យុគសម័យ - នាថ្ងៃទី ៤ ខែកក្កដា នៅទីក្រុងហ្សឺណែវ (ស្វីស) ក្នុងក្របខ័ណ្ឌនៃ កិច្ចប្រជុំលើកទី ៤១ នៃក្រុមប្រឹក្សាសិទ្ធិមនុស្សអង្គការសហប្រជាជាតិ បានប្រព្រឹត្តទៅកិច្ចប្រជុំមួយដើម្បីអនុម័តលើរបាយការណ៍របស់វៀតណាម ដែលអនុលោមតាមយន្តការត្រួតពិនិត្យជាសកលតាមកាលកំណត់ (UPR) វដ្ឋទី៣។
អនុរដ្ឋមន្ត្រីការបរទេសវៀតណាមលោក Le Hoai Trung ថតរូបជាមួយតំណាងអន្តរជាតិដែលចូលរួមក្នុងកិច្ចប្រជុំ (រូបថតៈ ក្រសួងការបរទេសផ្តល់)
ក្នុងកិច្ចជំនួបនេះ អនុរដ្ឋមន្រ្តីក្រសួងការបរទេសវៀតណាម លោក Le Hoai Trung បានអះអាងជាថ្មីម្តងទៀត នូវគោលនយោបាយមុនក៏ដូចជាក្រោយរបស់វៀតណាម អំពីកិច្ចការពារនិងជំរុញសិទិ្ធមនុស្ស ដែលផ្តើមចេញពីប្រពៃណីប្រវត្តិសាស្ត្ររបស់វៀតណាម ក្នុងដំណើរការតស៊ូដើម្បីកសាងនិងថែរក្សាប្រទេសជាតិ។ គោលដៅរបស់បក្សនិងរដ្ឋវៀតណាមជានិច្ចកាលយកប្រជាជនជាកណ្តាលនៃគោលនយោបាយនិងសកម្មភាពទាំងអស់។
អនុរដ្ឋមន្ត្រីលោក Le Hoai Trung បានសង្កត់ធ្ងន់ថា អាទិភាពខ្ពស់បំផុតរបស់វៀតណាមគឺកសាងរដ្ឋនីតិរដ្ឋនិងកំណែទម្រង់ច្បាប់ ដូចដែលបានបង្ហាញនៅក្នុងសកម្មភាពជាច្រើននៃកិច្ចប្រជុំលើកទី៧ រដ្ឋសភាវៀតណាមនីតិកាលទី១៤ ដែលត្រូវបានអ្នកបោះឆ្នោតទូទាំងប្រទេសនិងសាធារណមតិផ្តោតការយកចិត្តទុកដាក់ពិសេស ព្រមទាំងបានចេញផ្សាយនូវសេចក្តីសម្រេចចិត្តនិងសារាចរសំខាន់មួយចំនួន ទាក់ទងនឹងសិទ្ធិមនុស្សក្នុងឆ្នាំ ២០១៩។
អនុរដ្ឋមន្ត្រីលោក Le Hoai Trung បានជម្រាបក្រុមប្រឹក្សាសន្តិសុខអង្គការសហប្រជាជាតិអំពីការដែលវៀតណាមទទួលយកនូវអនុសាសន៍ចំនួន ២៤១ ក្នុងចំណោមអនុសាសន៍សរុបចំនួន ២៩១ ដោយបណ្តាប្រទេសដាក់ចេញ ពោលគឺសម្រេចបានអត្រាជិត ៨៣%។ ទាំងនេះគឺជាខ្លឹមសារដ៏សំខាន់និងទូលំទូលាយនៃកិច្ចការពារសិទិ្ធមនុស្ស ជាពិសេសការលើកកម្ពស់ប្រព័ន្ធច្បាប់និងវិធានការដើម្បីធានាសិទ្ធិស៊ីវិលនិងសិទ្ធិនយោបាយក៏ដូចជាសិទ្ធិសេដ្ឋកិច្ច សង្គមវប្បធម៌និងការពង្រឹងស្ថាប័នសិទ្ធិមនុស្ស រួមទាំងបញ្ហាថ្មីៗស្តីពីការធ្វើចំណាកស្រុក ការប្រែប្រួលអាកាសធាតុ បរិស្ថាននិងការអភិវឌ្ឍប្រកបដោយចីរភាព៕
(ប្រែសម្រូលដោយស្រីពេជ្រ)
មតិពីមិត្តអ្នកអាន