លោកនាយករដ្ឋមន្ត្រីជប៉ុន Shinzo Abe ចង់ប្រទេសជប៉ុនដើរតួជាអាជ្ញាកណ្តាល សម្របសម្រួល បន្ធូរបន្ថយភាពតានតឹង រវាងអាមេរិកជាមួយអ៊ីរ៉ង់។ ជប៉ុនជាសម្ព័នមិត្តជាមួយអាមេរិកស្រាប់ ហើយថែមទាំងមានទំនាក់ទំនងល្អ ជាមួយអ៊ីរ៉ង់ជាយូរយារណាស់មកហើយ។
លោក Hassan Rouhani និង លោក Shinzo Abe
លោកអាបេបាននិយាយនៅពេលធ្វើសន្និសីទសារព័ត៌មានមួយថា យើងមានទំនាក់ទំនងល្អជាប្រពៃណីជាមួយអ៊ីរ៉ង់ ហើយក៏បានជួបប្រធានាធិបតីអ៊ីរ៉ង់ជាច្រើនលើក ដូចជាការជួបជាមួយមេដឹកនាំផ្សេងៗទៀតដែរ។ អំឡុងពេលនេះ ជប៉ុនក៏កំពុងទាក់ទងជាមួយអាមេរិក ដើម្បីប្រមែប្រមូលព័ត៌មានមួយចំនួន។ លោក John Bolton ទីប្រឹក្សាសន្តិសុខជាតិអាមេរិក ត្រូវជួបជាមួយរដ្ឋមន្ត្រីក្រសួងការបរទេសជប៉ុនលោក Taro Kono ហើយលោកBolton ថែមទាំងជួបជាមួយក្រុមប្រឹក្សាសន្តិសុខជាតិកំពូលជប៉ុនលោក Shotaro Yachi ផងដែរ។ ប៉ុន្តែពុំមានការបញ្ជាក់ទេថា មន្ត្រីទាំងនេះពិភាក្សាលម្អិតពីអ្វីខ្លះ។
យ៉ាងណាក៏ដោយ លោក Shinzo Abe អះអាងថា ជប៉ុននឹងធ្វើអ្វីៗគ្រប់បែបយ៉ាងឲ្យអស់លទ្ធភាព ដើម្បីបន្ថយស្ថានភាពតានតឹងឲ្យធូរស្រាល មុននឹងសម្រេចចិត្តបញ្ជូនកងទ័ពជើងទឹក ទៅជួយអាមេរិក ឃ្លាំមើលស្ថានភាពនៅមជ្ឈិមបូព៌ា។ យោងទៅតាមប្រភពសារព័ត៌មានជប៉ុនឲ្យដឹងថា ទីក្រុងវ៉ាស៊ីនតោនបានស្នើឲ្យបង្កើតការឃ្លាំមើល ការដឹកជញ្ជូនប្រេងនៅតាមផ្លូវទឹក ពោលគឺនៅទីតាំងដែលមានការបន្ទោសលើអ៊ីរ៉ង់ថា បានវាយប្រហារលើនាវាដឹកប្រេង ដែលធ្វើដំណើរឆ្លងកាត់តាមផ្លូវទឹកនោះ។
លោក Shinzo Abe និង លោក Donald Trump
អាមេរិក និងអ៊ីរ៉ង់កំពុងតែមានភាពតានតឹងនឹងគ្នាខ្លាំង ក្រោយអ៊ីរ៉ង់បាញ់ទម្លាក់យន្តហោះយកការណ៍គ្មានមនុស្សបើករបស់អាមេរិកនៅច្រកសមុទ្រ Hormuz។ អាមេរិកថ្មីៗនេះ បានប្រកាសថា បានបាញ់ទម្លាក់យន្តហោះ Drone របស់អ៊ីរ៉ង់វិញមួយគ្រឿងដែរ តែអ៊ីរ៉ង់បដិសេធថា មិនបានបាត់យន្តហោះនោះទេ។ ទំនាស់រវាងអាមេរិកនិងអ៊ីរ៉ង់ ដំបូងផ្តើមចេញពីរឿងអាមេរិកដកខ្លួនដោយឯកតោភាគី ចេញពីកិច្ចព្រមព្រៀងនុយក្លេអ៊ែរអ៊ីរ៉ង់ចុះក្នុងឆ្នាំ២០១៥ ក្រោមហេតុផលថា អ៊ីរ៉ង់បានរំលោភលើខ្លឹមសារដែលចែងនៅក្នុងកិច្ចព្រមព្រៀង។ ក្រៅពីដកខ្លួន អាមេរិកក៏បានដាក់ទណ្ឌកម្មសេដ្ឋកិច្ច បិទមិនឲ្យអ៊ីរ៉ង់នាំប្រេងចេញបានដោយសេរីទៀត។ ការណ៍នេះធ្វើឲ្យអ៊ីរ៉ង់ខឹង ព្រោះតែប្រភពចំណូលដ៏សំខាន់ទ្រទ្រង់សេដ្ឋកិច្ចអ៊ីរ៉ង់ គឺបានមកពីការលក់ដូរប្រេងនេះឯង៕
(យោងតាម vayofm សរុបដោយវិច្ឆិកា)
មតិពីមិត្តអ្នកអាន