សារព័ត៌មានរដ្ឋចិន People's Daily នៅថ្ងៃពុធនេះបានព្រមានថា អំពើហិង្សា និងការរំលោភបំពានច្បាប់ អាចនឹងធ្វើឱ្យប៉ះពាល់ដល់កិត្តិយស និងសេដ្ឋកិច្ចរបស់ទីក្រុងហុងកុង ក្នុងនាមជាតំបន់ពាណិជ្ជកម្មពិសេសដាច់គេរបស់អន្តរជាតិ។ នេះបើតាមការដកស្រង់ចេញផ្សាយដោយ សារព័ត៌មាន CNA នៅរសៀលថ្ងៃពុធ ទី០៣ ខែកក្កដា ឆ្នាំ២០១៩។
ក្រុមអ្នកតវ៉ាចាកចេញពីសភានៅក្នុងក្រុងហុងកុងកាលពីថ្ងៃទី ២ ខែ មិថុនា។ រូបAFP
នៅក្នុងអត្ថបទរបស់ខ្លួនចុះផ្សាយនៅថ្ងៃពុធនេះ People's Daily បានគូសបញ្ជាក់ដូច្នេះថា «វាមិនមែនជារឿងគួរឱ្យភ្ញាក់ផ្អើលនោះទេចំពោះការខ្វែងគំនិតគ្នា ទោះបីជាបញ្ហានោះធំប៉ុណ្ណាក៏ដោយ... ប៉ុន្តែបើយើងទាំងអស់គ្នាផុងខ្លួន ទៅក្នុងល្បិចកិច្ចកលនៃនយោបាយរបស់អ្នកដទៃ ឬបង្កើតការបែកបាក់ ឬក៏ប្រឆាំងគ្នាទៅវិញទៅមកគ្នា នោះវានឹងមិនផ្ដល់ផលចំណេញអ្វីឡើយ ក្រៅតែពីធ្វើឱ្យខូចខាតកិត្តិយស សេដ្ឋកិច្ច និងការអភិវឌ្ឍរបស់ទីក្រុងហុងកុងតែប៉ុណ្ណោះ»។
គួរជម្រាបថា កាលពីថ្ងៃចន្ទដើមសប្ដាហ៍កន្លងទៅ អំពើហិង្សារវាងប៉ូលិស និងក្រុមបាតុករបានផ្ទុះ ឡើងនៅក្នុងបាតុកម្មតវ៉ាមួយនាឱកាសនៃការប្រារព្ធខួបលើកទី ២២ នៃការប្រគល់ក្រុងហុងកុង ពីអង់គ្លេសទៅឱ្យចិនគ្រប់គ្រង (ថ្ងៃទី០១ ខែកក្កដា ឆ្នាំ១៩៩៧)។ បាតុកម្មនេះបានបណ្ដាលឱ្យ មនុស្សជាច្រើននាករងរបួស ខណៈបាតុករខ្លះបានសម្រុកចូល និងបំផ្លិចបំផ្លាញទ្រព្យសម្បត្តិ នៅក្នុងអគារសភាក្រុងហុងកុង។
ដោយឡែករដ្ឋាភិបាលចិន បានបង្ហាញការគាំទ្រយ៉ាងពេញទំហឹងដល់អាជ្ញាធរទីក្រុងហុងកុង ក្នុងការបើកការស៊ើបអង្កេត និងចាប់ខ្លួនក្រុមបាតុករដែលធ្វើសកម្មភាពខុសច្បាប់ ដោយអុកឡុក និងបំផ្លិចបំផ្លាញទ្រព្យសម្បត្តិរបស់រដ្ឋ។
ចិនកាលពីថ្ងៃអង្គារ បានរិះគន់លោក ដូណាល់ ត្រាំ ចំពោះការជ្រៀតជ្រែកពេញទំហឹងនៅក្នុងកិច្ចការផ្ទៃក្នុងរបស់ក្រុងហុងកុង ក្រោយពីប្រធានាធិបតីអាមេរិករូបនេះបាននិយាយថា ក្រុមអ្នកតវ៉ាដែលបានវាយប្រហារសភានៃក្រុងនេះ ចង់បានលទ្ធិប្រជាធិបតេយ្យឲ្យមជ្ឈមណ្ឌលហិរញ្ញវត្ថុនេះ។
លោក ត្រាំ បានគាំទ្រការតវ៉ានៅក្នុងក្រុងហុងកុងកាលពីថ្ងៃចន្ទដោយបាននិយាយថា ក្រុមអ្នកតវ៉ា កំពុងស្វែងរកលទ្ធិប្រជាធិបតេយ្យ ប៉ុន្តែថា រដ្ឋាភិបាលខ្លះ មិនចង់បានលទ្ធិប្រជាធិបតេយ្យទេ។
អ្នកនាំពាក្យក្រសួងការបរទេសចិនលោក Geng Shuang
អ្នកនាំពាក្យក្រសួងការបរទេសចិនលោក Geng Shuang បានថ្លែងនៅសន្និសីទសារព័ត៌មានមួយថា៖ «យើងសម្តែងការសោកស្តាយ និងប្រឆាំងជំទាស់ការជ្រៀតជ្រែកទាំងស្រុងរបស់ប្រទេសពាក់ព័ន្ធនៅក្នុងកិច្ចការរបស់ក្រុងហុងកុង និងកិច្ចផ្ទៃក្នុងរបស់ប្រទេស ចិន»។
លោក បានបន្ថែមថា ចិនព្រមានថា ប្រទេសពាក់ព័ន្ធ ដែលនិយាយ និងធ្វើសកម្មភាពឲ្យឈប់ជ្រៀតជ្រែកកិច្ចការផ្ទៃក្នុងរបស់ក្រុងហុងកុងនៅក្នុងទម្រង់ណាមួយក្តី។
លោក ក៏បានថ្លែងថា អាមេរិកមិនគួរគាំទ្រដល់អ្នកដែលពាក់ព័ន្ធក្នុងអំពើហិង្សា និងរំលោភច្បាប់ក្នុងទម្រង់អ្វីក៏ដោយ។
មជ្ឈមណ្ឌលហិរញ្ញវត្ថុពាក់កណ្តាលស្វយ័តបានធ្លាក់ចូលក្នុងវិបត្តិដោយសារការតវ៉ាជាច្រើនសប្តាហ៍ប្រឆាំងច្បាប់មួយដែលអនុញ្ញាតឲ្យធ្វើបត្យាប័នទៅចិនដីគោក ដោយបញ្ហានេះនាំឲ្យមានភាពថ្នាំងថ្នាក់ និងមិនពេញចិត្តចំពោះក្រុងប៉េកាំង៕
（យោងតាម freshnewsasia និង postkhmer សរុបដោយវិច្ឆិកា）
មតិពីមិត្តអ្នកអាន