ប្រទេសចិនបានផ្គត់ផ្គង់គ្រឿងបរិក្ខារវេជ្ជសាស្ត្របន្ថែមទៀតដល់ប្រទេសហ្វីលីពីន ដើម្បីជួយដល់ប្រទេសនេះក្នុងការទប់ស្កាត់ការរីករាលដាលនៃជំងឺកូវីដ-១៩ និងពន្លឿនការងើបឡើងវិញរបស់ប្រទេសពីជំងឺឆ្លងដ៏ខ្លាំងមួយនេះ។
ប្រទេសចិនបរិច្ចាគបរិក្ខារវេជ្ជសាស្រ្តបន្ថែមទៀតដល់ប្រទេសហ្វីលីពីន ដើម្បីប្រឆាំងជំងឺកូវីដ-១៩
ការផ្គត់ផ្គង់គ្រឿងបរិក្ខារវេជ្ជសាស្ត្របន្ទាន់ដល់ហ្វីលីពីននេះរួមមាន ម៉ាស៊ីនបាញ់ថ្នាំសម្លាប់មេរោគចំនួន ១០០គ្រឿង ប្រដាប់ធ្វើតេស្តរកមេរោគចំនួន ១៥០.០០០សម្រាប់ ឈុតការពារវេជ្ជសាស្ត្រចំនួន ៧០.០០០ឈុត របាំងបិទមុខវេជ្ជសាស្ត្រប្រភេទ N95 ចំនួន ៧៩.០០០ របាំងបិទមុខសម្រាប់ពេលវះកាត់ចំនួន ១,៣លាន និងវ៉ែនតាការពារវេជ្ជសាស្ត្រចំនួន ៧០.០០០។
នៅក្នុងសេចក្តីថ្លែងការណ៍មួយរបស់ស្ថានទូតចិនប្រចាំនៅទីក្រុងម៉ានីល ដែលបានចេញផ្សាយកាលពីថ្ងៃអាទិត្យបាននិយាយថា«យន្ដហោះដឹកទំនិញធុនធ្ងន់ចំនួន ២គ្រឿងបានដឹកជញ្ជូនឧបករណ៍ធ្វើតេស្តចំនួន ១៥០.០០០ និងឈុតការពារវេជ្ជសាស្ត្រចំនួន ១៨.០០០ ទៅដល់ទីក្រុងម៉ានីល (កាលពីចុងសប្តាហ៍)។ សម្រាប់គ្រឿងបរិក្ខារផ្សេងៗទៀតត្រូវបានរំពឹងថា នឹងទៅដល់ទីក្រុងម៉ានីលក្នុងពេលឆាប់ៗនេះ»។
នៅក្នុងពិធីមួយនៅទីស្នាក់ការកណ្តាលនៃក្រសួងការបរទេស ឯកអគ្គរដ្ឋទូតចិន លោក Huang Xilian បានប្រគល់អំណោយនេះដល់រដ្ឋមន្រ្តីក្រសួងការបរទេសហ្វីលីពីន លោក Teodoro Locsin និងទីប្រឹក្សាសន្តិភាព លោក Carlito Galvez សម្រាប់ការអនុវត្តផែនការសកម្មភាពរបស់រដ្ឋាភិបាលហ្វីលីពីនដើម្បីប្រយុទ្ធប្រឆាំងនឹងជំងឺកូវីដ-១៩។
លោក Huang បាននិយាយនៅក្នុងសុន្ទរកថានៅក្នុងពិធីនោះថា «យើងប្តេជ្ញាបង្កើតភាពជាដៃគូថ្មីដែលជាគំរូល្អសម្រាប់កិច្ចសហប្រតិបត្តិការប្រឆាំងនឹងជំងឺរាតត្បាតអន្តរជាតិ»។
លោកបាននិយាយបន្ថែមថា «យើងនឹងឈររួមគ្នាជាមួយរដ្ឋាភិបាល និងប្រជាជនហ្វីលីពីន ដើម្បីរួមគ្នាយកឈ្នះលើមេររោគរាតត្បាតនេះរហូតដល់ថ្ងៃទទួលបានជ័យជម្នះចុងក្រោយ»។
លោកឯកអគ្គរដ្ឋទូតរូបនេះបាននិយាយថា ប្រទេសចិនកោតសរសើរចំពោះ «ការគាំទ្រ និងជំនួយដ៏មានតម្លៃ» របស់ប្រទេសហ្វីលីពីនក្នុងគ្រាដ៏លំបាកនៅពេលដែលប្រទេសចិនកំពុងដោះស្រាយជាមួយនឹងការផ្ទុះឡើងនៃជំងឺកូវីដ-១៩។
លោក Huang បាននិយាយថា «ដើម្បីទទួលបានការជួយពីហ្វីលីពីន នឹងបង្ហាញពីសាមគ្គីភាព និងភាពជាដៃគូរបស់យើង ប្រទេសចិនបានផ្តល់ការគាំទ្រ និងជំនួយដល់ប្រទេសហ្វីលីពីនឱ្យអស់ពីសមត្ថភាពតាំងពីពេលមានការផ្ទុះឡើងនៃជំងឺកូវីដ-១៩ នៅក្នុង ប្រទេសហ្វីលីពីនកាលពីដើមខែមីនាមកម៉្លេះ»៕
(ប្រភពព័ត៌មាន: AKP)
មតិពីមិត្តអ្នកអាន