យុគសម័យ - ប៉ូលិសនូវែលសេឡង់បានបញ្ជាក់ថាមនុស្ស ៤៩ នាក់ត្រូវស្លាប់និងជាច្រើននាក់ទៀតរងរបួស នៅក្នុងករណីបាញ់ប្រហារពីរកន្លែងខុសគ្នា នៅក្នុងទីក្រុង Christchurch នៃប្រទេសនូវែលសេឡង់ ក្នុងនោះ មនុស្សចំនួន៤១នាក់ត្រូវបានស្លាប់នៅចំកន្លែងកើតហេតុនិងអ្នកផ្សេងទៀតត្រូវស្លាប់នៅមន្ទីរពេទ្យ។
មនុស្ស ៤៩ នាក់ត្រូវស្លាប់និងជាច្រើននាក់ទៀតរងរបួស នៅក្នុងករណីបាញ់ប្រហារលើវិហារអ៊ីស្លាម
បើតាមការលើកឡើងរបស់លោកស្រីនាយករដ្ឋមន្រ្តីនូវែលសេឡង់ Jacinda Ardern ករណីបាញ់ប្រហារយ៉ាងកក្រើកបែបនេះ គឺជាសកម្មភាពភេរវកម្មសុទ្ធសាធ ដែលត្រូវបានគ្រោងរៀបចំទុកជាមុនយ៉ាងហ្មត់ចត់។ មិនតែប៉ុណ្ណោះលោកស្រី ថែមទាំងបានសម្តែងការចូលរួមសោកស្តាយជាខ្លាំង ចំពោះជនរងគ្រោះទាំងអស់ និងថាសោកនាដកម្មនេះ គឺជាថ្ងៃដ៏ងងឹតសូន្យសុងបំផុតមួយសម្រាប់ប្រជាជាតិនូវែលសេឡង់ទាំងមូល។
គួរជម្រាបថា ព្រះវិហារអ៊ីស្លាមចំនួន ០២កន្លែងនៅក្នុងទីក្រុង Christchurch បានរងការបាញ់ប្រហារពីខ្មាន់កាំភ្លើងម្នាក់។ ក្នុងឃ្លីបវីដេអូមួយបង្ហោះលើបណ្តាញទំនាក់ទំនងសង្គម ខ្មាន់កាំភ្លើងម្នាក់នោះបានអះអាងថា ខ្លួនជាជនជាតិអូស្រ្តាលី និងមានឈ្មោះ Brenton Tarrant វ័យ ២៨ឆ្នាំ។ ជុំវិញហេតុការណ៍នេះដែរ ក៏មានការចែកចាយនូវឃ្លីបវីដេអូបង្ហាញពីសកម្មភាពបាញ់ប្រហាររបស់ជនដៃដល់ រួមទាំងឯកសារជាច្រើនទំព័ររបស់បុគ្គលរូបនោះផ្ទាល់ ដែលរៀបរាប់ពីជីវប្រវត្តិក៏ដូចជាមូលហេតុនៅពីក្រោយអ្វីដែលខ្លួនគេបានប្រព្រឹត្តផងដែរ៕
ការបាញ់ប្រហារនៅព្រះវិហារសាសនាអ៊ីស្លាមចំនួនពីរនៅខ័ណ្ឌ Hagley Park និងជាយក្រុង Linwood ទីក្រុង Christchurch នៅកោះខាងត្បូងនៃប្រទេសនូវែលសេឡង់ កើតមានឡើងនៅម៉ោង ១៣និង៤០នាទី (ម៉ោងវៀតណាមគឺ៧និង៤០នាទី)។ ជនសង្ស័យចំនួន ៤ នាក់ត្រូវបានប៉ូលីសចាប់ខ្លួននៅពេលក្រោយមក។ នាយករដ្ឋមន្ត្រីលោកស្រី Ardern បានហៅថា នេះជាថ្ងៃដ៏ខ្មៅងងឹតបំផុតរបស់នូវែលសេឡង់ ដែលជាប្រទេសដ៏ល្បីឈ្មោះដោយភាពសុខសន្តិភាពរបស់ខ្លួន៕ |
(សរុបព័ត៌មាន ដោយ ស្រីព្រេជ)
មតិពីមិត្តអ្នកអាន