យុគសម័យ - យោងតាមព្រះរាជក្រឹត្យចេញថ្ងៃទី១ខែ ឧត្តមសេនីយ៍ Apirat Kongsompong ត្រូវបានដំឡើងឋានៈជាមេបញ្ជាការកងទ័ពជើងគោក ដែលជាទីតាំងដែលគេជឿជាក់ថាមានអំណាចបំផុតនៅក្នុងប្រព័ន្ធមេបញ្ជាការកងទ័ពថៃជំនួសមេបញ្ជាការបច្ចុប្បន្នរបស់កងទ័ពជើងគោក ឧត្តមសេនីយ៍ Chalermchai Sitthisad។
រូបថតៈ bangkokpost.com
រួមជាមួយឧត្ដមសេនីយ៍ Apirat នៅមានមន្រ្តីយោធាចំនួន ៩៣៥ នាក់ផ្សេងទៀតត្រូវបានតែងតាំងនិងផ្ទេរតំណែងផ្សេងៗ ទៀតផង។ លោក Apirat Kongsompong ដែលជាមេបញ្ជាការរងកងទ័ពជើងគោកថៃ នឹងឡើងជាមេបញ្ជាការថ្មី ហើយនឹងបន្តរក្សាតួនាទីជាលេខាធិការនៃក្រុមប្រឹក្សាសន្តិភាពនិងសណ្តាប់ធ្នាប់ NCPO ព្រមទាំងជាមេបញ្ជាការនៃកងកម្លាំងរក្សាសន្តិភាពរបស់ស្ថាប័ននេះដដែល។ រីឯលោក Pornpipat Benyasri ដែលអគ្គសេនាធិការនៅទីបញ្ជាការដ្ឋានកងកម្លាំងប្រដាប់អាវុធថៃ នឹងក្លាយជាមេបញ្ជាការនៅទីនោះ។ ចំណែក លោក Adm Luechai ដែលជាមេបញ្ជាការរងទ័ពជើងទឹកថៃ នឹងឡើងតំណែងជាមេបញ្ជាការ ខណៈនៅក្នុងជួរទ័ពអាកាសថៃវិញលោក Chaiyapruk Ditsayasarin ដែលជាជំនួយការមេបញ្ជាការ ត្រូវបានដំឡើងតំណែងមេបញ្ជាការ។
គួរជម្រាបថា បើតាមការបញ្ជាក់ពីនាយករដ្ឋមន្រ្តីថៃ លោក Prayut Chan-o-cha មេបញ្ជាការកងទ័ពថ្មីទាំងនេះនៃកងកម្លាំងប្រដាប់អាវុធ នឹងស្បថចូលកាន់តំណែងជាផ្លូវការ នៅក្រោយថ្ងៃទី០១ ខែតុលា ហើយនឹងធ្វើការនៅក្រោមក្រុមប្រឹក្សា NCPO ដែលទំនងក្នុងនាមជាក្រុមចុងក្រោយ នៅមុនការបោះឆ្នោត ដែលគេរំពឹងថានឹងប្រព្រឹត្តទៅចន្លោះថ្ងៃទី២៤ ខែកុម្ភៈ និងថ្ងៃទី០៥ ខែឧសភា ឆ្នាំ២០១៩៕
(សរុបព័ត៌មាន ដោយ ស្រីព្រេជ)
មតិពីមិត្តអ្នកអាន