តុលាការកំពូលកូរ៉េខាងត្បូង នៅថ្ងៃទី ២៨ ខែវិច្ឆិកា បានបញ្ជាឲ្យបើកការកាត់ក្តីឡើងវិញជាលើកទី២ លើអតីតប្រធានាធិបតីអ្នកស្រី ប៉ាក ហ្គឺនហេ ។ ការដាក់បញ្ជា ធ្វើឡើងក្នុងគោលបំណងដាក់បន្ថែមទោសកាន់តែធ្ងន់លើលោកស្រី ក្នុងសំណុំរឿងយកលុយដោយខុសច្បាប់ពីភ្នាក់ងារចារកម្មរបស់ប្រទេសនេះ។
អតីតប្រធានាធិបតីកូរ៉េខាងត្បូង លោកស្រី ប៉ាក ហ្គឺនហេ (AFP)
លោកស្រី ប៉ាក ដែលជាប្រធានាធិបតីស្ត្រីទី១របស់ប្រទេសកូរ៉េខាងត្បូង ត្រូវបានដកហូតតំណែងក្នុងឆ្នាំ២០១៧ ក្រោយពីផ្ទុះបាតុកម្មតាមដងផ្លូវយ៉ាងច្រើនសម្បើមជុំវិញរឿងអាស្រូវដ៏កក្រើក។ បច្ចុប្បន្នលោកស្រី បានប្រឈមមុខការកាត់ទោសឡើងវិញដាច់ដោយឡែកមួយសម្រាប់បញ្ហាអំពើពុករលួយ និងការរំលោភអំណាចដែលអាចបន្ថែមទោស ២៥ឆ្នាំក្នុងពន្ធនាគារទៀត។
ការប្រកាសរបស់តុលាការកំពូលនៅថ្ងៃព្រហស្បតិ៍ ទី២៨ ខែវិច្ឆិកានេះ កើតឡើងក្រោយពីតុលាការឧទ្ធរណ៍មួយ បានសម្រាលទោសលោកស្រី ប៉ាក រយៈពេលមួយឆ្នាំ មកត្រឹម៥ឆ្នាំក្នុងពន្ធនាគារ ក្នុងសំណុំរឿងយកលុយពីភ្នាកងារសម្ងាត់ជាតិ។
ក្នុងសេចក្តីថ្លែងការណ៍ តុលាការកំពូលកូរ៉េខាងត្បូង បានបញ្ជាក់ឲ្យដឹងថា បទចោទប្រកាន់ដែលទម្លាក់ចោលនៅពេលប្តឹងឧទ្ធរណ៍នោះ គឺ ជាការយល់ខុសពីគោលការណ៍ច្បាប់ និងបានបញ្ជាថា លោកស្រី ប៉ាក គួរតែរកឃើញមានទោស។ ការផ្តន្ទាទោសនៅក្នុងសំណុំរឿងទាំងពីរត្រូវបានអនុវត្តជាបន្តបន្ទាប់ ហើយនេះមានន័យថាស្ត្រីអាយុ ៦៧ ឆ្នាំរូបនេះ នឹងមានអាយុដល់ ១០០ ឆ្នាំ នៅពេលនាងត្រូវបានដោះលែង។
សូមបញ្ជាក់ថា កាលពីខែមេសា ឆ្នាំ២០១៧ អតីតប្រធានាធិបតីកូរ៉េខាងត្បូងលោកស្រី ប៉ាក ហ្គឺនហេ រងការចោទប្រកាន់ចំនួន១៨ករណី ដូចជាការទទួលសំណូក ការបំពានអំណាច និងការបែកធ្លាយឯកសារសម្ងាត់របស់រដ្ឋ។ លោកស្រីក៏រងការចោទប្រកាន់លើករណីបើកដៃឲ្យលោកស្រី ឆយ ស៊ូនស៊ីល លូកលាន់កិច្ចការរដ្ឋ ទាំងខ្លួនមិនមែនជាមន្ត្រីរដ្ឋាភិបាល និងចូលដៃក្នុងការកៀបយកលុយពីក្រុមហ៊ុនធំៗរបស់កូរ៉េខាងត្បូងដូចជា Samsung និង Lotte ជាដើមក្នុងទំហំទឹកប្រាក់ចំនួន៧២លានដុល្លារ៕
（ប្រភព៖ thmeythmey）
មតិពីមិត្តអ្នកអាន