ប្រទេសវៀតណាមបានដាក់ចេញផែនការនាំចេញឈើរបស់ខ្លួនទៅក្រៅប្រទេស ឲ្យបានក្នុងទឹកប្រាក់១៤ពាន់លានដុល្លារអាមេរិកសម្រាប់ឆ្នាំ២០២១នេះ។ នេះបើតាមការចុះផ្សាយដោយសារព័ត៌ក្នុងស្រុកមួយរបស់វៀតណាម។
វៀតណាមដាក់គោលដៅនាំចេញឈើឲ្យបាន ១៤ពាន់លានដុល្លារក្នុងឆ្នាំ២០២១
កាលពីឆ្នាំ២០២០កន្លងទៅ ប្រទេសដែលមានទំហំព្រៃឈើជាង ១២លានហិកតាមួយនេះ សម្រេចបានការនាំចេញឈើរង្វង់ទឹកប្រាក់ ១៣ពាន់លានដុល្លារកើនឡើង រង្វង់ ១៧% បើធៀបទៅឆ្នាំ២០១៩។ ហើយក្នុងឆ្នាំ២០២១នេះ ក្រសួងកសិម្មវៀតណាមបានដាក់គោលដៅថា នឹងនាំចេញឈើឲ្យបានលើសឆ្នាំ២០២០ចំនួន ១២% ពោលគិតជាទឹកប្រាក់ជាង ១៤ពាន់លានដុល្លារអាមេរិក។
ទិន្នផលព្រៃឈើដែលវៀតណាមនាំចេញ ត្រូវបានលក់ និងចែកចាយទៅជាង ១២០ប្រទេសជុំវិញពិភពលោកដែលក្នុងនោះ ប្រទេសចិន ជប៉ុន សហរដ្ឋអាមេរិក សហភាពអឺរ៉ុប និងកូរ៉េខាងត្បូង ជាប្រទេសធំៗទាំង៥ ដែលទិញឈើពីវៀតណាមច្រើនជាង។ ប្រការនេះ ធ្វើឲ្យវៀតណាមក្លាយជាប្រទេសនាំចេញឈើច្រើនជាងគេលំដាប់ទី ១នៅអាស៊ីអាគ្នេយ៍ លំដាប់ទី២ក្នុងទ្វីអាស៊ី និងច្រើនជាងគេលំដាប់ទី៥ក្នុងលោក។
វៀតណាមមានក្រុមហ៊ុនច្រើនជាង ៥.៥០០ក្រុមហ៊ុនកំពុងប្រតិបត្តិការក្នុងការផលិតនិងកែច្នៃអនុផលព្រៃឈើ ដែលបង្កើតបានការងារដល់ពលរដ្ឋវៀតណាមរាប់លាននាក់។ សូមបញ្ជាក់ថា វៀតណាមក៏បានដាក់ចេញផងដែរនូវផែនការ ៥ឆ្នាំទៅមុខទៀតដោយកំណត់ការនាំចេញឈើឲ្យបានចំនួន ២០ពាន់លានដុល្លារអាមេរិកនៅឆ្នាំ២០២៥៕
（សរុបដោយ ហេង វុធ្ធ）
（ប្រភពព័ត៌មាន: cambonomist.com/congthuong/）
មតិពីមិត្តអ្នកអាន