រថយន្តម៉ាក Jeep ជាផ្នែកសំខាន់នៃយុទ្ធសាស្ត្ររបស់ក្រុមហ៊ុន Fiat Chrysler ក្នុងការជំរុញទីតាំងឈរជើងរបស់ខ្លួនក្នុងឧស្សាហកម្មរថយន្តពិភពលោក តែការលក់នៅអាមេរិកនៃម៉ាករថយន្តមួយនេះបានធ្លាក់ចុះ។
លោក Sergio Marchi o nne ប្រធានក្រុមហ៊ុន FCA បានគិតអំពីការបំបែកយីហោរថយន្ត Jeep ដូចជាលោកបានបំបែករថយន្តយីហោ Ferrari ដើម្បីបង្កើនមូលធនបន្ថែម តែផ្ទុយទៅវិញក្រុមហ៊ុនផលិតរថយន្តរបស់អ៊ីតាលី និងអាមេរិកមួយនេះកំពុងពឹងផ្អែកខ្លាំងលើការបង្កើនការលក់រថយន្តម៉ាក Jeep ជាប្រចាំក្នុងរយៈពេលប៉ុន្មានឆ្នាំខាងមុខនេះវិញ។
តែបន្ទាប់ពីការលក់សម្រេចបានកំណើនជាប្រចាំក្នុងរយៈពេលវែងនោះ ការលក់រថយន្តម៉ាក Jeep នៅសហរដ្ឋអាមេរិកបានធ្លាក់ចុះ ១៨ ភាគរយកាលពីខែឧសភាហើយបានធ្លាក់ចុះ ១៣ ភាគរយគិតចាប់តាំងពីដើមឆ្នាំរហូតមកដល់ពេលនេះ។
លោក Todd Goyer អ្នកនាំពាក្យរបស់ម៉ាករថយន្ត Jeep នេះមានប្រសាសន៍ថាឧបសគ្គនេះគ្រាន់តែមានរយៈពេលបណ្តោះអាសន្នប៉ុណ្ណោះ។
លោកបានឲ្យដឹងនៅក្នុងអ៊ីម៉ែលមួយថា៖ «ការលក់រថយន្តធ្លាក់ចុះនេះគឺដោយសារការកាត់បន្ថយយ៉ាងប្រុងប្រយ័ត្នចំពោះការលក់រថយន្ត និងការឋិតក្នុងដំណាក់កាលផ្លាស់ប្តូរពីម៉ូដែលរថយន្តចាស់របស់រថយន្តម៉ូដែល Compass និងម៉ូដែល Patriot ទៅរថយន្ត Compass ម៉ូដែលថ្មី និងមានរូបរាងថ្មីទាំងអស់»។
ជាងនេះទៀតលោកបានបញ្ជាក់ថាការលក់រថយន្តម៉ាក Jeep នៅទូទាំងពិភពលោកកើនឡើង ៦ ភាគរយនៅឆ្នាំ ២០១៧ គិតត្រឹមខែឧសភា»។
ក្នុងអំឡុងពេលដែលក្រុមហ៊ុននេះបង្កើនផលិតកម្មនៅរោងចក្រផលិតរថយន្តមួយនៅប្រទេសម៉ិកស៊ិកការផ្លាស់ប្តូររូបរាងរថយន្តម៉ូដែលនេះដែលត្រូវបានលើកឡើងដោយលោក Goyer បានជំរុញឲ្យក្រុមហ៊ុន FCA ផ្អាកផលិតកម្មរថយន្តម៉ាក Jeep ជាបណ្តោះអាសន្ននៅរោងចក្រផលិតរថយន្តមួយចំនួននៅទីក្រុង Belvidere រដ្ឋ Illinois និងនៅទីក្រុង Toledo រដ្ឋ Ohio ហើយដំណាក់កាលផ្លាស់ប្តូរនេះនឹងមិនទាន់បញ្ចប់ទេរហូតដល់ចុងឆ្នាំនេះ។
ក្រុមអ្នកវិភាគបានឲ្យដឹងថាដោយសារការលក់រថយន្តមួយចំនួនដូចជារថយន្តម៉ូដែល Jeep Grand Cherokee ដ៏មានប្រជាប្រិយភាពនៅតែបន្តសម្រេចបានកំណើនខ្ពស់ដោយបានកើនឡើង ១១ ភាគរយនៅខែឧសភានោះ កត្តាមួយចំនួនផ្សេងទៀតអាចធ្វើឲ្យប៉ះពាល់ដល់ផែនការបង្កើនការលក់របស់រថយន្ត Jeep។
លោកស្រី Michelle Krebs អ្នកវិភាគប្រចាំក្រុមហ៊ុន Autotrader បានឲ្យដឹងថា៖ «រថយន្តរបស់ក្រុមហ៊ុន Fiat Chrysler ជាប់ចំណាត់ថ្នាក់ក្រោយ ឬស្ទើរតែក្រោយគេជាប្រចាំក្នុងតារាងគុណភាពផលិតផល»។
លោកស្រីថ្លែងថាក្រុមហ៊ុននេះ «ទំនងជាមិនមានលទ្ធភាពវិលត្រឡប់មករកកំណើនវិញទេ ខណៈដែលគូប្រជែងមួយចំនួនបានឈានទៅមុខមុនហើយនោះ» ដែលអាចដាក់សម្ពាធលើការលក់រថយន្ត។
ទន្ទឹមនឹងនោះដែរការប្រកួតប្រជែងកំពុងកើនឡើងហើយកំពុងដាក់សម្ពាធលើរថយន្តម៉ាកនេះ។ គ្រាន់តែនៅសប្តាហ៍នេះក្រុមហ៊ុន Honda ចាប់ផ្តើមផលិតរថយន្តម៉ាក Acura MDX របស់ខ្លួនដែលជាគូប្រជែងផ្ទាល់របស់រថយន្តម៉ាក Grand Cherokee នៅរោងចក្រផលិតរថយន្តទីពីរក្នុងរដ្ឋ Ohio ដើម្បីឆ្លើយតបតម្រូវការ។
នៅប្រទេសចិនដែលការលក់រថយន្តម៉ាក Jeep បានកើនឡើង ១៣១ ភាគរយនៅឆ្នាំ ២០១៦ ហើយគេរំពឹងពីកំណើនលក់ខ្ពស់ទៀតដោយសាររថយន្តម៉ាក Jeep នឹងមានរថយន្តបីម៉ូដែលខុសគ្នាចេញលក់ឲ្យអតិថិជនចិន។
ក្រុមហ៊ុនផលិតរថយន្តម៉ាក Jeep នឹងមានសមត្ថភាពផលិតរថយន្ត ៣៥ ម៉ឺនគ្រឿងនៅប្រទេសចិនហើយអាចផលិតបន្ថែមទៀតតាមកំណើនតម្រូវការ៕ BP
មតិពីមិត្តអ្នកអាន