្កើនចំណូលជាតិ ដើម្បីកាត់បន្ថយការពឹងផ្អែកលើជំនួយបរទេស»។
លោក ងួន ម៉េងតិច អគ្គនាយកសភាពាណិជ្ជកម្មកម្ពុជាបានឲ្យដឹងថា ខណៈប្រជាពលរដ្ឋមានការយល់ដឹងកាន់តែច្រើន និងឲ្យតម្លៃលើការបោះឆ្នោតច្រើនជាងមុន ដែលមានវាមិនបង្ហាញពីហានិភ័យណាមួយមកលើការវិនិយោគនោះទេ។
លោកបន្តថា លទ្ធផលបោះឆ្នោតនេះ មិនមែនជាការគំរាមកំហែងដល់ដំណើរការសេដ្ឋកិច្ចកម្ពុជាដែលកំពុងមានកំណើននោះទេ។
លោកងួន ម៉េងតិច បាននិយាយថា៖ «យើងឃើញថា ស្ថានភាពសេដ្ឋកិច្ចយើងមានលំនឹង និងមានកំណើនរឹងមាំហើយបច្ចុប្បន្ន លទ្ធផលនៃការបោះឆ្នោតមិនមែនជាការបារម្ភ ឬជាហានិភ័យដល់ដំណើរសេដ្ឋកិច្ចទេ ប្រជាជនមានការយល់ដឹងពីដំណើរការបោះឆ្នោតច្រើននិងសិទ្ធិរបស់ពួកគាត់»។
បើទោះបីយ៉ាងនេះក្តី ក្តីបារម្ភតិចតួចនៅតែអាចកើតមាន។
លោកបានថ្លែងថា៖ «ទោះបីជាយ៉ាងណា ការភ័យខ្លាច និងការបារម្ភ នៅបន្សល់ទុកនៅក្នុងចិត្តរបស់អ្នកជំនួញ តែក៏មិនមានកម្រិតខ្ពស់ដែរ»៕
មតិពីមិត្តអ្នកអាន