នាយករដ្ឋមន្រ្តីជប៉ុនបានស្នើចិនអោយមានកប្បកិរិយាអត់ធ្មត់ចំពោះបញ្ហាសមុទ្រខាងកើត

លោកនាយករដ្ឋមន្រ្តីជប៉ុន Abe Shinzo (រូបថតៈ Reuters)

នាថ្ងៃទី២៣ ខែតុលា លោកនាយករដ្ឋមន្រ្តីជប៉ុន Abe Shinzo បានជួបពិភាក្សាជាមួយថ្នាក់ដឹកនាំនៃបណ្តាប្រទេសក្នុងតំបន់និងអង្គការអន្តរជាតិនានា ក្នុងឱកាសចូលរួមពិធីគ្រងរាជ្យសម្បត្តិរបស់ព្រះចៅអធិរាជ Naruhito។ លោកនាយករដ្ឋមន្រ្តី Abe បានជួបពិភាក្សាជាមួយអនុប្រធានរដ្ឋចិន លោក Wángqíshàn រួមជាមួយនាយករដ្ឋមន្រ្តីអាល្លឺម៉ង់ សឹង្ហបុរីនិងថៃផងដែរ។

ក្នុងជំនួបជាមួយអនុប្រធានរដ្ឋចិន លោក Wángqíshàn ភាគីទាំងពីរបានឯកភាពលើវិធានការណ៍នានា សំដៅអភិវឌ្ឍទំនាក់ទំនងទ្វេភាគីបន្ថែមទៀត ដើម្បីអនុវត្តប្រកបដោយជោគជ័យ នូវដំណើរទស្សនកិច្ចរបស់ប្រធានរដ្ឋចិន លោក Xi Jinping នៅប្រទេសជប៉ុន គ្រោងនឹងប្រព្រឹត្តទៅនារដូវផ្ការីកឆ្នាំ ២០២០។ មេដឹកនាំទាំងពីរក៏បានឯកភាពគ្នាក្នុងការបង្កើនកិច្ចសហប្រតិបត្តិការសេដ្ឋកិច្ចនិងវិជ្ជាជីវៈរវាងភាគីទាំងពីរ។

លោកនាយករដ្ឋមន្រ្តី Abe បានស្នើឱ្យចិនត្រូវអត់ធ្មត់នូវសកម្មភាពថ្មីៗនេះរបស់ខ្លួននៅក្នុងតំបន់សមុទ្រខាងកើត ដែលប៉ះពាល់ដល់សន្តិសុខដែនសមុទ្រក្នុងតំបន់។ លោក Abe ក៏បានលើកឡើងនូវការព្រួយបារម្ភ ចំពោះការដែល នាវារបស់ចិនបានលុកលុយដែនទឹក សមុទ្រ Senkaku/Diaoyu ដែលកំពុងជាប់ជម្លោះជាមួយជប៉ុន ហើយជប៉ុនអះអាងអធិបតេយ្យភាព។

នៅក្នុងបណ្តាកិច្ចពិភាក្សាជាមួយអធិការបតីអាល្លឺម៉ង ថៃ និងសឹង្ហបូរី នាយករដ្ឋមន្រ្តី លោក Abe បានវាយតម្លៃខ្ពស់ចំពោះទំនាក់ទំនងល្អរវាងជប៉ុននិងបណ្តាប្រទេសនេះ ព្រមទាំងបានសន្យាថានឹងខិតខំលើកកម្ពស់ទំនាក់ទំនងនោះលើគ្រប់វិស័យ៕

（បកប្រែដោយ ស្រីព្រេជ）

（បកប្រែដោយ ស្រីព្រេជ）