យុគសម័យ - យោងតាមទីភ្នាក់ងារសារព័ត៌មាន Reuters ថា ហុងកុងត្រូវជាប់គាំងនៅក្នុងវិបត្តិនយោបាយថ្មី នាថ្ងៃទី ៩ ខែមិថុនា ដែលពលរដ្ឋហុងកុងកន្លះលាននាក់ បានធ្វើបាតុកម្មប្រឆាំងសេចក្តីព្រាងច្បាប់ធ្វើបត្យាប័ន។ នេះត្រូវបានគេចាត់ទុកថាជាមហាបាតុកម្មដ៏ធំបំផុតនៅក្នុងតំបន់នេះក្នុងរយៈពេល ១៥ ឆ្នាំកន្លងទៅ។
អ្នកធ្វើបាតុកម្មនៅតាមផ្លូវហុងកុង
នេះជាមហាបាតុកម្មដ៏ធំបំផុតនៅក្នុងតំបន់នេះចាប់តាំងពីឆ្នាំ ២០០៣មក ដែលមនុស្សជាងកន្លះលាននាក់បានដើរតាមផ្លូវ ដើម្បីប្រឆាំងនឹងសេចក្តីព្រាងច្បាប់ធ្វើបត្យាប័នថ្មីរបស់ហ៊ុងកុង។ បាតុកម្មអហិង្សា បានបញ្ចប់នៅវេលាម៉ោង ១០ យប់ថ្ងៃទី ៩ ខែមិថុនា ហើយបាតុករភាគច្រើនបានបំបែកគ្នាជាបន្តបន្ទាប់ ប៉ុន្តែអំពើហិង្សាបានផ្ទុះឡើងរវាងយុវជនក្មេងៗដែលបន្តប្រមូលផ្ដុំខាងមុខអាគារសភាទីក្រុងហុងកុងនិងកម្លាំងប៉ូលិសដែលព្យាយាមទប់ស្កាត់ការប៉ុនប៉ងចូលអាគារពីសំណាក់បាតុករ។ ក្នុងការប៉ះទង្គិចដែលឈានចូលថ្ងៃទី ១០ ខែមិថុនានោះ មនុស្សជាច្រើនរាប់ទាំងប៉ូលិសផង បានរងរបួស និងត្រូវបានបញ្ជូនទៅកាន់មន្ទីរពេទ្យ ខណៈបាតុករច្រើននាក់ទៀត ត្រូវបានឃាត់ខ្លួន។
ពលរដ្ឋហុងកុងកន្លះលាននាក់ ធ្វើបាតុកម្មប្រឆាំងនឹងសេចក្តីព្រាងច្បាប់ធ្វើបត្យាប័ន
ជុំវិញគម្រោងច្បាប់ថ្មីនេះ មេដឹកនាំហុងកុងធ្លាប់បកស្រាយថា ជាការបំពេញចន្លោះបន្ថែមលើច្បាប់ដែលមានស្រាប់ ហើយមានគោលដៅបញ្ចប់ការយកហុងកុងជាឋានសួគ៌ដោយឧក្រិដ្ឋជនដីគោក ព្រោះចិន និងហុងកុងមិនមែនកិច្ចព្រមព្រៀងធ្វើបត្យាប័នពីមុនមកឡើយ។ លើសពីនោះ រដ្ឋាភិបាលហុងកុង ក៏ធ្លាប់អះអាងថា អ្នករិះគន់ដីគោក ឬក្រុមប្រឆាំងនៅហុងកុង នឹងមិនត្រូវបានធ្វើបត្យាប័នឡើយ។ គម្រោងធ្វើបត្យាប័ននេះ ក៏មិនមែនអនុវត្តតែជាមួយចិននោះដែរ។ បច្ចុប្បន្នហុងកុងមានកិច្ចព្រមព្រៀងបត្យាប័នជាមួយប្រទេសជំនួន ២០។
នៅពេលយប់ក្រុមហាបាតុកម្មនៅតែមានមនុស្សច្រើនណាស់
យ៉ាងណាមិញ ការបកស្រាយរបស់រដ្ឋាភិបាលហុងកុង មិនចូលត្រចៀកក្រុមមប្រឆាំងឡើយ ហើយនៅតែបារម្ភថា ក្រោមច្បាប់ថ្មី ពួកគេអាចត្រូវបញ្ជូនទៅកាន់ដីគោកគ្រប់ពេល។ តាមពិតទៅ អាជ្ញាធរហុងកុង ក៏បានធ្វើសម្បទានខ្លះហើយពេលក្រុមប្រឆាំងបង្ហាញការមិនពេញចិត្តនោះ។ ទីក្រុងហុងកុងធានាថាខ្លួននឹងពិចារណាសំណើសុំធ្វើបត្យាប័នតែបទល្មើសដែលត្រូវជាប់ពន្ធនាគារច្រើនជាង ៧ ឆ្នាំ ហើយសំណើត្រូវធ្វើដោយស្ថាប័នរដ្ឋអាជ្ញាកំពូលចិនទៀតផង។យ៉ាងណាមិញ អ្នកចូលរួមបាតុកម្មថ្ងៃទី៩ ខែមិថុនា ភាគច្រើនមិនជឿជាក់លើការធានានេះទៀតឡើយ៕
（ប្រែសម្រូលដោយសមុទ្រ）
មតិពីមិត្តអ្នកអាន