ប្រព័ន្ធផ្សព្វផ្សាយរដ្ឋរបស់ប្រទេសកូរ៉េខាងជើងបានរិះគន់ប្រទេសជប៉ុនចំពោះការរឹតត្បិតពាណិជ្ជកម្មរបស់ខ្លួននាពេលថ្មីៗនេះប្រឆាំងនឹងទីក្រុងសេអ៊ូលជុំវិញជម្លោះអំពីទាសភាពសម័យសង្គ្រាមដោយបានចោទប្រកាន់រដ្ឋាភិបាលក្រុងតូក្យូថាកំពុងបំផ្លិចបំផ្លាញនិន្នាការសន្តិភាពនៅលើឧបទ្វីបកូរ៉េ។
លោក មូន ជេអ៊ីន ប្រធានាធិបតីកូរ៉េខាងត្បូង។
បន្ទាប់ពីតុលាការជាន់ខ្ពស់កូរ៉េខាងត្បូងបញ្ជាឲ្យក្រុមហ៊ុនជប៉ុនដែលប្រើកម្លាំងពលកម្មដោយបង្ខំឲ្យទូទាត់សំណងដល់ជនរងគ្រោះជនជាតិកូរ៉េ, ទីក្រុងតូក្យូកាលពីដើមខែនេះបានរឹតត្បិតការនាំចេញសារធាតុគីមីជាច្រើនទៅឲ្យកូរ៉េខាងត្បូងដែលមានសារៈសំខាន់ចំពោះក្រុមហ៊ុនផលិតបន្ទះឈីបនិងស្មាតហ្វូនឈានមុខគេនៅក្នុងពិភពលោក។
ប្រធានាធិបតីកូរ៉េខាងត្បូងលោក មូន ចេអ៊ីន ដែលគាំទ្រការផ្សះផ្សារជាមួយទីក្រុងព្យុងយ៉ាងបាននិយាយថា ទង្វើរបស់ទីក្រុងតូក្យូមានហេតុផលខាងនយោបាយហើយបានបង្កឲ្យមានភាពអាសន្នមួយដែលមិនធ្លាប់មានពីមុនមកចំពោះសេដ្ឋកិច្ចដែលជំរុញដោយការនាំចេញរបស់ទីក្រុងសេអ៊ូល។
ប្រទេសកូរ៉េខាងជើងបានព្រមានម្តងហើយម្តងទៀតឲ្យកូរ៉េខាងត្បូងបញ្ឈប់ការជ្រៀតជ្រែកនៅក្នុងការចរចានុយក្លេអ៊ែររវាងទីក្រុងព្យុងយ៉ាងនិងទីក្រុងវ៉ាស៊ីនតោនប៉ុន្តែនៅពេលនេះបានគាំទ្រទីក្រុងសេអ៊ូលសម្រាប់ជម្លោះពាណិជ្ជកម្មជាមួយទីក្រុងតូក្យូ។
ទីភ្នាក់ងារសារព័ត៌មានកណ្តាលរបស់កូរ៉េខាងជើង (KCNA) បាននិយាយថា ប្រទេសជប៉ុនកំពុងព្យាយាមបំផ្លាញនិន្នាការនៃសន្តិភាពនៅលើឧបទ្វីបកូរ៉េដោយការដាក់សម្ពាធលើប្រទេសកូរ៉េខាងត្បូងតាមរយៈការរឹតបន្តឹងហើយបានចាត់ទុកប្រទេសជប៉ុនថាជា “សត្រូវនៃពាក្យសន្យា” របស់ខ្លួន។
កូរ៉េខាងជើងស្តីបន្ទោសជប៉ុន ជុំវិញបញ្ហាជម្លោះពាណិជ្ជកម្មជាមួយទីក្រុងសេអ៊ូល
ទីភ្នាក់ងារនេះបានបន្ថែមថា “ការខូចខាតមនុស្ស រាងកាយនិងផ្លូវចិត្តដែលជប៉ុនបង្កឡើងចំពោះប្រជាជនកូរ៉េអំឡុងការគ្រប់គ្រងអាណានិគមរបស់ខ្លួនគឺមិនអាចទូទាត់សងបានទេសូម្បីតែប្រទេសជប៉ុនទាំងមូលបូជាខ្លួនដោយផ្ទាល់ក៏ដោយ”។
គួរបញ្ជាក់ថា ភាពតានតឹងបានកើនឡើងកាលពីថ្ងៃសុក្រនៅពេលបុរសកូរ៉េខាងត្បូងក្នុងវ័យ៧០ឆ្នាំម្នាក់បានស្លាប់បន្ទាប់ពីដុតខ្លួននៅខាងក្រៅស្ថានទូតជប៉ុនក្នុងទីក្រុងសេអ៊ូលហើយរដ្ឋមន្ត្រីការបរទេសជប៉ុនបានកោះហៅឯកអគ្គរដ្ឋទូតកូរ៉េខាងត្បូងប្រចាំទីក្រុងតូក្យូជុំវិញបញ្ហាជម្លោះនេះ៕
（យោងតាម postkhmer សរុបដោយវិច្ឆិកា）
មតិពីមិត្តអ្នកអាន