បើតាមលោក Narongsak Osottanakorn ប្រធានដឹកនាំប្រតិបត្តិការជួយសង្រ្គោះមនុស្សទាំង១៣នាក់ ចេញពីក្នុងរូងភ្នំ Tham Luang នៅភាគខាងជើងប្រទេសថៃ បានឲ្យដឹងថាប្រតិបត្តិការត្រូវផ្អាកត្រឹមនេះសិន ហើយនឹងបន្តទៀតនៅចន្លោះ១០ទៅ២០ម៉ោងក្រោយ ដោយសារតែបំពង់ខ្យល់អុកស៊ីសែនត្រូវបានប្រើប្រាស់អស់ បូករួមជាមួយភាពហត់នឿយ ខណៈក្មេងៗចំនួនត្រឹម០៤នាក់ដំបូងប៉ុណ្ណោះ ត្រូវលោកបញ្ជាក់ថា ត្រូវបានជួយសង្រ្គោះចេញមកក្រៅដោយសុវត្ថិភាព រួចបញ្ជូនបន្តទៅកាន់មន្ទីរពេទ្យនៅខេត្តឈៀងរ៉ាយ។
លោក Narongsak បានបន្ថែមថា ប្រតិបត្តិការនាថ្ងៃអាទិត្យទី៨កក្កដា បានប្រព្រឹត្តទៅដោយរលូននិងទទួលបានជោគជ័យហួសពីការរំពឹងទុក តាមរយៈមធ្យោបាយនៃការជួយសង្រ្គោះក្មេងៗខាងលើ ដោយការមុជទឹកឆ្លងផ្លូវចេញពីក្នុងរូងភ្នំដ៏ជ្រៅនេះ។ សម្រាប់ក្មេងដែលនៅសល់ទាំង០៨នាក់ទៀត ព្រមទាំងគ្រូបង្វឹកម្នាក់របស់ពួកគេ គឺត្រូវរង់ចាំមួយរយៈពេលទៀត នៅកន្លែងដដែល គឺជិតតំបន់ដែលគេហៅថា Pattaya Beach ក្នុងរូងភ្នំ។
គួរជម្រាបថា នាព្រឹកថ្ងៃអាទិត្យ ទី៨កក្កដា អាជ្ញាធរបានសម្រេចចាប់ផ្តើមការជួយសង្រ្គោះមនុស្សទាំង១៣នាក់ ដែលបានជាប់ក្នុងរូងភ្នំ Tham Luang នៃស្រុកម៉ែសៃក្នុងខេត្តឈៀងរ៉ាយភាគខាងជើងប្រទេសថៃ តាំងពីថ្ងៃទី២៣ ខែមិថុនាមក ហើយទើបតែត្រូវបានរកឃើញកាលពីដើមខែកក្កដានេះ ឲ្យចេញមកខាងក្រៅវិញ តាមរយៈការបញ្ជូនក្រុមអ្នកជំនាញមុជទឹក ដើម្បីជួយអមដំណើរពួកគេ។ ក្មេងទាំង០៤នាក់ ខាងលើ ត្រូវបានជ្រើសរើសឲ្យចេញមកមុនគេ តាមរយៈការវាយតម្លៃទៅលើស្ថានភាពសុខភាពរបស់ពួកគេ ពោលអ្នកដែលមានកម្លាំងមាំទាំ ត្រូវយកចេញមកមុន ៕
(ប្រភពព័ត៌មាន: យោងតាម freshnewsasia.com)
មតិពីមិត្តអ្នកអាន