យុគសម័យ - យន្តហោះដឹកលោកនាយករដ្ឋមន្រ្តីជប៉ុន Suga Yoshihide និងភរិយាបានចុះចតនៅអាកាសយានដ្ឋានអន្តរជាតិ Noi Bai នាវេលាម៉ោង ១៧ និង ៥០ នាទីថ្ងៃទី ១៨ ខែតុលា ដោយចាប់ផ្តើមដំណើរទស្សនកិច្ចផ្លូវការរយៈពេល ២ ថ្ងៃនៅប្រទេសវៀតណាម។
លោកនាយករដ្ឋមន្រ្តីជប៉ុន Suga Yoshihide
នារសៀលថ្ងៃទី ១៨ ខែតុលាឆ្នាំ ២០២០ នាយករដ្ឋមន្រ្តីជប៉ុន លោក Suga Yoshihide និងលោកស្រីភរិយាបានចាប់ផ្តើមបំពេញទស្សនកិច្ចជាផ្លូវការនៅវៀតណាម តបតាមការអញ្ជើញរបស់នាយករដ្ឋមន្រ្តីវៀតណាមលោក Nguyen Xuan Phuc ។ នេះជាដំណើរទស្សនកិច្ចក្រៅប្រទេសជាលើកដំបូងរបស់លោកនាយករដ្ឋមន្រ្តី Suga Yoshihide ក្រោយពីលោកបានទទួលតំណែងជានាយករដ្ឋមន្ត្រី។ លោក Suga Yoshihide ក៏ជានាយករដ្ឋមន្រ្តីជប៉ុនទីពីរជាបន្តបន្ទាប់ ដែលបានជ្រើសរើស វៀតណាមជាប្រទេសដើមដំបូង ដើម្បីមកបំពេញទស្សនកិច្ច ក្រោយពេលទទួលតំណែងផងដែរ។ ដំណើរទស្សនកិច្ចជាផ្លូវការនៅវៀតណាមរបស់នាយករដ្ឋមន្រ្តីលោក Suga Yoshihide និងលោកស្រីភរិយាបានប្រព្រឹត្តិទៅ ក្នុងបរិបទ ដែលទំនាក់ទំនងភាពជាដៃគូយុទ្ធសាស្រ្តដ៏ទូលំទូលាយវៀតណាម - ជប៉ុនបន្តអភិវឌ្ឍន៍យ៉ាងល្អប្រសើរនិងខ្លាំងក្លាលើគ្រប់វិស័យ ជំនឿទុកចិត្តនយោបាយកាន់តែត្រូវបានពង្រឹង ហើយបណ្ដាដំណើរទស្សនកិច្ចនៅគ្រប់ជាន់ថ្នាក់ ជាពិសេសគឺថ្នាក់ជាន់ខ្ពស់រវាងប្រទេសទាំងពីរត្រូវបានថែរក្សាជាប្រចាំក្នុងក្រខ័ណ្ឌបក្ស រដ្ឋ រដ្ឋាភិបាល និងរដ្ឋសភាផងដែរ៕
（ប្រែសម្រួលដោយ ហេង វុធ្ធី）
（ប្រភពព័ត៌មាន: thoidai.com.vn）
មតិពីមិត្តអ្នកអាន