យុគសម័យ - ចំនួនមនុស្សបាត់បង់ជីវិត ដោយសារតែការវាយប្រហារដោយគ្រោះរញ្ជួយដីដ៏មានឥទ្ធិពល បូករួមជាមួយរលកយក្សនៅលើកោះ Sulawesi នៃប្រទេសឥណ្ឌូណេស៊ី បានកើនដល់៨៣២នាក់ហើយ ខណៈក្រុមជួយសង្រ្គោះ កំពុងខ្នះខ្នែងជាទីបំផុត ដើម្បីតាមស្វែងរកជនដែលអាចនៅរស់រានមានជីវិត ព្រមទាំងសាកសពអ្នកដែលស្លាប់ នៅតាមតំបន់នានា ដែលរងការវាយប្រហារ។
រយៈពេលពីរថ្ងៃបានកន្លងផុតទៅ ក្រោយគ្រោះរញ្ជួយដីកម្រិតធ្ងន់៧.៥រ៉ិចទ័រ (ពីដំបូង៧.៧រ៉ិចទ័រ) បានវាយប្រហារលើកោះ Sulawei និងបង្កជារលកយក្សយ៉ាងកក្រើកនោះ ចំនួនមនុស្សស្លាប់នៅតែបន្តកើនឡើងយ៉ាងគំហុក ហើយសាកសពជាច្រើនទៀត ត្រូវអាជ្ញាធររំពឹងថានឹងរកឃើញជាបន្តបន្ទាប់ ខណៈតួលេខនេះ ត្រូវអនុប្រធានាធិបតីឥណ្ឌូណេស៊ី បង្ហើបឲ្យដឹងថា អាចឈានដល់ខ្ទង់រាប់ពាន់នាក់ថែមទៀតផង។
ទីក្រុង Palu ត្រូវបំផ្លាញយ៉ាងធ្ងន់ធ្ងរក្រោយការរញ្ជួយដី ៧,៥ រិចទ័រ និងរលកស៊ូណាមិកម្ពស់ ២ម៉ែត្រ ។ សំណង់អគារផ្ទះសម្បែងត្រូវបាក់បែកខ្ទេចខ្ទី ។
ស្ថានជាច្រើនត្រូវបានបំផ្លាញ ទីក្រុងសល់តែកម្ទេចបាក់បែក
អគ្គិសនីត្រូវកាត់ផ្តាច់ទាំងស្រុង រីឯប្រព័ន្ធទាក់ទងក៏ជាប់គាំង ។ សមត្ថកិច្ចពិតជាប្រឈមការលំបាកជាច្រើនក្នុងប្រតិបត្តិការសង្គ្រោះ ។
ព្រះវិហារអ៊ីស្លាមត្រូវបានកម្ទេចដល់ដី ។ ពិសេសវាចំពេលដែលពលរដ្ឋអ៊ីស្លាមកំពុងចូលប្រណិបត្តិបួងសួង ។
បើតាមអ្នកនាំពាក្យទីភ្នាក់ងារគ្រប់គ្រងគ្រោះមហន្តរាយឥណ្ឌូណេស៊ី ប្រជាជនប្រមាណ២.៤លាននាក់ ត្រូវគេប៉ាន់ស្មានថា បានទទួលរងផលប៉ះពាល់ដោយសារតែគ្រោះធម្មជាតិដ៏អាក្រក់នេះ។ ទន្ទឹមនឹងនេះ មនុស្សរាប់រយនាក់ទៀត បានរងរបួស និងយ៉ាងតិចប្រហែល១៧,០០០នាក់ បានបាត់បង់ផ្ទះសម្បែងរបស់ពួកគេ។ ជាមួយគ្នានេះដែរ ទំហំទាំងស្រុងនៃការបំផ្លិចបំផ្លាញ ដោយសារគ្រោះរញ្ជួយដីនេះ នៅមិនទាន់អាចកំណត់ច្បាស់លាស់នៅឡើយទេ ខណៈប្រព័ន្ធអគ្គិសនី និងទំនាក់ទំនងត្រូវបានកាត់ផ្តាច់ ហើយផ្លូវថ្នល់ក៏ត្រូវខូចខាតទៀតនោះ ជាហេតុបង្កផលលំបាកខ្លាំងក្នុងការវាយតម្លៃទៅលើទំហំខូចខាត។
អង្គការសហប្រជាជាតិ បានធ្វើការជាមួយរដ្ឋាភិបាលប្រទេសនេះ ដើម្បីត្រៀមជួយឧបត្ថម្ភពេលមានសំណូមពរ ។
គួរជម្រាបថា កាលពីថ្ងៃសុក្រកន្លងទៅ រលកយក្សស៊ូណាមិ បានបោកសង្រ្គប់ទៅលើទីក្រុង Palu និងតំបន់ក្បែរខាងដទៃទៀត នៃកោះ Sulaweisi ពីព្រោះវាត្រូវបានមើលរលងដោយទីភ្នាក់ងារជំនាញរបស់ឥណ្ឌូណេស៊ី ដែលបានសម្រេចដកការព្រមានពីរលកយក្សវិញ ត្រឹមពេល៣៤នាទីប៉ុណ្ណោះ ក្រោយមានការវាយប្រហារពីរញ្ជួយដីកម្រិត៧.៥រ៉ិចទ័រ៕
(សរុបព័ត៌មាន ដោយ ស្រីព្រេជ)
មតិពីមិត្តអ្នកអាន