យុគសម័យ - នារសៀលថ្ងៃទី១៦ខែកក្កដា សមាជិកមជ្ឈឹមបក្ស អនុប្រធានរដ្ឋសភាវៀតណាម លោក Phung Quoc Hien បានអញ្ជើញទទួលជួបជាមួយគណៈប្រតិភូសភាអូស្ត្រាលី ដឹកនាំដោយប្រធានគណកម្មការតម្កល់ឯកសារនៃសភាអូស្ត្រាលី លោក Rowan Ramsay ដែលកំពុងធ្វើទស្សនកិច្ចការងារនៅវៀតណាម។
អនុប្រធានរដ្ឋសភា លោក Phung Quoc Hien អញ្ជើញទទួលជួបជាមួយលោក Rowan Ramsay (ប្រភពរូប ៖ Quang Khanh )
ក្នុងជំនួបនេះ អនុប្រធានរដ្ឋសភា លោក Phung Quoc Hien បានជឿជាក់ថា តាមរយៈដំណើទស្សនកិច្ចនេះ គណៈប្រតិភូតម្កល់ឯកសារនៃសភាអូស្ត្រាលី នឹងជ្រាបបាននូវស្ថានភាពជាក់ស្តែងនៅវៀតណាម បើកចេញឱកាសដើម្បីជម្រុញការជួបប្រាស្រ័យរវាងសមាជិកសភានៃប្រទេសទាំងពីរ រួមចំណែកពង្រឹងនិងពង្រីកភាពជាដៃគូយុទ្ធសាស្ត្រវៀតណាម-អូស្ត្រាលី ក្នុងបរិបទដែលប្រទេសទាំងពីររំលឹកខួបលើកទី៤៥នៃទិវាបង្កើតទំនាក់ទំនងការទូត។
ធ្វើការឆ្លើយតបវិញ ប្រធានគណកម្មការតម្កល់សភាអូស្ត្រាលី លោក Rowan Ramsay បានវាយតម្លៃខ្ពស់ចំពោះការដែលវៀតណាមបានចូលរួមយ៉ាងសកម្មទៅក្នុងសកម្មភាពរបស់កងកម្លាំងរក្សាសន្តិភាពអង្គការសហប្រជាជាតិនិងគោរពច្បាប់អន្តរជាតិក្នុងការដោះស្រាយបញ្ហាសមុទ្រខាងកើត។ លោករូបនេះក៏បានសម្តែងនូវការកោតសរសើរដោយឃើញថា វៀតណាមទទួលបានស្នាដៃគួរឲ្យកត់សម្គាល់ក្នុងការអភិវឌ្ឍសេដ្ឋកិច្ច - សង្គម ជាពិសេសគឺកាត់បន្ថយភាពក្រីក្រចុះក្រោម៤% ដែលក្លាយទៅជាគំរូសម្រាប់ប្រទេសជាច្រើនលើពិភពលោកត្រាប់តាម។
ប្រធានគណកម្មការតម្កល់ឯកសារសភាអូស្ត្រាលី លោក Rowan Ramsay បានអះអាងថា រដ្ឋសភាវៀតណាមនិងសភាអូស្ត្រាលីមានតួនាទីសំខាន់ក្នុងការជម្រុញទំនាក់ទំនងវៀតណាម-អូស្ត្រាលីក្នុងរយៈពេល៤៥ឆ្នាំកន្លងទៅ ព្រមទាំងជឿជាក់ថា ទំនាក់ទំនងទ្វេភាគី វៀតណាម - អូស្ត្រាលីនឹងកាន់តែបានពង្រឹងនិងពង្រីកដោយឥតឈប់ឈរពីមួយថ្ងៃទៅមួយថ្ងៃ៕
(ប្រែសម្រូលដោយស្រីពេជ្រ)
មតិពីមិត្តអ្នកអាន