យុគសម័យ - នាថ្ងៃទី២៥ ខែមីនា លោកនាយករដ្ឋមន្រ្តីវៀតណាម Nguyen XuanPhuc បានអញ្ជើញផ្ញើរលិខិតលើកទឹកចិត្តគ្រូពេទ្យ មន្ត្រីនិងបុគ្គលិកផ្នែកសុខាភិបាល។
លោកនាយករដ្ឋមន្រ្តីវៀតណាម Nguyen Xuan Phuc (រូបថត៖ thanhtra.com.vn)
ក្នុងលិខិតនេះ លោកនាយករដ្ឋមន្រ្តីវៀតណាម Nguyen Xuan Phuc បានលើកច្បាស់ថា ការងារប្រយុទ្ធប្រឆាំងនឹងជំងឺកូវីដ១៩ (Covid-19) នៅវៀតណាម សម្រេចបាននូវលទ្ធផលសំខាន់ៗ រួមទាំងបានទប់ស្កាត់ការរីករាលដាលជំងឺពីខាងក្រៅ និងគ្រប់គ្រងបានល្អចៀសវាងពីការឆ្លងរាលដាលក្នុងសហគមន៍ផងដែរ។
ទន្ទឹមនឹងនេះដែរ លោកក៏បានបណ្ដាឲ្យគ្រូពេទ្យ មន្ត្រីនិងបុគ្គលិកខាងសុខាភិបាល មិនត្រឹមតែពង្រីកប្រពៃណី បញ្ហាប្រាជ្ញានិងឬទ្ធានុភាពគួរឲ្យមោទនភាពរបស់ផ្នែកសុខាភិបាលវៀតណាមទាំងមូលប៉ុណ្ណោះទេ ថែមទាំងរួមចំណែកផ្តល់ជំនឿទុកចិត្ត និងកម្លាំងចលករឲ្យបានល្អថែមទៀត ដើម្ប្រប្រយុទ្ធប្រឆាំងនឹងជំងឺឆ្លងនេះប្រកបដោយជោគជ័យទៀតផង។ សំណាក់គ្រូពេទ្យបានចាត់ទុកជាកម្លាំងឈានមុខគេក្នុងការប្រយុទ្ធប្រឆាំងនឹងជំងឺកូវីដ១៩ផងដែរ។
ក្នុងបរិបទដែលស្ថានភាពជំងឺកូវីដកាន់តែវិវឌ្ឍន៍ដ៏ស្មុគស្មាញនោះ លោកនាយករដ្ឋមន្រ្តីវៀតណាមបានស្នើឲ្យគ្រូពេទ្យ មន្ត្រី និងបុគ្គលិកខាងសុខាភិបាលនៅទូទាំងប្រទេស ចាំបាច់ត្រូវមានការប្ដេជ្ញាចិត្តខ្ពស់ ក៏ដូចជាមានទំនួលទុកចិត្តច្រើនថែមទៀត ដើម្បីរួមដៃជាមួយប្រជាជនទាំងមូលទប់ស្កាត់ជំងឺរាតត្បាតដ៏កាចសាហាចនេះប្រកបដោយជោគជ័យផងដែរ។
ជាទីបញ្ចប់ លោកនាយករដ្ឋមន្រ្តីក៏បានស្នើឲ្យជនរួមជាតិទូទាំងប្រទេស បន្តលើកទឹកចិត្ត ចែករំលែក រួមដៃគាំទ្រចំពោះកម្លាំងយុទ្ធជន «ពាក់អាវស» ក្នុងការប្រយុទ្ធប្រឆាំងនឹងជំងឺកូវីដ១៩ដើម្បីយកឈ្នះលើជម្ងឺនេះឲ្យបានឆាប់ៗតែម្តង៕
(បកប្រែដោយ ហេងវុធ្ធី)
មតិពីមិត្តអ្នកអាន