យុគសម័យ- ដើម្បីឆ្លើយតបទៅនឹងជំងឺរាតត្បាត Covid-19 សហរដ្ឋអាមេរិកបានផ្តល់ជំនួយវេជ្ជសាស្ត្រ និងមនុស្សធម៌បន្ទាន់ដល់ប្រទេសជាសមាជិកអាស៊ានចំនួន ១៨,៣ លានដុល្លារ ក្នុងនោះវៀតណាមទទួលបាន ៣ លានដុល្លារ។
លោកអនុរដ្ឋមន្រ្តីក្រសួងការបរទេសវៀតណាម Nguyen Quoc Dung ។ (រូបថត៖ Tuoitre)
“ជាប្រទេសដើរតួនាទីឈានមុខគេក្នុងការទប់ទល់ផ្នែកមនុស្សធម៌ និងវេជ្ជសាស្ត្រជាសកលក្នុងការប្រយុទ្ធប្រឆាំង Covid-19 សហរដ្ឋអាមេរិកបានអនុវត្តសកម្មភាពយ៉ាងឆាប់រហ័ស ដើម្បីជួយគាំទ្រដល់ដៃគូអាស៊ានរបស់យើងក្នុងការប្រយុទ្ធប្រឆាំងនឹង Covid-19។ ចាប់ពីពេលដែលមានការផ្ទុះឡើងនៃជំងឺ Covid-19 រដ្ឋាភិបាលសហរដ្ឋអាមេរិកបានផ្តល់ជំនួយវេជ្ជសាស្ត្រ និងមនុស្សធម៌បន្ទាន់ដល់ប្រទេសសមាជិកអាស៊ានប្រមាណ ១៨,៣ លានដុល្លារអាមេរិក”។ នេះបើយោងតាមសេចក្តីជូនដំណឹងរបស់ក្រសួងការបរទេសអាមេរិកដែលប្រកាសដោយស្ថានទូតអាមេរិកប្រចាំនៅប្រទេសវៀតណាមកាលពីថ្ងៃទី ១ ខែមេសា។
សហរដ្ឋអាមេរិកបច្ចុប្បន្ននេះជាប្រទេសដែលមានចំនួនករណីឆ្លង Covid-19 ច្រើនជាងគេបំផុតនៅលើពិភពលោក ដោយច្រើនជាងប្រទេសអ៊ីតាលី អេស្បាញ និងចិន។ រដ្ឋាភិបាលសហរដ្ឋអាមេរិកបានប្រកាសកញ្ចប់ថវិកាសង្គ្រោះចំនួន ២០០០ ពាន់លានដុល្លារអាមេរិក ដើម្បីជួយប្រជាជន និងសហគ្រាសដែលរងការខូចខាតក្នុងបរិបទដែលប្រធានាធិបតី ដូណាល់ ត្រាំ អំពាវនាវឲ្យចូលរួមអនុវត្តគម្លាតសង្គមរហូតដល់ដំណាច់ខែមេសា។
ក្នុងពេលជាមួយគ្នានេះ សហរដ្ឋអាមេរិកនៅតែបន្តកម្មវិធីជំនួយរបស់ខ្លួនដល់ប្រទេសក្រៅ។ យោងតាមព័ត៌មានពីក្រសួងការបរទេសអាមេរិក គិតត្រឹមថ្ងៃទី ២៦ ខែមីនា សហរដ្ឋអាមេរិកបានផ្តល់ការវិនិយោគទុនដំបូងជិត ២៧៤ លានដុល្លារអាមេរិកសម្រាប់ជំនួយផ្នែកវេជ្ជសាស្ត្រ និងមនុស្សធម៌បន្ទាន់ដើម្បីជួយបណ្តាប្រទេសដែលត្រូវការ ក្រៅពីការផ្តល់ជំនួយនេះ ប្រទេសនេះក៏បានផ្តល់ជំនួយដល់អង្គការពហុភាគី នានាដូចជា WHO និង UNICEF ជាដើម។
នៅអាស៊ីអាគ្នេយ៍ សហរដ្ឋអាមេរិកបានផ្តល់ប្រាក់ចំនួន ១៨,៣ លានដុល្លារអាមេរិកដល់ប្រទេសមួយចំនួនដូចជា វៀតណាម កម្ពុជា ថៃ ... ប្រាក់ទាំងនេះត្រូវបានប្រើដើម្បីរៀបចំមន្ទីរពិសោធន៍សម្រាប់ការធ្វើតេស្តរក Covid-19 ក្នុងខ្នាតធំ ការការពារការឆ្លងមេរោគ និងការផ្សព្វផ្សាយអំពីហានិភ័យនៃជំងឺរាតត្បាត។
នាថ្ងៃទី ១ ខែមេសា ភាគីទាំងពីរបានរៀបចំសន្និសីទតាមបណ្តាញអនឡាញរវាងមន្ត្រីជាន់ខ្ពស់អាស៊ាន - អាមេរិក ក្រោមអធិបតីភាពរបស់លោកអនុរដ្ឋមន្រ្តីក្រសួងការបរទេសវៀតណាម Nguyen Quoc Dung ប្រធានក្រុមការងារចំណុះក្រុមប្រឹក្សាសម្របសម្រួលអាស៊ាន និងលោក David Stilwell ឧបការីរដ្ឋមន្ត្រីការបរទេសសហរដ្ឋអាមេរិកទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក./.
（បកប្រែដោយឌីណា）
មតិពីមិត្តអ្នកអាន