យុគសម័យ - នាយករដ្ឋមន្ត្រីអូស្ត្រាលីលោក Scott Morrison បាននិយាយថា ខ្មាន់កាំភ្លើងបាញ់ប្រហារដោយបង្ហូរឈាមនៅវិហារអ៊ីស្លាមចំនួនពីរនៅទីក្រុង Christchurch នៃប្រទេសនូវែលសេឡង់កាលពីថ្ងៃទី ១៥ ខែមីនា គឺជាពួកជ្រុលនិយមនិងគាំទ្រភេរវកម្ម។
នាយករដ្ឋមន្ត្រីអូស្ត្រាលីលោក Scott Morrison (រូបថតៈ AFP/TTXVN)
យោងតាមនាយករដ្ឋមន្ដ្រីលោក Scott Morrison មុខសញ្ញាក្នុងករណីបាញ់ប្រហារនេះ កើតនៅប្រទេសអូស្ត្រាលី។ ទោះជាយ៉ាងណា លោកបានបដិសេធមិនផ្តល់ព័ត៌មានលម្អិតបន្ថែមទៀត ហើយបានឲ្យដឹងថា មន្ត្រីនូវែលសេឡង់កំពុងស៊ើបអង្កេតលើករណីនេះ។
ក្នុងពេលជាមួយគ្នានោះ នាយករដ្ឋមន្ត្រីនូវែលសេឡង់លោកស្រី Jacinda Ardern បានឲ្យដឹងថា ចំនួនមនុស្សដែលត្រូវស្លាប់ក្នុងការវាយប្រហារបានកើនឡើងដល់ ៤៩ នាក់ ហើយអ្នករងរបួសច្រើនដែរ។ បើតាមការលើកឡើងរបស់លោកស្រីនាយករដ្ឋមន្រ្តីនូវែលសេឡង់ Jacinda Ardern ករណីបាញ់ប្រហារយ៉ាងកក្រើកបែបនេះ គឺជាសកម្មភាពភេរវកម្មសុទ្ធសាធ ដែលត្រូវបានគ្រោងរៀបចំទុកជាមុនយ៉ាងហ្មត់ចត់។ មិនតែប៉ុណ្ណោះលោកស្រី ថែមទាំងបានសម្តែងការចូលរួមសោកស្តាយជាខ្លាំង ចំពោះជនរងគ្រោះទាំងអស់ និងថាសោកនាដកម្មនេះ គឺជាថ្ងៃដ៏ងងឹតសូន្យសុងបំផុតមួយសម្រាប់ប្រជាជាតិនូវែលសេឡង់ទាំងមូល។
មុននេះប្រព័ន្ធផ្សព្វផ្សាយបានរាយការណ៍ថា យ៉ាងហោចណាស់ មានមុខសញ្ញាពីរនាក់បាន បាញ់ប្រហារទៅលើវិហារអ៊ីស្លាមពីរនៅក្នុងទីក្រុង Christchurch។ មុខសញ្ញាមួយបានពាក់ឯកសណ្ឋានយោធាដែលដឹកកាំភ្លើងស្វ័យប្រវត្តិ បានបាញ់ប្រហារនៅលើព្រះវិហារ Masjid Al Noor ក្នុងអំឡុងពេលនៃការអធិស្ឋាននៅពេលរសៀល។ ការបាញ់ប្រហារមួយផ្សេងទៀតបានកើតឡើងនៅវិហារមួយនៅ Linwood Masjid៕
(បកប្រែដោយ ស្រីព្រេជ)
មតិពីមិត្តអ្នកអាន