ក្រុមហ៊ុនផលិតរថយន្តប្រណីត Audi កាលពីថ្ងៃសុក្របានយល់ឃើញថាក្រុមហ៊ុនខ្លួនបានធ្លាក់ចូលក្នុងរឿងអាស្រូវនៃការបន្លំការបញ្ចេញកាបូននៅទូទាំងពិភពលោកដែលបានធ្វើឲ្យប៉ះពាល់យ៉ាងខ្លាំងដល់ក្រុមហ៊ុនមេរបស់ខ្លួនឈ្មោះ Volkswagen បន្ទាប់ពីក្រុមរដ្ឋអាជ្ញាអាល្លឺម៉ង់បានឲ្យដឹងថាពួកគេកំពុងស៊ើបអង្កេតថាតើម៉ូដែលរថយន្តមួយចំនួនក្នុងចំណោមរថយន្តប្រណីតរបស់ក្រុមហ៊ុន Audi អាចនឹងមានទាក់ទងនឹងរឿងអាស្រូវនេះដែរឬទេនៅប្រទេសអាល្លឺម៉ង់?
ក្រុមរដ្ឋអាជ្ញាបាននិងកំពុងស៊ើបអង្កេតរួចទៅហើយពីការបន្លំការធ្វើតេស្តបញ្ចេញកាបូនរបស់រថយន្តប្រើប្រាស់ប្រេងម៉ាស៊ូតដែលអាចកើតមានឡើងរបស់ក្រុមហ៊ុន Audi នៅសហរដ្ឋអាមេរិក។
ប៉ុន្តែរដ្ឋអាជ្ញាទាំងនោះបានប្រកាសកាលពីថ្ងៃសុក្រថាពួកគេនឹងបន្តការស៊ើបអង្កេតរបស់ខ្លួនដល់ប្រទេសដែលផលិតរថយន្តនេះផ្ទាល់ពោលគឺរយៈពេលមួយថ្ងៃបន្ទាប់ពីក្រុមហ៊ុន Audi បានប្រកាសពីការប្រមូលយករថយន្តម៉ូដែល A7 និងម៉ូដែល A8 របស់ខ្លួននៅទូទាំងតំបន់អឺរ៉ុបមកវិញ។
អ្នកនាំពាក្យឲ្យក្រុមរដ្ឋអាជ្ញានៅទីក្រុងមុយនិចស្ថិតនៅភាគខាងត្បូងប្រទេសអាល្លឺម៉ង់បានប្រាប់ទីភ្នាក់ងារព័ត៌មាន AFP ថា៖ «យើងបានបង្កើនការស៊ើបអង្កេតរបស់យើងចំពោះការលក់រថយន្តម៉ាក Audi នេះរហូតដល់ ២៤០០០ គ្រឿងដែលបានដាក់លក់នៅប្រទេសអាល្លឺម៉ង់ និងនៅតំបន់អឺរ៉ុបដែលប្រើប្រាស់ឧបករណ៍បន្លំការធ្វើតេស្តបញ្ចេញកាបូនខុសច្បាប់»។
កាលពីថ្ងៃព្រហស្បតិ៍សប្តាហ៍មុនក្រុមហ៊ុន Audi បានឲ្យដឹងថាខ្លួនកំពុងប្រមូលមកវិញនូវរថយន្តដើរដោយថាមពលប្រេងម៉ាស៊ូតម៉ូដែល A7 និងម៉ូដែល A8 ចំនួន ២៤ ០០០ គ្រឿងរួមទាំងរថយន្តចំនួន ១៤ ០០០ គ្រឿងនៅប្រទេសអាល្លឺម៉ងផងដែរ បន្ទាប់ពីក្រុមហ៊ុនបានរកឃើញ «បញ្ហាមិនប្រក្រតី» នៃកម្រិតបញ្ចេញនីត្រូហ្ស៊ែនអុកស៊ីត (NOx) របស់រថយន្តទាំងនោះ។
NOx ជាឧស្ម័នបង្កគ្រោះថ្នាក់ដែលនឹងចូលរួមចំណែកបង្កើតឲ្យមានផ្សែងខ្មៅ និងលម្អងផ្សែងចេញពីរថយន្ត។
បន្ទាប់ពីការវាយតម្លៃមួយក្រុមហ៊ុន Audi បានឲ្យដឹងថាកម្រិតឧស្ម័នដែលត្រូវបានបញ្ចេញដោយរថយន្តប៉ុន្មានម៉ូដែលដែលបានរងផលប៉ះពាល់នៅប្រទេសអាល្លឺម៉ង់ «បានកើនឡើងខ្ពស់ជាងកម្រិតអនុគ្រោះពី ២០ ទៅ ១០០ ភាគរយនៅក្នុងស្ថានភាពជាក់លាក់មួយចំនួន»។
រឿងអាស្រូវបន្លំការបញ្ចេញកាបូនដែលហៅថា «Dieselgate» បានផ្ទុះឡើងកាលពីខែកញ្ញា ឆ្នាំ ២០១៥ នៅពេលដែលក្រុមហ៊ុន Volkswagen បានបង្ខំចិត្តសារភាពថាក្រុមហ៊ុនរបស់ខ្លួនបានបំពាក់ «ឧបករណ៍បន្លំការបញ្ចេញកាបូន» ពោលគឺជាសូហ្វវែរទំនើបដែលត្រូវបានបង្កើតឡើងដើម្បីបន្លំការធ្វើតេស្តបញ្ចេញកាបូននៅក្នុងម៉ាស៊ីនរថយន្តប្រើប្រាស់ប្រេងម៉ាស៊ូតចំនួន ១១ លានគ្រឿងនៅទូទាំងពិភពលោក។
អ្នកនាំពាក្យរបស់ក្រុមរដ្ឋអាជ្ញានេះបានបន្តឲ្យដឹងថារហូតមកដល់ពេលនេះនៅពុំមានភ័ស្តុតាងទាក់ទងនឹងមន្ត្រីប្រតិបត្តិបច្ចុប្បន្ន ឬអតីតមន្ត្រីប្រតិបត្តិរបស់ក្រុមហ៊ុននេះចំពោះការបន្លំនេះទេ។
អ្នកនាំពាក្យរបស់ក្រុមហ៊ុន Audi បានប្រាប់ទីភ្នាក់ងារព័ត៌មាន AFP កាលពីថ្ងៃសុក្រថា៖ «យើងបានសហការយ៉ាងជិតស្និទ្ធជាមួយក្រុមរដ្ឋអាជ្ញានៅក្រុងមុយនិចអស់រយៈពេលជាច្រើនខែដើម្បីគាំទ្រការស៊ើបអង្កេតនេះ»៕ BP
មតិពីមិត្តអ្នកអាន