យុគសម័យ - អង្គការសុខភាពពិភពលោក (WHO) បានកោតសរសើរសមិទ្ធផលនៃការបង្ការទប់ស្កាត់នឹង COVID-19 របស់បណ្ដាប្រទេស ប៉ុន្តែក៏បានអំពាវនាវឱ្យមាន “ការប្រុងប្រយ័ត្នខ្ពស់”នៅពេលដែលប្រញាប់បន្ធូរការរឹតត្បិតនិងការដាក់នៅដាច់ដោយឡែក។
WHO អំពាវនាវឱ្យបណ្ដាប្រទេសឱ្យមាន “ការប្រុងប្រយ័ត្នខ្ពស់” នៅពេលដែលប្រញាប់បន្ធូរការរឹតត្បិត COVID-19
បណ្តាប្រទេសអឺរ៉ុប ក៏ដូចជាប្រទេសមួយចំនួន បានបន្ធូរបន្ថយការរឹតត្បិតនៅក្នុងប្រទេសជាបណ្តើរៗហើយគិតមកត្រឹមថ្ងៃទី ១១ ខែឧសភានេះ។ ការសម្រេចបែបនេះ ធ្វើឡើងបន្ទាប់ពីស្ថានភាពឆ្លង និងស្លាប់ដោយសារកូរ៉ូណាវីរុស បានធ្លាក់ចុះ។ ទាក់ទងនឹងបញ្ហានេះ លោក Tedros Adhanom Ghebreyesus នាយកអង្គការសុខភាពពិភពលោក បានសរសើរថា វាគឺជារឿងល្អសម្រាប់ប្រទេសទាំងអស់ ដែលមានដំណោះស្រាយល្អ ក្នុងការកាត់បន្ថយអត្រាឆ្លង និងការពារអាយុជីវិតប្រជាជន។បុគ្គលិកសុខាភិបាលមាប់មគសាលាមួយនៅទីក្រុងសេអ៊ូលប្រទេសកូរ៉េខាងត្បូងដើម្បីបង្ការទប់ស្កាត់នឹង COVID-19។
យ៉ាងណាក៏ដោយ បើទោះបីជាមានករណីឆ្លង និងស្លាប់ធ្លាក់ចុះក៏ពិតមែន អង្គការ WHO នៅតែជំរុញឲ្យប្រទេសមួយចំនួន មានការប្រុងប្រយ័ត្នជាងមុនផងដែរ ដើម្បីបង្ការការកើនឡើងករណីឆ្លងជាថ្មី។ បើតាមលោក Michael Ryan នាយកប្រតិបត្តិWHOទទួលបន្ទុកកម្មវិធីអាសន្ន ក៏បានសាទរការធ្លាក់ចុះនៃតួលេខអ្នកឆ្លងដែរ និងបញ្ជាក់ថា ស្ថានភាពដ៏ល្អនេះ គឺជាសញ្ញានៃក្តីសង្ឃឹម។ យ៉ាងណាក៏ដោយ លោក Ryan ក៏បានស្នើប្រទេសទាំងអស់ឲ្យមាន «ការប្រុងប្រយ័ត្នខ្ពស់» ព្រោះវីរុសមួយនេះ អាចឆ្លងទៅមនុស្សជាច្រើនឡើងវិញ ក្នុងអំឡុងពេលបើកប្រទេស និងការបន្ធូរបន្ថយការរឹតត្បិតការធ្វើដំណើរ។បន្ថែមពីលើនេះ WHO ក៏បានអំពាវនាវឲ្យមានការពន្លឿនការឆ្លើយតបប្រឆាំងកូរ៉ូណាវីរុស ការធានាពីការរកឃើញករណីឆ្លងថ្មីៗ និងការព្យាយាមស្វែងរកមនុស្សមួយចំនួន ដែលមានការពាក់ព័ន្ធនឹងអ្នកជំងឺ COVID-19។ ចំណាត់ការបែបនេះ គឺដើម្បីទប់ស្កាត់រលកឆ្លងលើកទីពីរ នៃ COVID-19។ ទោះជាបែបនេះក្តី អង្គការសុខភាពពិភពលោក ក៏បានទទួលស្គាល់ផងដែរថា មានប្រទេសមួយចំនួន បានចាត់វិធានការពារ និងស្វែងរក COVID-19 ខណៈប្រទេសមួយចំនួន មិនអនុវត្តវិធានស្រាវជ្រាវឡើយ។
សូមបញ្ជាក់ថា គិតត្រឹមថ្ងៃទី១១ ខែឧសភា ពិភពលោកមានករណី COVID-19 សរុបចំនួន ៤,២៥លានករណី អ្នកស្លាប់មានចំនួនជិត ២៩ម៉ឺននាក់ និងអ្នកជាសះស្បើយមានចំនួនជាង ១,៥លាននាក់៕(បកប្រែដោយសាមេត)
មតិពីមិត្តអ្នកអាន