យុគសម័យ - ប្រធាននាយកដ្ឋានអាស៊ានចំណុះក្រសួងការបរទេសថៃ លោក Suriya Chindawongse បានឲ្យដឹងថា ថ្នាក់ដឹកនាំនៃបណ្តាប្រទេសសមាជិកអាស៊ីអាគ្នេយ៍ចំនួន១០ នឹងចូលរួមកិច្ចប្រជុំកំពូលអាស៊ានលើកទី ៣៤ នៅទីក្រុងបាងកកចាប់ពីថ្ងៃទី ២២ ដល់ ថ្ងៃទី២៣ ខែមិថុនាខាងមុខនេះ។
កិច្ចប្រជុំកំពូលអាស៊ានលើកទី ៣៤ នឹងប្រព្រឹត្តទៅនៅទីក្រុងបាងកកចាប់ពីថ្ងៃទី ២២ ដល់ ថ្ងៃទី២៣ ខែមិថុនាខាងមុខ (រូបថត៖vietnamplus.vn)
លោក Suriya Chindawongse បន្តទៀតថាកិច្ចប្រជុំកំពូលអាស៊ានលើកនេះមានប្រធានបទគឺ "ការលើកកម្ពស់ទំនាក់ភាពជាដៃគូដើម្បីនិរន្តរភាព" ហើយក្រោមអធិបតីភាពរបស់ប្រទេសថៃ កិច្ចប្រជុំនេះនឹងផ្តោតសំខាន់ទៅលើចេញសេចក្តីថ្លែងការណ៍រួមស្តីពីចក្ខុវិស័យរបស់ថ្នាក់ដឹកនាំចំពោះនិរន្តភាព រួមជាមួយផែនការសកម្មភាពមួយ ដើម្បីដោះស្រាយបញ្ហានៃការបំពុលបរិយាកាស ក៏ដូចជាពង្រាងនូវក្របខ័ណ្ឌនៃគំនិតទាក់ទងនឹងអត្ថន័យមហាសមុទ្រឥណ្ឌា - ប៉ាស៊ីហ្វិកផងដែរ។
ទន្ទឹមនឹងនេះដែរ នាយកនៃនាយកដ្ឋានចរចាពាណិជ្ជកម្មនៃក្រសួងពាណិជ្ជកម្មថៃ លោក Auramon Supthaweethum បានមានប្រសាសន៍ថា ថ្នាក់ដឹកនាំអាស៊ានទាំងអស់បានឯកភាពគ្នាជំរុញការបញ្ចប់កិច្ចចរចារនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) នៅឯក្នុងឆ្នាំនេះតែម្តង។គួរបញ្ជាក់ថាកិច្ចប្រជុំកំពូលអាស៊ានបន្តទៀតនឹងប្រព្រឹត្តទៅនៅខែវិច្ឆិកាខាងមុខ ខណៈដែលថ្នាក់ដឹកនាំនៃបណ្តាប្រទេសដទៃទៀតនឹងត្រូវបានអញ្ជើញឱ្យចូលរួមក្នុងកិច្ចប្រជុំដែលពាក់ព័ន្ធ ដែលក្នុងនោះមានវេទិកាតំបន់អាស៊ាន (ARF) ស្តីពីបញ្ហានយោបាយនិងសន្តិសុខផងដែរ៕
(ប្រភព៖ vietnamplus.vn បកប្រែដោយ ហេង វុធ្ធី)
មតិពីមិត្តអ្នកអាន