យុគសម័យ - នាថ្ងៃទី ១៩ ខែឧសភា ធនាគារពិភពលោកប្រចាំនៅវៀតណាម (WB) បាននិយាយថា ធនាគារពិភពលោកទើបតែបានចេញផ្សាយរបាយការណ៍ស្តីពី “ ការពង្រឹងធ្វើសមាហរណកម្មអន្តរជាតិនិងការអនុវត្តកិច្ចព្រមព្រៀងពាណិជ្ជកម្មសេរីរវាងសហភាពអឺរ៉ុប - វៀតណាម” ។
លោក Ousmane Dione នាយកគ្រប់គ្រងធនាគារពិភពលោកប្រចាំនៅវៀតណាម (រូបថត៖ vnanet)
វៀតណាមចាំបាច់ត្រូវបញ្ចប់ក្របខ័ណ្ឌច្បាប់និងលើកកំពស់សមត្ថភាពក្នុងការអនុវត្តកិច្ចព្រមព្រៀង ដើម្បីទទួលបានផលប្រយោជន៍យ៉ាងពេញលេញពីកិច្ចព្រមព្រៀងពាណិជ្ជកម្មសេរីរវាងសហភាពអឺរ៉ុប - វៀតណាម (EVFTA)។ នេះគឺជាអនុសាសន៍មួយដែលត្រូវបានធនាគារពិភពលោក (WB) លើកឡើងក្នុងរបាយការណ៍នាពេលថ្មីៗនេះ កាលពីថ្ងៃទី ១៩ ឧសភាក្រោមចំណងជើងថា “ ការពង្រឹងធ្វើសមាហរណកម្មអន្តរជាតិនិងការអនុវត្តកិច្ចព្រមព្រៀងពាណិជ្ជកម្មសេរី EVFTA ។
យោងតាមរបាយការណ៍នេះ គេបានប៉ាន់ស្មានថាការទាញយកផលប្រយោជន៍ពីពន្ធអនុគ្រោះដែលត្រូវបានអនុវត្តតាមកិច្ចព្រមព្រៀង EVFTA អាចជួយឲ្យ GDP របស់វៀតណាមកើនឡើង ២,៤% ហើយការនាំចេញកើនឡើង ១២% នៅឆ្នាំ ២០៣០ ព្រមទាំងមានមនុស្សចំនួន ១០០.០០០ - ៨០០.០០០ នាក់បន្ថែមទៀតនឹងរួចផុតពីភាពក្រីក្រនៅឆ្នាំ ២០៣០ផងដែរ។ អត្ថប្រយោជន៍ទាំងនេះគឺចាំបាច់ណាស់ដើម្បីរក្សាបាននូវលទ្ធផលសេដ្ឋកិច្ចវិជ្ជមាន ខណៈដែលប្រទេសវៀតណាមនេះកំពុងទប់ស្កាត់នឹងការរីករាល ដាលនៃជំងឺ COVID-19 ផងដែរ។
របាយការណ៍ក៏បានអះអាងថាអត្ថប្រយោជន៍ពីការចូលរួមកិច្ចព្រមព្រៀងពាណិជ្ជកម្មជំនាន់ថ្មីដូចជា EVFTA និងកិច្ចព្រមព្រៀង CPTPP គឺកាន់តែកើនឡើងជាច្រើនថែមទៀតប្រសិនបើវៀតណាមអនុវត្តរបៀបវារៈស្តីពីការធ្វើកំណែទម្រង់សេដ្ឋកិច្ចនិងនិតិវិធីគ្រប់ជ្រុងជ្រោយ ដើម្បីប្រកាន់ខ្ជាប់ទៅតាមបទប្បញ្ញត្តិដែលមិនពាក់ព័ន្ធនឹងពន្ធគយក្នុងកិច្ចព្រមព្រៀងទាំងនេះ។ ទន្ទឹមនឹងនេះដែររបាយការណ៍បានប៉ាន់ប្រមាណថាការកែទម្រង់ទាំងនេះនឹងបង្កើត “ការជំរុញផលិតភាព” ដែលជួយបង្កើនផលិតផលក្នុងស្រុកសរុបឡើងដល់ ៦,៨% បើប្រៀបធៀបនឹងសេណារីយ៉ូមូលដ្ឋានដែលបានរំពឹងទុកនៅឆ្នាំ ២០៣០ផងដែរ។
លោក Ousmane Dione នាយកគ្រប់គ្រងធនាគារពិភពលោកប្រចាំនៅវៀតណាមបានអះអាងថាប្រសិនបើធ្វើសកម្មភាពយ៉ាងប្តូផ្តាច់ ដើម្បីបង្រួមគម្លាតនៃសមត្ថភាពអនុវត្តនិងភាពស្របច្បាប់នោះ វៀតណាមអាចទាញយកបាននូវផលប្រយោជន៍ជាអតិបរមានពីកិច្ចព្រមព្រៀងពាណិជ្ជកម្មនេះ ដោយប៉ាន់ស្មានថានឹងទទួលបាន កំរិតធំសម្បើមដែលមិនធ្លាប់មានពីមុនមកក្នុងប្រវត្តិសាស្ត្រផងដែរ៕
（បកប្រែដោយ ហេងវុធ្ធី）
（ប្រភពព័ត៌មាន: vietnamplus.vn）
មតិពីមិត្តអ្នកអាន